Isaia 40:1-31
40 “A tamahanahana, a tamahanahana i to ˈu nunaa,” te parau ra to outou Atua.+
2 “A paraparau i te aau o Ierusalema,*E a faaite ia ˈna ua oti ta ˈna ohipa titauhia,Ua faaorehia ta ˈna hapa.+
Na te rima o Iehova i faautua ia ˈna* no ta ˈna mau hara atoa.”+
3 E taata teie e tuô haere nei na te medebara:
“A faaineine i te eˈa o Iehova!+
A hamani i te tahi purumu rahi e te manina+ no to tatou Atua na roto i te medebara.+
4 Ia faateiteihia te mau peho atoa,E ia faahaehaahia te mau mouˈa e aivi atoa.
Ia haamaninahia te vahi puupuu,E ia riro te vahi ofaifai ei peho.+
5 E faaitehia te hanahana o Iehova,+E e ite te taata atoa i te reira,+Na te vaha hoi o Iehova i parau.”
6 Faaroo! Te parau ra te tahi: “A tuô!”
Te ui ra te tahi atu: “Eaha ta ˈu e tuô?”
“E aihere ota te mau taata atoa.
Mai te tiare o te fenua to ratou here taiva ore.+
7 E mǎrô te aihere ota,E maemae te tiare,+No te mea te puhi ra te aho* o Iehova i nia iho.+
Oia mau, e aihere ota noa te taata.
8 E mǎrô te aihere ota,E maemae te tiare,E vai noa râ te parau a to tatou Atua e a muri noa ˈtu.”+
9 A pauma i nia i te tahi mouˈa teitei,Oe te vahine e hopoi mai i te parau apî oaoa no Ziona.+
A faateitei i to oe reo ma te puai,Oe te vahine e hopoi mai i te parau apî oaoa no Ierusalema.
A faateitei i to oe reo, eiaha e mǎtaˈu.
A faaite i te mau oire o Iuda: “Teie to outou Atua.”+
10 Inaha, e tae mai te Arii hau ê e Fatu ra o Iehova ma te puai,E na to ˈna rima e faatere no ˈna.+
A hiˈo na, tei ia ˈna ra ta ˈna haamaitairaa,E tei mua ia ˈna te aufauraa ta ˈna e aufau.+
11 Mai te tiai e aupuru* ai oia i ta ˈna nǎnǎ.+
I to ˈna rima e haaputu ai oia i te mau fanauˈa mamoe,E i nia i to ˈna ouma e amo ai oia ia ratou.
E aratai mǎrû noa oia i te maiaa e ta ratou mau fanauˈa.+
12 O vai tei faito i te pape i roto i to ˈna apu rima+E tei faito i te raˈi i te tiapana* o to ˈna rima?
O vai tei haaputu i te repo o te fenua i roto i te farii faito+Aore ra tei faito i te teiaha o te mau mouˈaE to te mau aivi?
13 O vai tei faito* i te varua o Iehova,E o vai te nehenehe e haapii e e aˈo atu ia ˈna?+
14 O vai ta ˈna i ani i te manaˈo ia rahi atu â to ˈna maramarama,O vai te haapii ia ˈna i te eˈa o te parau-tia,Aore ra te haapii ia ˈna i te ite,Aore ra te faaite ia ˈna i te eˈa o te maramarama mau?+
15 Inaha, e au te mau nunaa i te topata pape i roto i te hoê patete,E mai te huˈa repo i nia iho i te faito ia hiˈohia ratou.+
Inaha, e amo oia i te mau motu mai te huˈa repo.
16 Eita atoa o Lebanona e navai ia ama noa te auahi,*E eita to reira mau animara e navai no te tusia taauahi.
17 Pauroa te nunaa i mua ia ˈna mai te huru ra aita ratou.+E hiˈo oia ia ratou mai te tahi mea faufaa ore, mai te huru ra aita ratou.+
18 E faaau outou i te Atua ia vai?+
O vai te hohoˈa ia ˈna i to outou manaˈo?+
19 E faatô te rimaî i te idolo,E tapiri te taata tupai auri i te auro i nia iho,+E e tupai oia i te fifi ario.
20 E maiti oia i te tahi tumu raau no ta ˈna ô,+E tumu raau o te ore e pê.
E imi oia i te hoê rimaî aravihiNo te tarai i te tahi tii o te ore e marua.+
21 Aita anei outou i ite?
Aita anei outou i faaroo?
Aita anei i parauhia ia outou mai te haamataraa mai?
Aita anei outou i taa mai te haamauraahia mai te niu o te fenua?+
22 Te vai ra hoê o te parahi ra i nia ˈˈe i te menemeneraa o te fenua,+E e au te mau taata e parahi ra i nia iho i te vivi.
Te huti ra oia i te raˈi mai te tahi ahu rairai,E te hohora ra oia i te reira mai te tahi fare ie ia parahi i roto.+
23 E faariro oia i te mau tia mana ei mea faufaa ore,E te mau haava* o te fenua mai te huru ra aita ratou.
24 No tanu-noa-hia ˈtu ra ratou,No ueue-noa-hia ˈtu ra ratou,Aita â to ratou aˈa i toro roa ˈtura i raro i te fenua,E puhihia ratou a mǎrô atu ai,E e pee ratou i te mataˈi mai te sitona mǎrô.+
25 “O vai ta outou e faaau ia ˈu, ia aifaito vau ia ˈna?” te parau ra Tei Moˈa.
26 “A fariu i to outou mata i te raˈi e a hiˈo.
Na vai i poiete i teie mau mea?+
Na Tei aratai ra ia ratou mai te hoê nuu.E pii oia ia ratou pauroa i to ratou iˈoa.+
No to ˈna mana rahi mau e to ˈna puai faahiahia,+Aita hoê o ratou i moˈe.
27 Eaha oe e parau ai, e Iakoba, e eaha oe e na ô ai, e Iseraela:‘Aita Iehova e ite ra i to ˈu haerea,E aita te Atua e tâuˈa ra i te mau ohipa tano ore ta ˈu e faaruru ra’?+
28 Aita anei oe i ite? Aita anei oe i faaroo?
E Atua mure ore Iehova tei poiete i te mau mea atoa i nia i te fenua.+
E ore roa oia e rohirohi aore ra e paruparu.+
Eita to ˈna ite e noaa ia imihia.*+
29 E horoa oia i te puai i tei rohirohiE te itoito rahi i tei ere ra i te puai.*+
30 E rohirohi e e paruparu te mau tamaroa,E turori e e topa te mau tane apî,
31 E puai-faahou-hia râ te feia e tiaturi ra ia Iehova.
E pee ratou mai te huru ra e pererau to ratou mai te aeto.+
E horo ratou e eita e paruparu.E haere ratou e eita e rohirohi.”+
Nota i raro i te api
^ Aore ra “ia Ierusalema ma te tamahanahana.”
^ Aore ra “tataipiti i ta ˈna utua.”
^ Aore ra “varua.”
^ Aore ra “faaamu.”
^ 1 tiapana: 22,2 cm. Hiˈo i te tuhaa hau B14.
^ Huri-atoa-hia “taa.”
^ Aore ra “Eita atoa e navai te raau i Lebanona ei vahie.”
^ Aore ra “faatere.”
^ Aore ra “faitohia.”
^ Aore ra “mana rahi.”
