E aufauhia te rahiraa o te mau haamâuˈaraa taaihia i ta matou ohipa pororaa na te ao maoti te mau ô horoa noa a te mau Ite no Iehova. a Te vai ra te mau afata ô i ta matou mau vahi putuputuraa. Ua faataahia e nafea ˈtu â e horoa i te ô i nia i ta matou api: Te mau ô. E nehenehe e horoa i te ô no ta matou ohipa na te ao aore ra no te mau haamâuˈaraa no ǒ nei aore ra no na haamâuˈaraa toopiti.

 Eita e titauhia ia horoa te mau Ite no Iehova i te hoê tuhaa moni taa maitai ia au i ta ratou moni ohipa. (Korinetia 2, 9:7) Aita e titauraa moni i ta matou mau putuputuraa. Aita atoa e aufauhia no te bapetizoraa, te hunaraa maˈi, te faaipoiporaa aore ra te tahi atu mau mea taaihia i te faaroo. Eita matou e imi i te moni ma te hoo atu i te mau faraoa monamona, te hoo-mâmâ-raa, te hauti bingo, te taviriraa, te tamaaraa e te tahi atu â mau tupuraa mai teie. Eita atoa matou e haere e ani i te mau ô. Eita roa ˈtu e faaitehia o vai tei horoa mai i te mau ô. (Mataio 6:2-4) Aita atoa ta matou reni natirara e ta matou mau papai e tuu ra i te mau parau faatianiani e aufauhia ˈi matou.

 E faaite te mau amuiraa a te mau Ite no Iehova i te tapura haamâuˈaraa i ta ratou putuputuraa i te avaˈe hoê. O te taata atoa te nehenehe e haere atu. E hiˈopoa-tamau-hia te tapura haamâuˈaraa a te mau amuiraa atoa ia papu e te faaohipa-maitai-hia ra te mau ô.—Korinetia 2, 8:20, 21.

•   Afata ô: E nehenehe oe e tuu i te moni aore ra parau moni i roto i te mau afata ô i te mau Piha a te Basileia, Piha tairururaa aore ra te tahi atu mau vahi i reira e faatupuhia ˈi te mau putuputuraa.

•   Ô i nia i te natirara: I te fenua e rave rahi, e nehenehe e haere i nia i te api natirara “Pûpû i te ô na te mau Ite no Iehova” no te horoa i te ô maoti te tareta moni, mai to oe vairaa moni atu aore ra te tahi atu ravea. b E maiti vetahi mau Ite no Iehova i te ‘tuu i te moni i te hiti’ i te avaˈe tataitahi ma te faanaho ia tuuhia iho â te tino moni faataahia i nia i te vairaa moni no te mau ô a te mau Ite no Iehova.—Korinetia 1, 16:2.

•   Ô faanaho-aˈena-hia: E titau te tahi mau ravea ia faanaho aˈena e ia pee i te mau aˈoraa i te pae o te ture. E nehenehe atoa ta oe tute e iti mai i to oe fenua. Ua na reira e rave rahi taata ma te ite atu â no nia i te mau ô te nehenehe e horoahia a ora noa ˈi aore ra a pohe ai. No te ite atu â, a taniuniu atu i te piha ohipa a te mau Ite no Iehova ia hinaaro oe e horoa i te ô na roto i:

  •   te vairaa moni i te fare moni

  •   te parau parururaa e parau tutuu

  •   te mau fare aore ra fenua

  •   te mau faufaa

  •   te mau faufaa maraa ore

No te ite atu â no nia i te mau ravea no te horoa i te mau ô i to outou vahi, a hiˈo i te api “Pûpû i te ô na te mau Ite no Iehova.”