E rave rahi taata no te mau nunaa atoa tei faufaahia i te reni natirara jw.org. Teie te tahi o te mau tapao haamauruururaa i faataehia ˈtu i te pu rahi a te mau Ite no Iehova mai te avaˈe Me 2014.

“Na mua ˈˈe ra ia hoˈi anaˈe mai ta ˈu tamaiti iti i te fare na te haapiiraa mai, e peni tara ta ˈna e faahoˈi mai, e taoˈa hauti, aore ra e titia mata e ere hoi na ˈna, na to ˈna râ mau hoa haapiiraa. Ua tutava noa na maua ta ˈu vahine i te tauturu i ta maua tamaiti ia taa e, a na reira ˈi oia, te riro ra oia ei eiâ, e e mea ino hoi ia eiâ. Aita iho â râ! E tae roa i te mahana i mataitai ai matou i te video Mea ino ia eiâ tei ravehia mai i nia i te reni natirara jw.org. E mauhaa puai mau te reira, e tera iho â tei tano maitai no ta ˈu tamaiti. I muri aˈe i to ˈna mataitairaa i te reira, ua hinaaro oia e faahoˈi atu i te mau taoˈa atoa ta ˈna i rave mai, ua papu hoi ia ˈna i teie nei e mea ino te eiâ no te Atua. Ua riro mau teie reni natirara ei tauturu rahi no matou!”—D. N., Afirika.

“Mea au roa na ta ˈu mau tamarii teie reni natirara. E mataitai ratou i te mau video no te mau tamarii ta ratou i rave mai i nia jw.org. Ua tauturu te reira ia ratou ia haapao maitai atu â i te mau ture aveia a te Bibilia no nia i te haavare aore ra te eiâ. Ua haapii atoa ratou e nafea ia faatupu i te tahi atu mau huru maitatai i te roaraa o to ratou oraraa, a riro atu ai ei taata au maitai.”—O. W., Antilles.

“Na mua ˈˈe ra, ua manaˈo vau e faarue i te haapiiraa no te mea ua fiu roa vau. I te hoê râ mahana, ua taio vau i te hoê tumu parau i nia jw.org ‘E faarue anei au i te haapiiraa?’. Ua tauturu mai te reira ia ˈu ia haafaufaa i te haapiiraa. E ravea hoi te reira no te faaineine ia ˈu ia riro ei taata feruriraa paari.”—N. F., Afirika.

“I nia i teie reni natirara, mea rahi te mau aˈoraa no te mau taurearea. Ua haapii au e nafea ia tapea i te mau ture aveia morare maitai i te fare haapiiraa. Oia atoa e nafea ia haapao na mua i te haapiiraa, eiaha râ i te faaanaanataeraa.”—G., Afirika.

“Ua faatia mai te hoê hoa ohipa i to ˈna hepohepo no ta ˈna tamahine e rave-ino-hia ra i te fare haapiiraa, e te tahi tamahine iho â râ. Ua taiâ oia e aita oia i haere i te haapiiraa tau mahana. Ua faatia ˈtu vau i to ˈu hoa ohipa i te tahi o te mau ravea ta ˈu i ite i roto i te video Faaruru i te hamani-ino-raa i te fare haapiiraa i nia jw.org. Ua au o ˈna i te aˈoraa ia faaohipa i te parau hauti no te tamaru i te iria. Ua haapii oia i ta ˈna tamahine e nafea ia patoi atu i te mau rave-ino-raa. I muri iho, ua haere te tamahine i te haapiiraa ma te ore e taiâ. E i muri aˈe, ua riro atoa te tamahine tei rave ino na ia ˈna ei hoa no ˈna.”—V. K., Europa hitia o te râ.

“Mauruuru no te tumu parau ‘No te aha te otioti nei au ia ˈu iho?’ Mea maoro to ˈu faarururaa i teie fifi ma te ore e faatia i te reira ia vetahi ê. Ua manaˈo hoi au e eita ratou e taa mai e o vau anaˈe i mua i tera fifi. Ua tauturu mai te mau faatiaraa ta ˈu i taio i roto i teie tumu parau. Ua ite au i teie nei e te vai ra hoê o te taa ra ia ˈu!”—Te hoê vahine apî no Auteralia.

“Maoti jw.org, mea ohie aˈe ia ite e nafea ia faaruru i te mau fifi ta te mau taurearea e ora nei. Ua tauturu mai te tumu parau no nia i te faaheporaa e taati ia ite eaha te reira e ia taa e ua na reirahia vau. Ua ite atoa vau eaha te tia ia rave ia tupu tera fifi.”—T. W., Antilles.

“Mea peepee roa ta ˈu tamaiti taurearea. Mea pinepine vau i te tâhiti i to ˈna huru, te tahi mahana mea maitai o ˈna, te tahi aita. Mea fifi ïa no mâua ia tauaparau. I te hoê mahana, ua haere au i nia jw.org i te tuhaa faataahia no te feia faaipoipo e te mau metua. I reira to ˈu iteraa e rave rahi tumu parau e tatara ra hoê â tupuraa i to ˈu. Ua haapii au e nafea ia tauaparau e ta ˈu tamaiti. Ua faufaa-atoa-hia oia i teie reni natirara. I teie nei, mea paraparau roa mâua e e faatia mai o ˈna i ta ˈna mau oaoaraa e haapeapearaa.”—C. B., Afirika.

