“Aita vau i manaˈo noa ˈˈe e haere ia ˈu ia tavini maite ia Iehova.” Te manaˈo ïa o Gwen, no Beretane mai, i faaite no nia i te taviniraa i te vahi e hinaaro-rahi-hia ra te feia poro i Albanie. a

 O Gwen hoê o te mau Ite no Iehova tei haere i Albanie no te haaputu i “te mau taoˈa hinaaro-rahi-hia o te mau nunaa atoa.” (Hagai 2:7) Eaha te manaˈo turai o teie feia poro? Eaha te mau tauiraa ta ratou i rave? E eaha te mau haamaitairaa tei tauturu ia ratou ia faaruru i te fifi?

 Hoê â manaˈo turai to te feia poro atoa, tei haere e tauturu i Albanie: To ratou here ia Iehova e te hinaaro e tauturu i te tahi atu ia ite o vai o ˈna.

 Hou a haere ai i te tahi atu vahi, titauhia ia ratou ia rave i te tahi mau tauiraa no te tauturu ia ratou ia tavini i te tahi atu vahi. Te parau ra Gwen: “A tahi, ua haere au i roto i te hoê pǔpǔ reo Albanie i to ˈu oire. I muri iho, ua haere au i Albanie i te hoê tairururaa. E ua hoˈi faahou vau i ǒ no te hoê taime poto no te haamaitai atu â i te reo Albanie.”

 I te 23raa o te matahiti o Manuela, ua haere oia i te tahi atu tuhaa fenua o to ˈna iho vahi i Italia, no te tauturu i te tahi amuiraa nainai. Te parau ra oia: “A maha matahiti to ˈu taviniraa i ǒ. I muri iho, ua faaroo vau e te hinaaro-rahi-hia ra te tauturu i Albanie. Ua faaoti ïa vau e haere i ǒ tau avaˈe ei pionie.”

 E hitu noa matahiti to Federica i to ˈna faarooraa i te hoê faatiaraa no Albanie i te hoê tairururaa. Te parau ra oia: “Ua parau te taeae ua haamata te feia poro i Albanie e rave rahi haapiiraa Bibilia e ua apiti mai te feia tei anaanatae i te mau putuputuraa. Ua parau vau i to ˈu na metua e te hinaaro ra vau e haere i Albanie. Ua maere roa to ˈu na metua i ta ˈu i parau, ua parau râ to ˈu papa: ˈA pure no nia i te reira, e mai te peu tera te hinaaro o Iehova e faaroo mai oia.ˈ Tau avaˈe i muri iho, ua titau-manihini-hia matou no te tavini i Albanie!” E rave rahi matahiti i mairi, ua faaipoipo Federica ia Orges e tei roto raua i te taviniraa taime taatoa i Albanie.

 A faatuhaahia ˈi Gianpiero, ua haere oia e ta ˈna vahine o Gloria i Albanie. Te parau ra oia: “Ua paari ta mâua mau tamaroa i Italia. E toru o ratou tei haere i te vahi e hinaaro-rahi-hia ra te feia poro. Ua putapû roa i te tumu parau o te hoê Pare Tiairaa ‘E nehenehe anei outou e “fano i Makedonia”?’ Ua feruri ïa mâua nafea ia faaohipa i ta ˈu moni faatuhaaraa no te tavini i Albanie.”

 Hou a haere ai i te tahi atu vahi, titauhia i te feia poro ia faaineine maite e ia rave i te mau tauiraa. (Luka 14:28) I rotopu i teie mau tauiraa, te vai ra te imiraa i te ravea ia noaa mai te moni. No te haaputu i ta ˈna moni, ua haere o Gwen tei faahitihia i te omuaraa, e faaea i to ˈna tuahine. Te haamanaˈo ra Sophia e Christopher, no Beretane atoa: “Ua hoo mâua i to mâua pereoo e te tahi atu mau taihaa. Ua hinaaro mâua e faaea i Albanie hoê matahiti.” Te mea oaoa roa, ua nehenehe raua e faaea hau atu hoê matahiti.

