Te faatiaraa a Mareko 9:1-50

FAAROO NA ROTO TE REO

Faahuru-ê-raahia Iesu (1-13)
Faaorahia te tamaroa uruhia e te demoni (14-29)
- E tia te mau mea atoa i te taata e faaroo to ˈna (23)
Tohu-faahou-hia to Iesu pohe (30-32)
Mârô te mau pǐpǐ o vai tei rahi aˈe (33-37)
Tei ore e patoi mai, te turu mai ra ïa (38-41)
Te mau turoriraa (42-48)
“Ia vai te miti papaa i roto ia outou” (49, 50)

9 Na ô atoa ˈtura Iesu ia ratou: “Oia mau ta ˈu e parau atu: Te vai ra vetahi o te feia i ǒ nei o te ore e pohe hou a ite ai na mua i te Faatereraa arii a* te Atua ia tae mai ma te mana.”+ ² E ono mahana i muri aˈe, rave ihora Iesu ia Petero, Iakobo e Ioane e aratai atura ia ratou i nia i te hoê mouˈa teitei o ratou anaˈe. Faahuru-ê-hia ihora Iesu i mua ia ratou,+ ³ anaana ˈtura to ˈna ahu e uouo roa aˈera. Aita hoi e taata puˈa ahu i te ao nei e noaa ia ˈna teie huru uouo. ⁴ Fa atoa maira o Elia raua Mose e te paraparau ra raua e o Iesu. ⁵ Na ô atura Petero ia Iesu: “Rabi, mea fanaˈo matou i te tiaraa mai i ǒ nei. Vaiiho na ia matou ia faatia e toru fare ie, hoê no oe, hoê no Mose e hoê no Elia.” ⁶ Aita hoi Petero i ite e nafea râ, ua mehameha roa hoi ratou. ⁷ Fa maira te hoê ata, tapoˈi ihora ia ratou, e na ô maira te hoê reo+ no roto mai i taua ata ra: “O ta ˈu Tamaiti teie, tei herehia.+ A faaroo ia ˈna.”+ ⁸ Hiˈo aˈera ratou ati aˈe, o Iesu anaˈe ta ratou e ite ra, aita ˈtu e taata. ⁹ A pou mai ai ratou mai nia mai i te mouˈa, faaue maitai ihora Iesu ia ratou eiaha e faaite i te taata i ta ratou i ite+ e ia tia roa mai te Tamaiti a te taata nei mai te pohe mai.+ ¹⁰ Tapea maite atura ratou i taua parau ra i roto i to ratou aau,* paraparau aˈera râ te tahi i te tahi no nia i te auraa o to ˈna tiaraa mai te pohe mai. ¹¹ Ui maira ratou ia ˈna: “No te aha te mau papai parau e na ô ai e o Elia+ na mua te haere mai?”+ ¹² Na ô atura oia: “O Elia iho â na mua te haere mai e e faahoˈi oia i te mau mea atoa mai i te matamua ra.+ No te aha râ i papaihia ˈi e e roohia te Tamaiti a te taata nei i te mauiui rahi+ e e vahavahahia oia?+ ¹³ Te parau atu nei râ vau e ua haere mai iho â Elia+ e ua rave ratou ia ˈna mai ta ratou i hinaaro, mai tei papaihia no nia ia ˈna.”+ ¹⁴ I te haereraa ˈtu Iesu, Petero, Iakobo e Ioane i te tahi atu mau pǐpǐ ra, ite aˈera ratou i te hoê nahoa rahi ati aˈe i taua mau pǐpǐ ra e te mau papai parau e mârô ra ia ratou.+ ¹⁵ I te iteraa mai iho â râ te nahoa ia Iesu, maere ihora ratou e horo maira e aroha ia ˈna. ¹⁶ Ui atura ïa oia: “Eaha ta outou e mârô nei i te mau pǐpǐ?” ¹⁷ Pahono maira te hoê o te nahoa: “Orometua, ua afai mai au i ta ˈu tamaiti ia oe nei, no te mea e varua to ˈna i vava ˈi oia.+ ¹⁸ I te mau taime atoa e uruhia ˈi oia, e taorahia oia i raro, e tahe to ˈna haae, e mauu to ˈna niho, a paruparu atu ai. Ua parau hoi au i ta oe mau pǐpǐ ia tiavaru i taua varua ra, aita râ i haere ia ratou.” ¹⁹ Na ô atura oia: “Auê ïa uˈi aita e faaroo,+ ehia â maororaa e parahi ai au ia outou nei? Ehia â maororaa e faaoromai ai au ia outou? Afai mai ia ˈna.”+ ²⁰ Afai maira ratou i te tamaroa. I to te varua râ iteraa mai ia Iesu, rave ihora oia e ia iriti te tamaroa. Topa ˈtura oia e taaviriviri ihora a tahe noa ˈi te haae. ²¹ Ui atura Iesu i te metua tane: “Mai afea mai â e na ô noa ˈi oia?” Parau maira te metua tane: “Mai to ˈna nainairaa mai â, ²² pinepine to te varua huriraa ia ˈna i roto i te auahi e i roto atoa i te pape ia pohe oia. Ia tia râ ia oe ia faaora ia ˈna, aroha mai na e a tauturu mai.” ²³ Na ô atura Iesu: “Eaha oe e parau ai: ‘Ia tia ia oe’? I te taata hoi e faaroo to ˈna, e tia ïa te mau mea atoa.”