I 2011, ua horo ê te tahi taata no Érythrée i te fenua Norevetia. I te farereiraa te mau Ite no Iehova ia ˈna, ua parau oia ua matau oia i te tahi mau Ite no Iehova i to ˈna fenua tumu. E faehau oia na mua ˈˈe, ua ite oia aita te mau Ite no Iehova o tei tapeahia no to ratou faaroo i farii i te faaô i roto i te nuu noa ˈtu ua faahepohia e ua hamani-ino-hia ratou.

 Ua tupu râ te tahi ohipa e ua huri-atoa-hia teie taata i roto i te fare tapearaa. I reira, ua farerei oia e toru Ite no Iehova, o Paulos Eyasu, Negede Teklemariam e Isaac Mogos. Ua tapeahia ratou no to ratou faaroo mai te matahiti 1994.

 I roto i te fare tapearaa, ua ite mata roa teie taata te faaohipa ra te mau Ite no Iehova i ta ratou e haapii ra. E feia afaro ratou e ua ineine atoa i te horoa i te maa na te tahi atu feia mau auri. Ua ite atoa o ˈna ia ratou i te haapii-amui-raa i te Bibilia i te mau mahana atoa e te titau-manihini-raa ia vetahi ê ia apiti atoa mai. Ua horoahia te tahi papie ia ratou o te parau ra aita ratou e tavini faahou ra ia Iehova e i reira ratou e matara mai ai i te fare tapearaa, aita râ ratou i tarima i te reira.

 Ua putapû roa teie taata, e i to ˈna taeraa i Norevetia, ua hinaaro o ˈna e ite no te aha mea puai te faaroo o te mau Ite no Iehova. I te farereiraa te mau Ite no Iehova ia ˈna, ua haamata oioi oia i te haapii i te Bibilia e o ratou, e i te apiti i ta ratou mau putuputuraa.

 I Tetepa 2018, ua bapetizohia oia ei Ite no Iehova. I teie nei, te imi nei oia i te mau ravea atoa no te farerei i te mau taata atoa no Érythrée e no Soudan no te faaitoito ia ratou ia haapii i te Bibilia e ia faatupu i te hoê faaroo puai.