Ua fanauhia vau i Ouganda i te mataeinaa o Gomba. Mea veve te rahiraa o te taata i reira. Aita e uira i to matou oire, i te po e faaohipa matou i te mori teitei.

 Mea na Rwanda mai to ˈu na metua i te haereraa mai i Ouganda. E feia faaapu raua i te taofe e te meiˈa e ua hamani raua i te tahi ava i te meiˈa parauhia waragi. Ua faaamu atoa raua i te moa, puaaniho, puaa e puaatoro. Ua turai mai to matou huru oraraa i te fare ia manaˈo mea titauhia i te hoê vahine ia mamû noa e ia auraro i ta ˈna tane i te mau taime atoa.

 I te 23raa o to ˈu matahiti, ua haere au e faaea i Rwanda e e tia na vau i te mau fare oriraa e te tahi atu mau taurearea. No te mea ua matauhia vau i roto hoê o te mau fare oriraa, ua horoahia mai te hoê tareta ia nehenehe au e tomo noa ma te tamoni ore. Mea au roa atoa na ˈu e mataitai i te mau hohoˈa taputôraa e taparahiraa taata. Ua turai mai to ˈu huru oraraa e ta ˈu mau peu ia riro ei taata ino, taiata e te inu hua i te ava.

 I 2000, ua ora vau e te hoê vahine o Skolastique Kabagwira te iˈoa e fanau mai nei mâua e toru tamarii. Mai ta ˈu i haapii i te fare i to ˈu apîraa, ua titau vau ia tuturi ta ˈu vahine i mua ia ˈu no te aroha mai aore ra no te ani mai i te tahi ohipa. No ˈu, pauroa te mau faufaa a te utuafare, na ˈu anaˈe ïa e e tiaraa to ˈu ia faaohipa i te reira mai ta ˈu e hinaaro. Pinepine au i te haere e ori i te maororaa po e i te hoˈi i te hora toru i te aahiata, ua taero iho â ïa! Ia patoto vau i te opani, eiaha o Skolastique ia haamaoro i te tatara mai i te opani, aita anaˈe ua tupai au ia ˈna.

 I taua taime ra, te ohipa ra vau ei raatira i roto i te hoê taiete tiairaa fare, e moni maitai ta ˈu. Ua tamata Skolastique i te faaô ia ˈu i roto i ta ˈna haapaoraa Penetekose ma te manaˈo e taui te reira i to ˈu huru. Aita râ vau i hinaaro. Haamata ˈtura vau i te haamatau i te tahi atu vahine. No to ˈu huru ino e taiata, ua rave Skolastique i ta mâua e toru tamarii e ua haere e ora i to ˈna metua ra.

 Ua paraparau mai te tahi hoa no mâua Skolastique no nia i to ˈu oraraa e ua faaitoito mai ia hoˈi faahou mâua. Ua parau mai oia mea tano aˈe ia ora ta ˈu mau tamarii here i pihai iho ia mâua. I 2005, ua faaea vau i te inu, ua faarue i te tahi atu vahine e ua hoˈi faahou mâua Skolastique. Ua faaipoipo mâua i te matahiti 2006. Tera râ, e taata ino noa â vau e te faatura ore i ta ˈu vahine.

 I 2008, ua haere mai te hoê Ite no Iehova o Joël te iˈoa i to mâua fare e ua farii au i te faaroo ia ˈna. Tau avaˈe to ˈna e to te taeae Bonaventure haereraa mai e farerei ia ˈu no te tauaparau no nia i te Bibilia. E rave rahi uiraa ta ˈu, no nia iho â râ te buka Apokalupo. Ua tamata vau i te haapapu ua hape te mau Ite no Iehova. Ua parau hoi ratou e ora te “nahoa rahi” o te Apokalupo 7:9 i nia i te fenua. Tera râ, te parau ra te irava ‘te tia noa ra ratou i mua i te terono o te Atua e i mua i te Arenio,’ oia hoi o Iesu Mesia. Ua pahono Joël i ta ˈu mau uiraa ma te faaoromai. Ua taio mai oia i te Isaia 66:1 o te faaite ra e “taahiraa avae” te fenua no te Atua. Te tia ra ïa te nahoa rahi i nia i te fenua i mua i te terono o te Atua. E ua taio atoa vau i te Salamo 37:29 o te parau ra e parahi te feia parau-tia i nia i te fenua e a muri noa ˈtu.

 Farii ihora vau i te hoê haapiiraa Bibilia. Ua haapii mâua Skolastique i te Bibilia na muri i te taeae Bonaventure. Roaa mai nei ia ˈu te hinaaro e taui i to ˈu oraraa. Ua haapii au i te faatura i ta ˈu vahine. Aita vau i titau faahou ia tuturi o ˈna i mua ia ˈu e ua faaea atoa i te manaˈo na ˈu anaˈe te mau faufaa a te utuafare. Ua ore atoa ta ˈu peu e mataitai i te hohoˈa taparahiraa taata. E ere i te mea ohie ia rave i tera mau tauiraa, ua titauhia ia haavî ia ˈu iho e ia faaite i te haehaa.

 Tau matahiti na mua ˈtu, ua afai au i ta ˈu tamaiti matahiapo o Christian i to ˈu fetii ra i Ouganda. I to ˈu râ taioraa i te Deuteronomi 6:4-7, ua taa ia ˈu e i mua i te Atua, na mâua te hopoia e haapao e e haapii i ta mâua tamarii i te mau faaueraa a te Atua. Ua oaoa roa matou i te hoˈiraa ˈtu i te fare e ta mâua tamaiti!

 Ua haapii au e Atua aroha hamani maitai Iehova e ua papu atoa ua faaore o ˈna i ta ˈu mau hara. Ua oaoa roa vau i to Skolastique apitiraa mai no te haapii i te Bibilia. Ua pûpû mâua i to mâua ora ia Iehova e bapetizohia ˈtura i te 4 no Titema 2010. I teie nei, mea tiaturi mâua te tahi i te tahi e te oaoa atoa nei i te auraro i te mau faaueraa a te Atua i roto i to mâua oraraa. I teie nei, oaoa roa ta ˈu vahine e afaro noa vau i te fare ia oti ta ˈu ohipa. Te mauruuru atoa nei oia mea here e mea faatura vau ia ˈna e ua faaoti atoa vau e haapae i te inu i te ava. E ere faahou vau i te taata ino. I 2015, ua faatoroahia vau ei matahiapo no te aupuru i te amuiraa. I nia na pae tamarii ta mâua, e toru tei bapetizohia.

 I to ˈu haamataraa i te haapii i te Bibilia e te mau Ite no Iehova, aita vau i farii matapo noa i ta ratou i haapii mai. Ua faahiahia râ vau mea faaohipa ratou i te Bibilia no te pahono i ta ˈu mau uiraa. Ua oaoa atoa mâua i te iteraa e titauhia i te mau tavini o Iehova ia haapao i ta ˈna mau ture aveia atoa, eiaha noa râ i ta ratou e hinaaro. E oaoa iti rahi to ˈu ua aratai mai Iehova ia ˈu ia ˈna ra e i rotopu atoa i te feia e haamori ra ia ˈna. Ia feruri au i to ˈu oraraa na mua ˈˈe, ua papu ia ˈu e nehenehe te taata aau tae o te hinaaro e riro ei hoa no te Atua e taui maoti noa ta ˈNa tauturu!