+ ²⁴ Tuô ihora te metua tane o te tamaiti a na ô ai: “E faaroo to ˈu! A tauturu mai ia rahi atu â to ˈu faaroo!”+ ²⁵ A ite ai Iesu e te haere ru mai ra te nahoa, tamaˈi ihora oia i te varua viivii a na ô ai: “Oe te varua i vava ˈi teie tamarii e i turi ai to ˈna tariˈa, te faaue nei au ia oe, a haere i rapae e eiaha e hoˈi faahou i roto ia ˈna.”+ ²⁶ Rave ihora te varua viivii e ia tuô e ia iriti roa te tamaiti e faarue maira. Tarava noa ˈtura te tamaiti mai te huru ra e ua pohe e na ô aˈera te rahiraa: “Ua pohe oia!” ²⁷ Rave ihora râ Iesu i to ˈna rima, faatia aˈera ia ˈna e tia aˈera oia. ²⁸ Tomo atura Iesu e ta ˈna mau pǐpǐ i roto i te hoê fare e ui maira ratou ia ˈna: “No te aha aita i haere ia matou ia tiavaru i te varua viivii?”+ ²⁹ Parau atura Iesu: “I te pure noa e faarue mai ai teie huru varua viivii.” ³⁰ Reva ˈtura ratou e haere atura na roto ia Galilea, aita râ Iesu i hinaaro ia ite te taata teihea oia. ³¹ I haapii na hoi oia i ta ˈna mau pǐpǐ e i parau atu na: “E tuuhia te Tamaiti a te taata nei i te rima o to ˈna mau enemi, e haapohe ratou ia ˈna,+ noa ˈtu râ e ua haapohehia, e tia mai oia i te toru o te mahana.”+ ³² Aita râ ratou i taa i ta ˈna i parau e ua taiâ ratou i te uiui ia ˈna. ³³ Haere atura ratou i Kaperenaumi. Tei roto Iesu i te fare i ui ai oia i ta ˈna mau pǐpǐ: “Eaha ta outou i mârô na a haere noa ˈi tatou na nia i te purumu?”+ ³⁴ Mamû noa ihora ratou, i mârô na hoi te tahi i te tahi na nia i te purumu o vai tei rahi aˈe. ³⁵ Parahi ihora Iesu, pii atura i na 12 ia tapiri mai e na ô atura: “O tei hinaaro ia rahi aˈe oia, ia haehaa roa ïa e ia riro ei tavini no te taata atoa.”+ ³⁶ Rave maira oia i te hoê tamarii, tuu atura ia ˈna i ropu ia ratou e a tapea ˈi i te tapono o taua tamarii ra, na ô atura: ³⁷ “Te taata o te farii hoê o teie mau tamarii+ no to ˈu nei iˈoa, e farii atoa ïa ia ˈu. E te taata o te farii ia ˈu, e farii ïa eiaha ia ˈu noa, i tei tono atoa mai râ ia ˈu.”+ ³⁸ Parau ihora Ioane ia Iesu: “Orometua, ua ite matou i te hoê taata i te tiavaruraa i te mau demoni ma te faaohipa i to oe iˈoa, e ua tamata matou i te tapea ia ˈna, no te mea e ere oia i te pǐpǐ na oe.”+ ³⁹ Na ô atura râ Iesu: “Eiaha e tamata i te tapea ia ˈna, aita hoi e taata e tia ia rave i te hoê ohipa mana ma to ˈu nei iˈoa, a faaino mai ai ia ˈu. ⁴⁰ Te taata hoi aita e patoi mai ra, te turu mai ra ïa.+ ⁴¹ Te taata hoi e horoa i te tahi auˈa pape na outou no te mea no te Mesia outou,+ oia mau ta ˈu e parau atu, e ore roa oia e ere i ta ˈna haamaitairaa.+ ⁴² Ia faaturori râ te tahi taata i te hoê o teie feia o te au i te tamarii, mea maitai aˈe ia taamuhia i nia i to ˈna aˈî te hoê ofai oro e hutihia na e te asini, a huri atu ai ia ˈna i raro i te moana.+ ⁴³ “Ia hapa oe no to oe rima, a tâpû ïa. Mea maitai aˈe ia tae atu oe i te ora ma te hoê noa rima, i te haere ma to oe rima i Gehena,* i roto i te auahi pohe ore.+ ⁴⁴ *—— ⁴⁵ E ia hapa oe no to oe avae, a tâpû ïa. Mea maitai aˈe ia tae atu oe i te ora ma te hoê noa avae, i te hurihia oe ma to oe na avae i Gehena.*+ ⁴⁶ *—— ⁴⁷ E ia hapa oe no to oe mata, a faarue atu.+ Mea maitai aˈe ia ô atu oe i roto i te Faatereraa arii a te Atua ma te hoê noa mata, i te hurihia oe ma to oe na mata i Gehena,*+ ⁴⁸ e ore te mau tuˈa e te auahi e pohe i reira.+ ⁴⁹ “E haamairihia te auahi i nia i tera huru taata atoa, mai te miti papaa e ueuehia i nia i te maa.+ ⁵⁰ Mea maitai roa te miti papaa, ia maaro râ te reira, e nafea ïa e avaava faahou ai?+ Ia vai te miti papaa i roto ia outou,+ e ia vai te hau i rotopu ia outou.”+