“E horoa te jw.org i te mau metua i te ravea no te haapii i ta ratou mau tamarii ma te hauti. Ei hiˈoraa, te video e faataa ra nafea ia ite i te hoê hoa maitai. Ua tauturu mai te reira i ta mâua tamarii ia taa eaha mau te auhoaraa maitai e ia maiti i te mau hoa maitai. Mea pinepine e piahia te tahi tumu parau i nia jw.org no nia i te hoê fifi ta ta ˈu mau tamarii e faaruru nei. Mea rahi aˈoraa e vai ra i nia i teie reni natirara.”—E. L., Europa.

“Ua faaipoipohia mâua ta ˈu vahine a ono matahiti i teie nei. Mea taa ê roa mâua i nia anei i te huru paraparau, te huru oraraa e te huru feruriraa. Ua faatupu te reira i te tahi mau peapea i roto i to mâua oraraa. Ua haru maitai to ˈu mata i te tumu parau i nia jw.org ‘Nafea ia horoa ˈtu i te tariˈa faaroo?’ Ua taio vau i te reira e o ta ˈu i haapii mai, o ta ˈu atoa ïa i faatia ˈtu i ta ˈu vahine. Ua tutava mâua i te faaohipa i teie mau aˈoraa faufaa mau.”—B. B., Antilles.

“Hoê matahiti i teie nei to ˈu amuimui-noa-raa i te tahi mau Ite no Iehova e te hinaaro nei au e faaite i to ˈu mauruuru no te jw.org. Mea rahi ta ˈu i haapii i nia i teie reni. Ei hiˈoraa, e nafea ia tamǎrû ia ˈu e ia riro ei hoa faaipoipo e ei metua tane maitai. Ua ora mai to ˈu faaipoiporaa maoti teie reni natirara.”—L. G., Antilles.

“Maoti te jw.org, e au ra e te ora faahou ra vau. Maoti te mau video, ua rahi atu â to ˈu ite i te reo apǎraa rima Marite. Na mua ˈˈe ra, mai te huru ra e aita ta ˈu e fa i roto i to ˈu oraraa. I to ˈu râ mataitairaa i te video Te Parau a te Atua i roto i to ˈu iho reo, ua mahanahana roa to ˈu aau e ua faaoti au e tiatonu i te mau mea maitai o te oraraa.”—J. N., Afirika.

“E faufaa iti rahi to teie reni natirara. Te tauturu nei au i te feia tariˈa turi, te feia apî iho â râ. Maoti te rahiraa video e vai ra i nia i teie reni, ua aravihi atu â vau i te pae o te apǎraa rima. E nehenehe atoa vau e tauturu i te feia e hinaaro e haamaitai i to ratou oraraa utuafare aore ra auhoaraa.”—K. J., Antilles.

“E matapo vau e ua faufaahia vau i te reni jw.org. Na mua ˈˈe ra, i tiai na vau tau avae ia tae mai ta ˈu mau papai i roto i te afata rata. I teie nei râ, maoti te reni natirara, e tae mai ta ˈu mau papai i te hoê â taime i ta te feia e ite ra. Ua faufaahia ïa to ˈu oraraa utuafare e e nehenehe ta ˈu e tauturu i te tahi atu.”—C. A., Marite Apatoa.

“No te matapo aita i ite i te taio i te Braille aore ra aita e moni no te hoo mai i te tahi mau buka Braille, e taoˈa faufaa mau te jw.org. Maoti te mau haruharuraa, e nehenehe ta te taata matapo e fanaˈo i te mau parau rii apî i nia e rave rahi tumu parau. Ua faanahohia teie reni natirara no te mau huru taata atoa, aita e faataa-ê-raa. E faaturahia e e haapao-atoa-hia te feia matapo maoti teie reni.”—R. D., Afirika.

“Mea taa ê mau ta outou reni natirara i te tahi atu. Aita hoi te reira e faaohipa ra i te mau taˈo fifi ia taa, o te mau peresibutero anaˈe te nehenehe e taa. Eita oe e painu, mea ohie hoi ia taa i ta outou reni natirara e e ite tia ˈtu oe i te pahonoraa. Aita te reira i î i te parau philosophia. Aita atoa e faaite ra i te faaroo mai te hoê mea fifi mau. Mai te hoê râ mea ta te taata atoa e nehenehe e faatupu.”—A. G., Asia.

“Ahiri aita o jw.org, mea haapaoraa ore to ˈu oraraa. I roto i te hoê ao poiri i te pae varua, ua riro teie reni natirara mai te hoê mori ta ˈu e nehenehe e tuama. I reira iho â, e nehenehe ta ˈu e taio aore ra e faaroo i te tahi mau parau o te faataa ra i te manaˈo o te Atua i nia i tera e tera tumu parau. E ite-atoa-hia te pahonoraa o te tahi mau uiraa faufaa o te oraraa.”—J. C., Antilles.

“Mea au mau na ˈu te tauturu pae varua ta ˈu e fanaˈo ra i ǒ ˈu nei, i te vahi moˈemoˈe roa ˈˈe i Marite Apatoa. Ahiri aita teie reni natirara, e moˈemoˈe roa vau.”—M. F., Marite Apatoa.