Salamo 106:1-48
-
Te mauruuru ore o te mau Iseraela
106 Ia aruehia Ia!*
A haamauruuru ia Iehova, mea maitai hoi oia.+E vai â to ˈna here taiva ore e a muri noa ˈtu.+
2 O vai te nehenehe e faaite i ta Iehova mau ohipa puai atoaAore ra e faaite i ta ˈna mau ohipa atoa e au ia aruehia?+
3 E oaoa te feia o te haa ma te parau-tia,O te rave noa i te mea tia.+
4 A haamanaˈo ia ˈu, e Iehova, ia faaite oe i to farii maitai* i to nunaa.+
A aupuru e a faaora mai ia ˈu,
5 Ia ite au i to maitai i nia i tei maitihia e oe,+Ia oaoa vau e to oe nunaa atoa,Ia arue au ia oe ma te haapeu* i pihai iho i ta oe tuhaa tutuuhia.
6 Ua hara matou mai to matou mau tupuna.+E mea ino ta matou i rave, e haerea ino ta matou i pee.+
7 Aita to matou mau tupuna i Aiphiti i taa i te auraa o ta oe mau ohipa faahiahia.
Aita ratou i haamanaˈo i to here taiva ore rahi,Ua orure hau râ ratou piri i te miti ra, te miti Uteute.+
8 Ua faaora râ oia ia ratou no to ˈna iˈoa,+Ia itehia to ˈna puai.+
9 Ua tamaˈi oia i te miti Uteute e mǎrô ihora te miti.Aratai atura oia ia ratou na te hohonuraa o te miti, mai te mea ra e mea na roto i te medebara.+
10 Faaora ˈtura oia ia ratou i te rima o to ratou enemi+E titau maira oia ia ratou i te rima ra o te enemi.+
11 Tapoˈi aˈera te pape i to ratou mau enemi,Aita hoê o ratou i ora mai.*+
12 Faatupu aˈera ratou i te faaroo i ta ˈna parau fafau.+Haamata aˈera ratou i te himene i te arueraa ia ˈna.+
13 Moˈe oioi atura râ ia ratou te ohipa ta ˈna i rave.+Aita ratou i tiai i ta ˈna aratairaa.
14 Rahi roa aˈera to ratou mau hinaaro miimii i roto i te medebara.+Tamata aˈera ratou i te Atua i roto i te medebara.+
15 Horoa ˈtura oia i ta ratou i ani,Tairi atura râ oia ia ratou i te tahi maˈi o tei haaparuparu e haapohe ia ratou.+
16 I te puhaparaa, pohehae ihora ratou ia MoseE ia Aarona,+ tei maitihia e Iehova.+
17 Hamǎmǎ aˈera te fenua, horomii aˈera ia DatanaE tapoˈi aˈera i te feia o tei amui atu ia Abirama ra.+
18 Ama aˈera te hoê auahi i ropu i ta ratou pǔpǔ.Pau aˈera te feia ino i te auahi.+
19 Hamani aˈera ratou i te hoê fanauˈa puaatoro i HorebaE tipapa aˈera i mua i te hoê tii faatôhia.*+
20 Rave e taui aˈera ratou i to ˈu hanahanaI te hohoˈa o te hoê puaatoro amu aihere.+
21 Haamoˈe aˈera ratou i te Atua+ to ratou Faaora,O tei rave i te ohipa faahiahia i Aiphiti,+
22 Te ohipa faahiahia i te fenua o Hama,+Te ohipa mǎtaˈu-rahi-hia i te miti Uteute.+
23 Fatata oia i te faaue ia haamouhia ratou,Area Mose o tei maitihia e ana, taparu ihora ïa oia ia ˈnaIa faatioi ê i to ˈna riri uˈana.+
24 Vahavaha aˈera ratou i te fenua nehenehe.+Aita ratou i faatupu i te faaroo i ta ˈna parau fafau.+
25 Mutamuta noa aˈera ratou i roto i to ratou mau fare ie.+Aita ratou i faaroo i te reo o Iehova.+
