I Kanada, te paraparauhia ra hau atu 60 reo tumu. Ua riro vetahi mau reo ei reo tumu no 213 000 taata no tera fenua.

Ia putapû te aau o te mau taata tumu, e rave rahi Ite no Iehova tei haapii hoê o teie mau reo. I te hopea o te matahiti 2015, ua faanaho te mau Ite no Iehova i te hoê faaineineraa no te haapii i te hoê reo tumu i hau atu 250 taata.

Hau atu, ua huri te mau Ite no Iehova i te mau papai Bibilia, oia atoa te mau video poto, na roto e vaˈu reo tumu no Kanada: Algonquin, Pied-noir (Blackfoot), Cri des Plaines, Cri des marais de l’Ouest, Inuktitut, Mohawk, Odawa e Ojibwé du Nord. a

E farii te feia e haapii mai ra i te tahi reo tumu e e ere i te mea ohie. Te na ô ra Carma: “Ua tauturu vau i te pǔpǔ huriraa na roto i te reo Pied-noir. I te omuaraa, ua ohipa vau mai te huru ra e ua tapohia to ˈu na mata. Aita vau i ite maitai i te reo. Aita atoa vau i aravihi no te taio na roto i tera reo aore ra no te taa a faaroo ai i te reira.”

Te na ô ra Terence, taata tauturu i te pǔpǔ huriraa na roto i te reo Cri des marais de l’Ouest: “E rave rahi taˈo mea roroa e mea fifi ia faahiti atu.” Te parau ra Daniel, hoê tavini taime taatoa i te motu no Manitoulin i Ontario: “Aita e rave rahi buka na roto i tera reo. Te ravea maitai roa ˈˈe no te haapii mai i te reo Odawa, ia ani ïa i te tauturu i te hoê papa ruau aore ra mama ruau o te ite maitai ra i tera reo.”

Mea faufaa anei ia rave i teie mau tutavaraa? Te haapapu ra te hoê vahine Ojibwé e mea taa ê iho â te mau Ite no Iehova i te tahi atu mau haapaoraa. Te faaite ra oia e maoti te pororaa i tera e tera fare e te taioraa i te mau Papai na roto i te reo Ojibwé, te tauturu nei te mau Ite no Iehova i te taata ia tauaparau ohie aˈe no nia i te Bibilia.

Te faahiti ra Bert, hoê taata huri tei paari i rotopu i te pǔpǔ taata tumu Gens-du-Sang i Alberta: “Ua ite au e rave rahi taata Pied-noir o tei tapea i te tahi papai ma te parau e, ‘To ˈu reo tera. No ˈu tera papai!’ Pinepine atoa vau i te iteraa i te taata i te taˈi a mataitai ai ratou i te tahi video na roto i to ratou reo.”

Ua mauruuru roa te hoê vahine e paraparau ra i te reo Cri i te video No te aha e haapii ai i te Bibilia? na roto i to ˈna iho reo tumu. Ua parau oia e mai te huru ra e o to ˈna mama te paraparau ra ia ˈna.

Mea rahi te mau Ite no Iehova tei rave i te mau tutavaraa taa ê no te faaite i te poroi Bibilia tamahanahana mau i te mau taata tumu. Te haamanaˈo ra Terence raua ta ˈna vahine, Orlean: “Ua haere maua e te tahi atu e poro i te hoê pǔpǔ parauhia Little Grand Rapids. Ua faahoro matou 12 hora na nia i te mau purumu mea atâta no te pape paari. Auê te oaoa ia ite i to ratou fariiraa mai!”

Ua faarue atoa vetahi i to ratou nohoraa au mau no te ora i rotopu i teie mau pǔpǔ taata. Ua poro Daniel raua ta ˈna vahine, LeeAnn, e toru avaˈe i te motu Manitoulin. I muri aˈe, ua faaoti raua i te noho roa i ǒ. Ua faataa Daniel: “Mea au roa na maua ia rave i te taime no te tauturu atu ia farii ia matou e no te faatupu i te anaanatae.”

No te aha te mau Ite no Iehova e rave ai i te mau tutavaraa taa ê no te poro i te mau taata tumu? Te faataa ra Rose, te vahine a Bert: “E taata tumu atoa vau e ua faufaahia vau i te faaohiparaa i te mau aratairaa Bibilia. E turai te reira ia ˈu ia tauturu ia vetahi ê.”

Te na ô ra Orlean: “Te hinaaro nei au ia aratai atoa te Atua poiete i te mau taata Cri. E fanaˈoraa taa ê ia tauturu ia vetahi ê ia haafatata ˈtu ia Iehova e ia faaruru i te mau fifi.”

Te ohipa nei Marc e te pǔpǔ huriraa Pied-noir. No te aha oia i poro ai i te mau taata tumu o te tuhaa fenua? Te pahono ra oia: “No te mea te here mau nei au ia ratou.”