Te faatiaraa a Mareko 1:1-45
-
Poro ra Ioane Bapetizo (1-8)
-
Bapetizoraa o Iesu (9-11)
-
Faahemahia Iesu e Satani (12, 13)
-
Haamata Iesu i te poro i Galilea (14, 15)
-
Piihia te mau pǐpǐ matamua (16-20)
-
Tiavaruhia te hoê varua viivii (21-28)
-
Faaora Iesu e rave rahi maˈi i Kaperenaumi (29-34)
-
Pure ra Iesu i te hoê vahi moˈemoˈe (35-39)
-
Faaorahia te hoê lepera (40-45)
1 Te omuaraa o te parau apî oaoa no nia ia Iesu Mesia, te Tamaiti a te Atua:
2 Mai tei papaihia i roto i te buka a Isaia te peropheta: “(Inaha, te tono nei au i ta ˈu vea na mua ia oe,* na ˈna e faaineine i te eˈa no oe.)+
3 E taata teie e tuô haere nei na te medebara: ‘A faaineine i te eˈa no Iehova!* A haamanina i to ˈna purumu.’”+
4 Ua haere Ioane Bapetizo i te medebara e poro i te taata ia bapetizohia ratou ei faaiteraa i to ratou tatarahapa ia faaorehia ta ratou mau hara.+
5 Haere maira to te fenua o Iudea e to Ierusalema taatoa ia Ioane ra, e bapetizohia* ihora ratou e ana i roto i te anavai Ioridana, a faˈi ai ratou i mua i te taata atoa i ta ratou mau hara.+
6 E ahu huruhuru kamela to Ioane e e hatua to nia i to ˈna tauupu.+ E ta ˈna maa, e vivi ïa e te meri.+
7 E te poro ra oia a parau ai: “Te haere mai nei i muri aˈe ia ˈu te hoê taata e mana rahi aˈe to ˈna i to ˈu, e ore hoi e tia ia ˈu ia tatara i te taamu o to ˈna tiaa.+
8 I bapetizo na vau ia outou i te pape, area oia, e bapetizo ïa ia outou i te varua moˈa.”+
9 I taua mau mahana ra, na Nazareta i Galilea mai o Iesu e bapetizohia ˈtura oia e Ioane i roto i te anavai Ioridana.+
10 I reira iho, i to ˈna haereraa mai i nia, mai raro mai i te pape, ite aˈera Iesu i te raˈi i te matararaa, e te varua moˈa i te pouraa mai i nia ia ˈna mai te uupa ra.+
11 E faaroohia maira te hoê reo mai te raˈi mai i te na ôraa: “O ta ˈu Tamaiti oe, tei herehia. Ua mauruuru roa vau ia oe.”+
12 E i reira iho, aratai atura te varua moˈa ia ˈna i te medebara.
13 Faaea ˈtura oia i te medebara i rotopu i te mau animara oviri e 40 mahana, faahema ihora Satani ia ˈna.+ Aupuru maira râ te mau melahi ia Iesu.+
14 I muri aˈe i to Ioane tapearaahia, haere atura Iesu i Galilea+ e poro i te parau apî oaoa a te Atua+
15 a na ô ai: “Ua tae mai te tau faataahia, e ua fatata mai te Faatereraa arii a* te Atua. A tatarahapa+ e a tiaturi i te parau apî oaoa.”
16 Te haere ra Iesu na te pae miti o Galilea, ite atura oia ia Simona e ia Anederea+ te taeae o Simona, te taora ra i ta raua upeˈa,+ e ravaai hoi raua.+
17 Na ô atura Iesu ia raua: “A pee mai ia ˈu, e faariro vau ia orua ei ravaai taata.”+
18 I reira iho, vaiiho aˈera raua i ta raua upeˈa e pee maira ia ˈna.+
19 Haere atura Iesu i mua ˈtu â, ite ihora oia ia Iakobo e to ˈna taeae o Ioane na tamaiti a Zebedaio i roto i to raua poti, te tafai ra i te upeˈa.+
20 Pii ihora oia ia raua. Vaiiho aˈera raua i to raua metua tane o Zebedaio i roto i te poti e ta ˈna mau rave ohipa, e pee maira ia Iesu.
