I muri iho te feia mana o te oire i horoa ˈi i te parau faatiaraa, ua tamâ te feia rave ohipa i te vahi paturaa ma te faahuˈahuˈa i te mau tumu raau tei tâpûhia. Ua haapao ratou ia oti tera ohipa hou te tau ofaaraa a te mau manu e haamata ˈi. Ua faaohipa ratou i te mau huˈahuˈa raau no te faanaho i te hoê vahi haereraa taata. Ua haaputu atoa ratou i te raau no te ohipa paturaa.

Te tamau nei te hoê taata rave ohipa i te mau patiaraa uira no te mau afata teata i te vahi faaohipahia ei hotera i na mua ˈtu. E vahi tamaaraa i teie nei. Maoti te mau afata teata, e nehenehe te feia rave ohipa e mataitai i te mau porotarama pae varua mai te haamoriraa poipoi e te haapiiraa o Te Pare Tiairaa faataahia no te utuafare o te Betela.

Te tuu nei te feia rave ohipa i te mau aua paruru o te haaati i te mau tuhaa rarahi o te vahi paturaa. Inaha e tuhaa fenua mataeinaa, ua haapaohia ia ore te paturaa e haafifi i te mau animara. Ei hiˈoraa, i raro i te aua paruru, ua vaiihohia te hoê atea e 20 tenetimetera ia nehenehe te animara parauhia blaireau e tamau i te hahaere e i te rave i ta ˈna mau ohipa i te po.

Te patuhia ra te hoê purumu no te haere mai te vahi nohoraa o te feia rave ohipa e tae atu i te vahi paturaa. E faaohipahia teie purumu i te roaraa noa o te ohipa paturaa o te Betela.

E hohoˈa patahia mai te pae Hitia o te râ no te faaite i te taatoaraa o te purumu faataa-noa-hia no te tau paturaa. Mai te itehia ra i te pae atau i nia o te hohoˈa, e haere te purumu i te vahi paturaa o te Betela. I te pae aui i raro o te hohoˈa, te itehia ra te tahi mau fare tahua rau tei riro i teie nei ei vahi nohoraa na te feia rave ohipa. E patuhia te mau fare nohoraa i te mau tuhaa fenua i pihai iho.

Ua haere te hoê mero o te Tino aratai a te mau Ite no Iehova e te tahi atu tia o te pu rahi e farerei i te pǔpǔ paturaa. I tera hebedoma, ua haapurorohia te hoê putuputuraa taa ê i te mau Piha a te Basileia i te fenua Beretane e i Irelane. Ua faaarahia e i te po na mua ˈˈe e tupu ai te putuputuraa, ua horoa te apooraa oire o Chelmsford i te parau faatiaraa matamua no te haamata i te paturaa o te Betela apî.

Te tuu nei te feia patu i te faanahoraa no te paruru i te aˈa o te mau tumu raau rarahi. Maoti teie purumu taa ê e nehenehe ai te taata e haere mai te vahi na te feia rave ohipa e tae atu i te vahi paturaa o te Betela. E nehenehe atoa te mau pereoo rarahi e tere na nia ˈtu ma te ore e haafifi i te aˈa o te mau tumu raau.

Te heru nei te feia rave ohipa i te apoo hinaarohia no te paturaa i te mau fare nohoraa na te feia rave ohipa. I muri noa mai, te itehia ra te mau fare nohoraa matamua faaohipahia i te roaraa noa o te paturaa i te Betela. E 50 fare nohoraa te patuhia.

Te tamau nei te hoê taata rave ohipa i te auri no te faahaere i te pape i te mau fare nohoraa.

E hohoˈa patahia mai te pae Hitia o te râ no te faaite i te mau fare nohoraa apî tei oti. I mua noa mai, ua haamauhia te niu o te tahi atu mau fare nohoraa. I te pae aui, te vai ra te mau fare tahua rau i reira e noho ai e e tamaa ˈi te feia rave ohipa. E patuhia te Betela i nia i te tuhaa fenua itehia i ropu o te hohoˈa i muri noa mai.

Te tamau nei te hoê taata aravihi i te tahi niuniu no te natirara i roto i te piha faataahia no te reira. Mea faufaa ia haamauhia teie faanahoraa na mua ˈtu te ohipa paturaa ia ohie te ohipa a te feia patu, te paraparauraa e te tahi atu mau amaa e te faanahoraa i te ohipa ia au i te aratairaa a te pu rahi.

Maoti te tahi matini parauhia GPS, te faataa ra te hoê ona ohipa ihea e vai ra te mau vahi heruhia no te ite eaha tei raro aˈe i te fenua. E nehenehe ïa te feia ihipǎpǎ e ite i te reira hou a haamata ˈi te paturaa. Noa ˈtu i mutaa iho ra ua ora te feia no Roma i pihai iho i te oire no Chelmsford, aita i itehia te tahi noa ˈˈe taoˈa no mutaa iho ra i roto i nau 107 apoo tei heruhia.

Te tâpûhia ra te tahi mau auri no te niaraa o te mau uputa. I te vahi na te feia rave ohipa, ua faarirohia vetahi mau fare tahua rau ei vahi ohiparaa. I reira atoa e haamauhia ˈi te mau piha no te faaohie i te ohipa a te feia patu.

Te faaîhia ra te muriraa o te tahi pereoo rarahi e te repo fenua.

Hohoˈa o te tuhaa mataeinaa o te fenua Beretane mai te pae apatoa o te vahi paturaa e 34 tâ te aano. Maoti te hoê purumu i pihai iho (aita e itehia i nia i te hohoˈa) e nehenehe ai te taata e haere i te mau uahu, tauraa manu reva e i te oire no Lonedona.

Te tamâhia ra te vahi faataahia no te paturaa o te Betela apî ma te tatara i te mau fare tei patu-aˈena-hia.

Maoti te tahi matini hivi e 60 tane te teiaha, te tuuhia ra te raroraa o te hoê piha tei patu-aˈena-hia. I mua noa mai, ua haamauhia te niu o te tahi atu mau piha. E faaohipahia teie mau piha ei vahi ohiparaa no te aratai i te paturaa o te Betela.