I Auteralia, mai i te tahi atu mau fenua, te rahi noa ˈtu ra te feia ruhiruhia. Te faaea nei vetahi o ratou i roto i te mau fare ruau a fanaˈo atu ai i te tauturu i te pae o te ea e i ta ratou e hinaaro mau ra i te mau mahana atoa.

Parau mau, aita e navai noa ia tauturu i te feia ruhiruhia i te fare ruau i te pae o te ea. I te tahi taime, e fiu, e moˈemoˈe aore ra e manaˈo ratou e mea faufaa ore ratou. I te oire no Portland, i Auteralia, te haere ra te mau Ite no Iehova e farerei i te feia ruhiruhia i roto i e piti fare ruau i te mau hebedoma atoa. I ǒ, te horoa ra te mau Ite no Iehova i te tiaturiraa e te tamahanahanaraa na te feia ruhiruhia.

E farerei te mau Ite no Iehova no tera oire i te hoê pǔpǔ o te hoê fare ruau e e tauaparau atu ratou no nia i te mau tumu parau Bibilia mai te mau tupuraa faahiahia o to Iesu oraraa. Te na ô ra o Jason: “E taio matou i te mau irava Bibilia e te feia ruhiruhia e i muri iho, e tauaparau matou no nia i te reira.” E faaruru te rahiraa o te feia ruhiruhia i te mau fifi i te pae o te ea. No reira e faaitoito ai te mau Ite no Iehova ia ratou maoti te parau fafau a te Atua e faaore roa oia i te maˈi e i te pohe.

Te parau ra o Tony, te hoê Ite no Iehova no tera tuhaa fenua: “I te haamataraa, ua tauaparau matou e te feia ruhiruhia e toru ahuru minuti i te maoro. Ua ani râ ratou ia faaea matou maoro atu â. I teie nei, e tauaparau matou hoê hora i te maoro, noa ˈtu e ua hinaaro hoê vahine ruhiruhia ia faaea matou e piti hora i te maoro!” E matapo vetahi o ratou, e vai noa te tahi atu i nia i te roˈi aore ra aita ratou e nehenehe e tapea i te mau taoˈa. Noa ˈtu râ, e tauturu te mau Ite no Iehova ia ratou maoti te mau tauaparauraa e faaitoitoraa ia apiti pinepine i te reira.

I taua mau farereiraa ra, e himene te mau Ite no Iehova e te feia ruhiruhia i te tahi mau himene arueraa i te Atua. Pinepine te feia e noho ra i ǒ i te ani i te mau Ite no Iehova ia himene hau atu â mau himene. Ua na ô o John, a hoê o te mau taata e noho ra i te fare ruau: “Mea au na matou te upaupa ta outou e faataˈi mai. E tauturu mai te reira ia ite atu â no nia i te Atua e ia faatura ia ˈna.” Ua haapii o Judith, te hoê vahine matapo e noho atoa ra i ǒ, i te mau parau atoa o te mau himene ta ˈna e au roa ˈˈe!

Te haapao ra te mau Ite no Iehova e mea maitai anei te taata ruhiruhia taitahi. Ua parau te hoê rima tauturu, o Brian to ˈna iˈoa, mai te peu e maˈihia vetahi taata ruhiruhia o te fare ruau, e haere te mau Ite no Iehova e farerei ia ratou i roto i ta ratou piha. Ua na ô o Brian: “E tauaparau matou e o ratou no te ite i to ratou huru. I te tahi taime, e hoˈi matou e farerei ia ratou i te tahi atu mahana no te ite mea maitai aˈe anei ratou.”

E haafaufaa rahi e rave rahi taata ruhiruhia o te fare ruau i taua mau farereiraa. Te na ô ra o Peter o te apiti ra i tera mau tauaparauraa i te mau hebedoma atoa: “Eita ta ˈu e nehenehe e tiai i tera mau farereiraa.” Ua parau o Judith i te mau taata e aupuru ra ia ˈna: “Mahana toru teie mahana! A tauturu mai na ia ineine au no te pǔpǔ haapiiraa Bibilia. Aita vau e hinaaro ia taerehia vau!”

Mea au roa na te feia ruhiruhia i ta ratou e haapii ra e e piri atu â ratou i te Atua. I muri aˈe i te tauaparauraa no nia i te hoê o ta Iesu mau haapiiraa, ua na ô o Robert: “Aita roa ˈtu vau i taa i tera irava Bibilia i na mua ˈˈe. I teie nei râ, e!” Ua haapii mai o David i te faufaaraa o te pure, ua parau oia: “Ua tauturu mai te reira ia faatupu i te auhoaraa e te Atua e i teie nei, mea mau oia no ˈu.”

Te anaanatae ra te feia e noho ra i taua fare ruau ia haapii mai no nia i te tiaturiraa ta te Bibilia e horoa no te a muri aˈe. Ua parau o Lynette, te hoê vahine e noho ra i te fare ruau, i te mau Ite no Iehova: “Mauruuru ia outou no te poroi Bibilia tamahanahana mau ta outou e afai mai.” Teie ta te tahi atu i parau: “Na te Atua i tono ia outou!”

Mea au roa na Margaret taua mau farereiraa ra e i teie nei e tae tamau oia i te mau putuputuraa a te mau Ite no Iehova i te Piha a te Basileia no tera tuhaa fenua. E titauhia ia ˈna ia rave i te mau tutavaraa rahi no te mea mea paruparu oia e eita oia e nehenehe e haere maitai. Ua parau oia i te mau Ite no Iehova: “Ua horoa outou ia matou pauroa i te hoê fa i roto i te oraraa.”

Mea au atoa ra na te mau rave ohipa te mau farereiraa a te mau Ite no Iehova. Teie ta Anna, hoê Ite no Iehova, e parau ra: “Te faaitoito ra te mau rave ohipa i te feia ruhiruhia ia apiti i te mau tauaparauraa no te mea ua tapao ratou e mea oaoa aˈe te feia ruhiruhia maoti tera mau farereiraa.” No Brian, tei faahitihia i na mua ˈˈe, “mea maitai roa te mau rave ohipa e e faaohie ratou i te faanahoraa o te mau farereiraa. E rave atoa ratou i te mau tutavaraa taa ê no te tauturu atu.”

Mea oaoa te mau fetii o te feia ruhiruhia a ite atu ai mea au roa na to ratou feia herehia te mau tauaparauraa. Ua haapopou te tamahine a te hoê vahine ruhiruhia i te mau Ite no Iehova a na ô atu ai: “Te rave nei outou i te hoê ohipa faahiahia roa no to ˈu mama.”