21 Haere atura ratou i Kaperenaumi.
Tae aˈera i te Sabati, tomo ihora Iesu i roto i te sunago e haapii atura i te taata.+
22 E maere ihora ratou i ta ˈna huru haapiiraa, te haapii ra hoi oia ia ratou mai te hoê taata e mana to ˈna, eiaha râ mai te mau papai parau.+
23 I tera iho â taime, i roto i ta ratou sunago, tuô maira te hoê tane tei uruhia e te hoê varua viivii:
24 “Eaha ta oe ohipa i ǒ nei, Iesu no Nazareta?+ Ua haere mai oe e haamou ia matou? Ua ite maitai au o vai oe, te tavini Moˈa a te Atua!”+
25 Tamaˈi ihora râ Iesu ia ˈna, a na ô ai: “Mamû, haere i rapae ia ˈna!”
26 Rave aˈera te varua viivii e ia iriti e ia tuô tera tane e haere maira i rapae.
27 Maere roa ihora te taata e haamata aˈera i te paraparau te tahi i te tahi: “Eaha teie? E haapiiraa apî! E mana to ˈna e tiavaru atoa i te mau varua viivii e e faaroo ratou ia ˈna.”
28 Atutu atura te parau no ˈna e no ta ˈna i rave na te mau vahi atoa o te tuhaa fenua o Galilea.
29 Faarue aˈera ratou i te sunago e haere atura i te fare o Simona raua Anederea, e o Iakobo raua Ioane.+
30 Te tarava noa ra te metua vahine hoovai o Simona+ no te fiva, o ta ratou ïa i faaite oioi atu ia Iesu.
31 Tapiri atura oia i te vahine ra, faatia aˈera ia ˈna i nia ma te tapea i to ˈna rima. Pee atura te fiva e faaineine ihora te vahine i te maa na ratou.
32 E ahiahi ihora, ua topa hoi te mahana, arataihia maira ia ˈna te feia maˈi atoa e tei uruhia e te demoni,+
33 e putuputu aˈera to te oire atoa i mua noa i te opani.
34 Faaora ˈtura oia e rave rahi taata ua rau to ratou maˈi,+ e tiavaru atoa ˈtura e rave rahi demoni ma te faaue atu ia mamû, ua ite hoi ratou e o ˈna te Mesia.*
35 I te aahiata, te poiri noa ra hoi, tia aˈera Iesu, haere atura i rapae i te hoê vahi moˈemoˈe e pure atura.+
36 Paimi maira râ Simona ma ia ˈna,
37 ite aˈera ia ˈna e na ô maira: “Te imi nei te taata atoa ia oe.”
38 Na ô atura râ oia: “Mai, haere anaˈe i te tahi atu vahi, i roto i te mau oire tapiri, ia poro atoa vau i ǒ, no reira hoi au i haere mai ai.”+
39 Haere atura oia e poro i roto i te mau sunago e ati aˈe Galilea a tiavaru atoa ˈi i te mau demoni.+
40 Haere atoa maira te hoê lepera, taparu maira ia Iesu ma te tuturi e parau maira: “Ia tia ia oe, e nehenehe oe e tamâ ia ˈu.”+
41 Aroha ihora Iesu ia ˈna, toro atura i to ˈna rima, tapea ihora ia ˈna e na ô atura: “E tia ia ˈu! Ia mâ oe.”+
42 Pee ihora te lepera e mâ ˈtura oia.
43 Hou Iesu a tuu ai ia ˈna, horoa ˈtura oia i te tahi mau faaueraa papu
44 a parau ai ia ˈna: “Haapao maitai, eiaha e faaite i te taata, a haere râ e faaite ia oe i te tahuˈa e a pûpû i te ô ta Mose i faaue+ ei haapapuraa e ua mâ to oe lepera, ia ite ratou.”+
45 I to ˈna râ revaraa, faatia haere atura te tane i ta Iesu i rave. Aita ˈtura Iesu i nehenehe e tomo atu i roto i te hoê oire, ua faaea râ i rapae i te mau vahi moˈemoˈe. Mea rahi râ tei haere mai ia ˈna no te mau vahi atoa.+
Nota i raro i te api
^ Hel: “i mua i to aro.”
^ Hiˈo i te tuhaa hau A5.
^ Aore ra “Basileia o.”
^ Huri-atoa-hia “ua ite hoi ratou o vai oia.”
