Levitiko 6:1-30
6 Na ô faahou maira Iehova ia Mose:
2 “Ia hara te hoê taata e ia taiva oia ia Iehova+ ma te haavare i to ˈna taata tupu no nia i te tahi mea tei horoahia ia ˈna,+ aore ra te tahi mea tei vaiihohia ia ˈna, aore ra ia eiâ oia aore ra ia taviri oia i to ˈna taata tupu,
3 aore ra ia itea mai ia ˈna te tahi mea tei moˈe a haavare atu ai no nia i te reira, e ia horeo oia ma te haavare no nia hoê o taua mau hara ra ta ˈna paha i rave,+ ia na ô ïa oia:
4 Ua hara anaˈe oia e ua hapa, e faahoˈi oia i ta ˈna i eiâ, ta ˈna i taviri, ta ˈna i rave na roto i te haavare, tei horoahia ˈtu ia ˈna, aore ra te mea tei moˈe ua itea mai ia ˈna,
5 aore ra ta ˈna i horeo ma te haavare, e faahoˈi pauroa oia i te reira,+ e e horoa atoa oia hoê tuhaa i nia e pae o to ˈna hoo. E horoa oia i te reira i te fatu i te mahana e haapapuhia ˈi e ua hapa oia.
6 E ei tusia na ˈna no te hapa, e hopoi oia ia Iehova i te hoê mamoe oni oraora maitai no roto i te nǎnǎ ia au i te hoo faataahia, no te hoê tusia no te hapa.+ E hopoi oia i te reira i te tahuˈa.
7 E pûpû te tahuˈa i te tusia faahau no ˈna i mua ia Iehova e e faaorehia te mau mea atoa ta ˈna i rave a hapa ˈtu ai oia.”+
8 Paraparau noa maira Iehova ia Mose a na ô ai:
9 “A faaue ia Aarona e ta ˈna mau tamaiti a parau ai: ‘Teie te ture o te tusia taauahi:+ E vai noa te tusia taauahi i nia i te auahi i nia i te fata i te po taatoa e poipoi noa ˈtu, e e tahu-noa-hia te auahi i nia i te fata.
10 E oomo te tahuˈa i to ˈna ahu tahuˈa lino,+ e e oomo o ˈna i te piripou poto lino+ no te tapoˈi ia ˈna. I muri iho, e tatara oia i te rehu*+ o te tusia taauahi tei pau i te auahi i nia i te fata, a tuu atu ai i pihai iho i te fata.
11 I muri iho, e tatara oia i to ˈna mau ahu+ e e oomo oia i te tahi atu mau ahu, a hopoi atu ai i te rehu i te hoê vahi viivii ore i rapaeau i te puhapa.+
12 E tahu-noa-hia te auahi i nia i te fata. Eiaha te reira ia pohe. E tutui te tahuˈa i te vahie+ i nia i te reira pauroa te poipoi e e faanaho oia i te tusia taauahi na nia iho, e e tutui oia i te mii o te mau tusia no te hau a au auahi atu ai i nia iho.+
13 E tahu-tamau-noa-hia te auahi i nia i te fata. Eiaha te reira ia pohe.
14 “‘I teie nei, teie te ture o te tusia huero maa:+ E hopoi mai te mau tamaiti a Aarona i te reira i mua ia Iehova i mua i te fata.
15 E rave hoê o ratou i te faraoa ota oro-maitai-hia o te tusia huero maa ia î hoê rima, e maa hinu e pauroa te tapau libano to nia iho i te tusia huero maa, e e tutui oia i te reira a au auahi atu ai i nia i te fata ei mea hauˈa noˈanoˈa au maitai* no Iehova no te hoê tusia taipe.*+
16 E amu Aarona e ta ˈna mau tamaiti i tei toe mai.+ E amuhia te reira ei pane hopue ore i te hoê vahi moˈa. E amu ratou i te reira i roto i te aua o te tiahapa o te amuiraa.+
17 Eiaha te reira ia tunuhia e te tahi mea hopue.+ Ua horoa vau i te reira na ratou ei tuhaa o ta ˈu mau tusia pûpûhia na roto i te auahi.+ Mea moˈa roa te reira,+ mai te tusia no te hara e mai te tusia no te hapa.
18 Pauroa te tane no roto i te mau tamaiti a Aarona te amu i te reira.+ O ta ratou ïa tuhaa vai tamau e hope noa ˈtu to outou mau uˈi o te mau tusia pûpûhia ia Iehova na roto i te auahi.+ Pauroa te mea i faaohipahia no taua mau tusia ra, e riro ïa ei mea moˈa.’”
19 Paraparau faahou maira Iehova ia Mose:
20 “Teie te tusia ta Aarona e ta ˈna mau tamaiti e hopoi mai ia Iehova i te mahana e faatavaihia ˈi oia:+ hoê tuhaa i nia ahuru o te hoê epha*+ faraoa ota oro-maitai-hia ei tusia huero maa tamau,+ te afaraa i te poipoi e te afaraa i te ahiahi.
21 E anoihia te reira i te hinu, a farai-pani-hia ˈtu ai.+ E anoi maitai oe i te reira i te hinu, a hopoi mai ai i te tusia huero maa tunuhia tei ofatifatihia ei mea hauˈa noˈanoˈa au maitai* no Iehova.
22 E na reira te tahuˈa faatavaihia o te mono ia ˈna no roto i ta ˈna mau tamaiti.+ E faaueraa vai maoro teie: Ei tusia taatoa te tutuihia a au auahi atu ai no Iehova.
23 Ei tusia taatoa pauroa te tusia huero maa no te hoê tahuˈa. Eiaha te reira ia amuhia.”
24 Paraparau faahou maira Iehova ia Mose e na ô maira:
25 “A parau ia Aarona e ta ˈna na tamaiti: ‘Teie te ture o te tusia no te hara:+ I te vahi i tupaihia ˈi te tusia taauahi+ e tupai-atoa-hia ˈi te tusia no te hara i mua ia Iehova. Mea moˈa roa te reira.
26 E amu te tahuˈa o te pûpû i te tusia no te hara i te reira.+ E amuhia te reira i roto i te hoê vahi moˈa, i roto i te aua o te tiahapa o te amuiraa.+
27 “‘E riro pauroa te mea i faaohipahia no taua animara ra ei mea moˈa, e ia pahi maa toto o taua animara ra i nia i te ahu o te tahi taata, e horoi oe i tei pahi i te toto i roto i te hoê vahi moˈa.
28 E tupararihia te farii araea i vaipâhia ˈi te reira. Ia vaipâhia râ te reira i roto i te hoê farii veo, e uiuihia taua farii ra e e horoihia i te pape.
29 “‘Pauroa te tane e tavini ra ei tahuˈa te amu i ta ratou tuhaa o te tusia.+ Mea moˈa roa te tusia no te hara.+
30 Teie râ, eiaha te tusia no te hara e amuhia mai te peu e ua hopoihia maa vahi o to ˈna toto i roto i te tiahapa o te amuiraa no te pûpû i te tusia faahau i roto i te vahi moˈa.+ E taninahia te reira.
Nota i raro i te api
^ Aore ra “rehu mii,” oia hoi e rehu anoihia e te mii o te mau tusia.
^ Aore ra “tamǎrû.” Heb: “faahau.”
^ Aore ra “ei tuhaa (taipe) haamanaˈoraa o te reira.”
^ 1/10 epha: 2,2 L. Hiˈo i te tuhaa hau B14.
^ Aore ra “tamǎrû.” Heb: “faahau.”