 No te tahi feia poro, tau avaˈe noa ratou i Albanie e i muri iho e hoˈi ratou i to ratou fenua no te ohipa e no te haaputu i te moni no te hoˈi faahou i Albanie. Tera ïa te tupuraa o Eliseo e Miriam. Te faataa ra Eliseo: “No Italia mai Miriam, te hoê vahi mea rahi roa te ratere, mea ohie ia noaa mai te ohipa. Ua hoˈi ïa mâua i Italia toru avaˈe no te ohipa, i muri iho ua hoˈi faahou mâua i Albanie e te moni ta mâua i haaputu no te faaea iva avaˈe. Ua na reira mâua pae matahiti.”

 A tae ai te feia poro i te tahi atu vahi, titauhia ia ratou ia faaau ohie i te mau tupuraa apî, e tauturu râ te aˈoraa e te hiˈoraa o te mau Ite no Iehova o tera vahi ia ratou ia haapauma i te fifi. Te parau ra Sophia tei faahitihia i te omuaraa: “I te tau toˈetoˈe i Albanie, mea toˈetoˈe roa i roto i te mau fare i ta ˈu i matau na i ǒ ˈu. Ua haapii au i te faaahu ia ˈu ma te hiˈopoa mea nafea te mau tuahine i te faaahuraa ia ratou.” No Poronia mai Grzegorz e ta ˈna vahine o Sona, ua haere mai raua i te oire nehenehe mau o Prizren i Kosovo b no te tauturu. Te parau ra Grzegorz: “Mea faaoromai, haehaa e mǎrû te feia poro o tera vahi! E tauturu ratou ia mâua ia haapii i to ratou reo e hau atu â. Ei hiˈoraa, ua faaite mai ratou i te mau fare toa mea mâmâ te moni e ua faataa mea nafea ia hoohoo haere i te matete.”

 E faufaahia te feia e haere ra i te tahi atu vahi, i te hoê auhoaraa piri e te mau Ite no Iehova e e haapii atoa ratou no nia i to ratou tupuraa. Te faataa ra Sona: “Ua ite au mea nafea te here o Iehova i te tauiraa i te oraraa o te mau taata. Ua patu te mau taeae i to ˈu faaroo no te mea ua ite roa vau mea nafea to ratou tiaturiraa e oraraa i te taui-roa-raa i to ratou haapiiraa no nia ia Iehova. I roto i te amuiraa, ua ite mâua mea faufaa mâua e e nehenehe mâua e tauturu atu. Ua tavini mâua e te mau taeae e tuahine o te riro mai ei hoa no mâua.” (Mareko 10:29, 30) Te parau ra Gloria: “Ua ite au e rave rahi tuahine tei faaoromai tamau i te patoiraa uˈana o te mau mero o to ratou vahi o te au ore ra i te mau Ite no Iehova. Ua putapû roa vau i te iteraa i to ratou here ia Iehova.”

 Ua ite atoa te feia poro i te mau haapiiraa faufaa ta ratou paha i ore i ite i to ratou iho fenua. Ei hiˈoraa, ua oaoa ratou i te rave hau atu â no Iehova noa ˈtu e ere i te mea ohie ia na reira. Tera tei tupu no Stefano o te parau: “I to ˈu fenua ua poro vau na roto i te hoê ravea paraparauraa, ma te faaohipa i te hoê omuaraa parau poto. I Albanie râ, mea au na te taata e paraparau rahi e te aua taofe iho â ra. Mea mamahu roa vau e i te omuaraa ua haama roa vau e aita i ite eaha te parau. A nuu noa ˈi râ te tau, ua haapii au i te anaanatae i te taata, e i teie nei mea au roa na ˈu ia paraparau e o ratou. Ua au roa ïa vau i ta ˈu pororaa.”