26 Amo aˈera oia i to ˈna rima i nia a horeo ai no nia ia ratouE e haapohe oia ia ratou i roto i te medebara,+
27 E tuu oia i to ratou mau huaai i te rima o te mau nunaaE e haapurara ê oia ia ratou na te mau fenua atoa ra.+
28 Apiti aˈera ratou i te haamoriraa* ia Baala no Peora,+E amu aˈera ratou i te tusia pûpûhia i tei pohe.*
29 Aa aˈera ratou ia ˈna i ta ratou mau ohipa,+E roohia ihora ratou i te ati.+
30 I to Phinehasa râ tiaraa no te rave i te ohipa tia,Ore atura te ati.+
31 Hiˈohia ˈtura oia ei taata parau-tiaE hope noa ˈtu te mau uˈi atoa.+
32 Aa aˈera ratou ia ˈna i te pape o Meriba,*E no ratou Mose i fifihia ˈi.+
33 Faariri aˈera ratou ia ˈna,Paraparau atura to Mose vaha ma te feruri ore.+
34 Aita ratou i haamou i te mau nunaa,+Mai ta Iehova i faaue ia ratou.+
35 Amui aˈera râ ratou i te mau nunaa ra+E pee aˈera* i to ratou mau haerea.+
36 Tavini noa aˈera ratou i ta ratou mau idolo,+E riro atura te reira ei marei no ratou.+
37 Ua pûpû ratou i ta ratou mau tamaitiE ta ratou mau tamahine ei tusia i te mau demoni.+
38 Tamau noa aˈera ratou i te haamanii i te toto hara ore,+Te toto o ta ratou mau tamaiti e tamahineO ta ratou i pûpû ei tusia i te mau idolo no Kanaana.+Viivii roa ˈtura te fenua i te toto i haamaniihia.
39 I ta ratou mau ohipa, ua viiviihia ratou.I ta ratou mau ohipa, ua rave ratou i te peu taiata pae varua.+
40 Ura ihora ïa te riri o Iehova i nia i to ˈna nunaa,E faufau roa ˈtura oia i ta ˈna tuhaa tutuuhia.
41 Mea pinepine oia i te tuu atu ia ratou i te rima ra o te mau nunaa,+Ia faaterehia ratou e te feia e hae ra ia ratou.+
42 Haavî ihora to ratou mau enemi ia ratouE vî ihora ratou i raro aˈe i to ratou mana.*
43 E rave rahi taime to ˈna faaoraraa ia ratou,+I orure hau na râ ratou a ore atu ai e faaroo,+E i faahaehaahia na ratou no ta ratou hape.+
44 I ite na râ oia i to ratou ahoaho,+I faaroo na oia i ta ratou aniraa i te tauturu.+
45 No ratou i haamanaˈo ai oia i ta ˈna faufaa,E no to ˈna here taiva ore rahi i tatarahapa ˈi oia.+
46 I turai na oia i te feia o tei rave tîtî ia ratou+Ia aroha ia ratou.
47 A faaora ia matou, e Iehova to matou Atua,+A haaputuputu ia matou i te mau nunaa ra+Ia faahanahana matou i to iˈoa moˈaE ia arue matou ia oe ma te oaoa.*+
48 Ia aruehia Iehova, te Atua o IseraelaE a muri noa ˈtu.+
Ia parau te nunaa taatoa: “Amene!”*
Ia aruehia Ia!*
Nota i raro i te api
^ Aore ra “Haleluia!” E haapotoraa “Ia” o te iˈoa Iehova.
^ Aore ra “hamani maitai.”
^ Aore ra “faatietie au ia oe.”
^ Aore ra “toe mai.”
^ Aore ra “faatahehia.”
^ Aore ra “Ati maite aˈera ratou.”
^ Oia hoi te mau tusia pûpûhia i te feia pohe aore ra atua ora ore.
^ “Tamaˈiraa” te auraa.
^ Aore ra “haapii maira.”
^ Heb: “rima.”
^ Aore ra “A oaoa ˈtu ai i te arueraa ia oe.”
^ Aore ra “Na reira ïa!”
^ Aore ra “Haleluia!” E haapotoraa “Ia” o te iˈoa Iehova.
