Exodo 24:1-18
24 Na ô maira oia ia Mose: “A pauma ia Iehova ra, orua Aarona, Nadaba raua Abihu,+ e e 70 matahiapo o Iseraela, e a piˈo i raro i te atea ê.
2 E faafatata Mose ia Iehova o ˈna anaˈe, eiaha râ te tahi atu ia faafatata ˈtu, e eiaha te nunaa ia pauma na muri ia ˈna.”+
3 Haere atura ïa Mose e faatia ˈtura i te nunaa pauroa te parau a Iehova e pauroa te faaotiraa haavaraa.+ Pahono maira te nunaa taatoa ma te reo hoê: “Pauroa ta Iehova i parau, e hinaaro matou e rave.”+
4 Papai ihora ïa Mose pauroa te parau a Iehova.+ Tia aˈera oia i nia i te poipoi roa e hamani ihora i te hoê fata i te tumu mouˈa, e oia atoa 12 pou ia au i na 12 opu o Iseraela.
5 I muri iho, tono ihora oia vetahi tane Iseraela apî, e pûpû aˈera ratou i te tusia taauahi e te puaatoro oni ei tusia no te hau+ ia Iehova.
6 Rave maira Mose i te afaraa o te toto, tuu ihora i roto i te auˈa, e pîpî atura i te fata i te afaraa o te toto.
7 Rave maira oia i te buka o te faufaa e taio haapuai atura i te reira i te nunaa.+ Parau maira ratou: “Pauroa ta Iehova i parau e hinaaro matou e rave, e e auraro atu matou.”+
8 Rave maira ïa Mose i te toto, pîpî atura i nia i te nunaa+ e parau atura: “Teie te toto o te faufaa ta Iehova i faaau ia outou ia au i teie mau parau atoa.”+
9 Pauma aˈera Mose raua Aarona, Nadaba raua Abihu, e e 70 matahiapo o Iseraela,
10 e ite aˈera ratou i te Atua o Iseraela.+ Mai te mea ra e eˈa ofai saphira to raro aˈe i to ˈna avae, e mea anaana te reira mai te raˈi te huru.+
11 Aita oia i hamani ino i teie mau tane faaturahia o Iseraela.+ Ite orama aˈera ratou i te Atua mau, e tamaa e inu aˈera ratou.
12 Na ô maira Iehova ia Mose: “A pauma mai ia ˈu nei i nia i te mouˈa e a faaea i ǒ nei. E horoa vau ia oe i na pǎpǎ ofai e te ture ta ˈu e papai no te haapii ia ratou.”+
13 Tia aˈera Mose raua Iosua ta ˈna tavini,+ e pauma aˈera Mose i nia i te mouˈa o te Atua mau.+
14 Ua parau râ oia i te mau matahiapo: “A tiai ia mâua i ǒ nei e ia hoˈi noa mai mâua.+ O Aarona raua Hura+ te faaea ia outou ra. Te taata e fifi to ˈna, ia haere ïa ia raua ra.”+
15 Pauma aˈera Mose i nia i te mouˈa a tapoˈi noa ˈi te ata i te reira.+
16 Faaea ihora to Iehova hanahana+ i nia i te mouˈa Sinai,+ e tapoˈi atura te ata i te reira e ono mahana. I te hitu o te mahana, pii maira oia ia Mose mai ropu mai i te ata.
17 I te hiˈoraa ˈtu te ati Iseraela, e au to Iehova hanahana i te hoê auahi ura i te tupuai mouˈa.
18 Tomo atura Mose i roto i te ata e pauma aˈera i nia i te mouˈa.+ Faaea ihora Mose i nia i te mouˈa e 40 ao e 40 po.+