 Ua haere mai Leah e ta ˈna tane o William mai Marite mai i Albanie. Te parau ra o ˈna: “Ua taui te taviniraa i ǒ i to mâua feruriraa e oraraa. Ua haapii rahi mâua no nia i te farii maitai, te faatura, e te auhoaraa! Ua haapii mâua i te mau ravea apî no te poro, no te haaferuri e te mau Papai e no te faaite i to mâua iho manaˈo.” Te parau ra William: “Mea au roa na te rahiraa o te mau taata tei haere mai i Albanie i te pae tahatai nehenehe mau. Mea au roa na ˈu e hahaere i nia i te mau mouˈa ofafai o te Alpes albanaises. O te mau taata râ ta ˈu e au roa i ǒ nei! E rave rahi oire rii i ta matou tuhaa fenua tei faaroo i te parau mau i te roaraa o te pororaa taa ê. Ia haere matou i ǒ, e paraparau noa matou hoê aore ra piti utuafare i te mahana taatoa.”

 Te oaoa rahi ta te feia poro i ite o te fariiraa te taata i te parau apî oaoa. (Tesalonia 1, 2:19, 20) Te horoa ra Laura, tei haere i Albanie ei tuahine taa noa, i te hoê hiˈoraa: “Ua tavini au i Fier. I roto noa piti matahiti e te afa, 120 taata tei riro mai ei feia poro apî! Ua haapii 16 o ratou na muri ia ˈu!” Te haamanaˈo ra Sandra: “Ua poro vau i te tahi vahine tei ohipa i te matete. Ua riro mai oia ei tuahine e ua hoˈi oia i to ˈna oire rii. E ua faaroo vau e ua haamata oia 15 haapiiraa Bibilia!”

 Tau matahiti i teie nei, te vai noa ra te tahi o te feia poro tei haere i Albanie e te oaoa ra ratou i ta ratou taviniraa. Te oaoa nei ratou i te ite, te feia ta ratou i poro mea maoro i teie nei, ua farii ïa i te parau mau. (Koheleta 11:6) Te faataa ra Christopher tei faahitihia i te omuaraa: “Ua tapapa vau i te hoê taata tei haamata i te haapii i te Bibilia na muri ia ˈu i to ˈu haere-matamua-raa i Albanie. Ua oaoa roa vau i to ˈna haamanaˈoraa mai i ta mâua aparauraa matamua no nia i te Bibilia. I teie nei ei Ite no Iehova o ˈna e ta ˈna vahine.” Te faaite ra Federica tei faahitihia na: “I roto i te hoê amuiraa, ua tapiri mai hoê tuahine e ua parau mai te haamanaˈo ra anei au ia ˈna. Ua parau mai oia e ua poro vau ia ˈna e iva matahiti na mua ˈtu. Tau taime i muri iho, i to ˈu haereraa ˈtu i te tahi atu oire. Ua haamata oia i te haapii i te Bibilia tae roa i te bapetizoraa. Ua manaˈo noa na vau i te mau matahiti matamua, to matou pororaa i Albanie aita te pororaa i manuïa. Ua hape râ vau!”

 Ua mauruuru rahi roa te mau taeae e tuahine tei haere i Albanie aore ra Kosovo i to ratou iteraa mea nafea Iehova i te haamaitairaa i ta ratou mau tutavaraa e oraraa. I muri aˈe e rave rahi matahiti i Albanie, te faataa poto ra Eliseo i to ˈna tupuraa ma te parau: “Ei taata, mea ohie roa ia vare tatou ma te manaˈo e mau papu tatou i nia i ta teie nei ao e horoa ra. E ere râ i te mea mau. I te tahi atu pae, te horoa ra te faaueraa tumu a Iehova i te fa e te mau papuraa. Te tauturu ra te taviniraa i te vahi e hinaaro-rahi-hia ra te feia poro ia ˈu ia haamanaˈo i te reira. Mea faufaa roa vau. E hoa mau to ˈu o te ohipa ra i te hoê â fâ.” Tera atoa to Sandra manaˈo: “I to ˈu haereraa i te vahi e hinaaro-rahi-hia ra te feia poro, ua ite au ua horoa mai Iehova ia ˈu i te ravea no te rave i ta ˈu i hinaaro noa na, oia hoi te riroraa ei mitionare. Aita vau i tatarahapa noa ˈˈe i to ˈu haereraa i Albanie. Aita vau i oaoa aˈenei mai tera.”