Te ino noa ˈtura te huru o te taata. Ei hiˈoraa, mea tutuô te feia maˈi i nia i te taote. Mea faatura ore te mau hoani i te mau tuati fare tamaaraa. E taparahi te mau horopatete i te mau tuati manureva. Mea ino roa te mau tamarii i te fare haapiiraa. E faaooo e e haamǎtaˈu ratou i te mau orometua haapii. E ohipa tano ore atoa ta vetahi mau tia poritita e rave nei area te tahi atu, te faahua nei ïa i te haa ma te hamani maitai.

 E horoa te Bibilia i te aratairaa papu no nia i te haerea tano. E faataa atoa te Bibilia no te aha ua ino roa te huru o te taata i teie nei mahana.

 Na te ao nei, te itehia ra e aita to te taata e peu maitai faahou.

•   Ia au i te hoê uiuiraa manaˈo i te fenua Marite, te manaˈo ra te feia e ora ra i ǒ e mea iti roa te taata e faatura ra te tahi i te tahi ia faaauhia i na 22 matahiti mairi aˈenei.

•   Ua uiuihia hau atu 32 000 taata i roto e 28 fenua. E 65 i nia i te hanere tei parau e ua ino roa te huru o te taata. Aita te reira i itehia aˈenei tae roa mai i teie mahana.

 Ua tohu te Bibilia no nia i te haerea o te taata i teie mahana.

•   “E tupu te ati rahi i taua anotau hopea nei, ia ite mai oe. E riro te taata nei ei miimii, e nounou moni, e faaahaaha, e teoteo, e faaino, e faaroo ore i te metua, e mauruuru ore, . . . e haapao ore, e iria.”—Timoteo 2, 3:1-3, Te Bibilia Moˈa ra.

 No te ite atu â mea nafea teie parau tohu i te tupuraa, a taio i te tumu parau “Ua tohu anei te Bibilia i nia i te huru feruriraa e haaraa o te mau taata i teie mahana?”

 Ua ino roa te huru o te taata i roto i teie nei ao, ua faufaahia râ e mirioni taata i te aratairaa a te Bibilia. E horoa te Bibilia i te aˈoraa papu e “e nehenehe iho â e tiaturihia, i teie nei e a muri noa ˈtu.” (Salamo 111:8) Teie mai te tahi mau aratairaa:

•   Ta te Bibilia e parau ra: “Te mau mea atoa ïa ta outou e hinaaro ia rave te taata no outou, a rave atoa ïa no ratou.”—Mataio 7:12.

   Auraa: Ia faatura e ia hamani maitai tatou ia vetahi ê e tia ˈi. Ta tatou atoa ïa e hinaaro nei.

•   Ta te Bibilia e parau ra: “I teie nei hoi ua haapae outou i te haavare, ia parau noa ïa te taata tataitahi i te parau mau i to ˈna taata tupu.”—Ephesia 4:25.

   Auraa: Ei haerea afaro noa to tatou e tia ˈi.

 No te ite atu â no nia i teie tumu parau, a taio i:

•   Te Pare Tiairaa “Te maitai e te ino: Aratairaa ta oe e nehenehe e tiaturi.”

•   Te tumu parau “Faaturaraa i te taa-ê-raa o vetahi ê: E nafea te Bibilia e tauturu mai ai?”