Ua taui te Bibilia i to ˈu oraraa

EAHA tei turai i te hoê taata Rasta ia tâpû i to ˈna rouru e ia upootia i nia i to ˈna manaˈo hape no te mau taata uouo? E eaha tei tauturu i te hoê taurearea ino o tei titau i te moni no te feia e hoo ra i te raau taero ia taui i to ˈna oraraa. A hiˈo eaha ta teie mau taata i parau.

“Ua faaruru vau i to ˈu mau manaˈo tano ore.”—HAFENI NGHAMA

MATAHITI: 34

FENUA: ZAMBIE

AAMU: TAATA RASTA

NA MUA ˈˈE: Ua fanauhia vau i roto i te hoê puhapa no te feia tei horo ê i Zambie. Ua horo ê to ˈu mama i Namibie i te tau tamaˈi e ua haere oia i roto i te Faanahoraa no te feia no Afirika apatoa tooa o te râ (SWAPO). E aro teie faanahoraa i te faatereraa no Afirika apatoa tei faatere ia Namibie i taua tau ra.

Ua ora vau i roto e rave rahi puhapa no te feia tei horo ê i tera roaraa o na 15 matahiti matamua o to ˈu oraraa. Ua faaineine te feia apî tei roto i te faanahoraa SWAPO, no te riro mai ei taata no te pǔpǔ faatiamâraa. Ua haapiihia matou ia hae i te feia uouo.

I te 11raa o to ˈu matahiti, ua hinaaro vau e rave i ta ˈu oroa tuuraa rima ei Kerisetiano i roto i te hoê fare pure no te puhaparaa, anoiraa o te Katolika Roma, Porotetani, haapaoraa Beretane e te tahi atu. Ua parau ra te orometua ia ˈu eiaha e rave i tera taahiraa. I muri iho i te reira, ua riro mai au ei taata i tiaturi na aita e Atua. I te 15raa o to ˈu matahiti, ua au roa vau te mau pehe reggae e ua hinaaro vau ia faaea te hamani-ino-raa no nia i te feia ereere, no reira ua faaô vau i roto i te hoê pǔpǔ Rasta. Ua firi au i to ˈu rouru, ua puhipuhi au i te avaava taero, ua faaea i te amu i te iˈo animara e ua turu vau i te tiamâraa no te feia ereere. Tera râ, aita vau i taui i to ˈu huru oraraa tia ore e i te mataitai i te hohoˈa teata haavî uˈana. E ua tamau noa na vau i te parau faufau.

UA TAUI TE BIBILIA I TO ˈU ORARAA: I 1995, i te 20raa o to ˈu matahiti, ua haamata vau i te feruri maite no nia i ta ˈu e hinaaro e rave no to ˈu oraraa. Ua haamata vau i te haapii i te mau papai atoa a te Rasta tei noaa mai ia ˈu. Ua faaau vau i te tahi o tera mau papai i te Bibilia, tera râ, aita e auraa to te mau haamaramaramaraa no ˈu. No reira, ua faaoti au i te taio i te Bibilia.

I muri iho, ua horoa mai te hoê hoa Rasta i te hoê buka haapiiraa, piahia na te mau Ite no Iehova. Ua haapii au i teie buka e te Bibilia. I muri iho, ua farerei au i te mau Ite no Iehova e ua tamau ta ˈu haapiiraa Bibilia e o ratou.

Ma te tutava, ua faaea vau i te puhipuhi i te avaava e i te inu hua i te ava. (Korinetia 2, 7:1) Ua taui au i to ˈu huru rapaeau, ua tâpû vau i to ˈu rouru, ua faaea i te mataitai i te hohoˈa teata faufau e te haavî uˈana e ua faaea vau i te parau faufau. (Ephesia 5:3, 4) Ua faaruru vau i to ˈu mau manaˈo tano ore i nia i te taata uouo. (Ohipa 10:34, 35) No te raveraa i teie mau tauiraa, ua titauhia ia ˈu ia faaea i te faaroo i te mau pehe tei faaitoito ra i te au-ore-raa i te tahi nunaa ê e ia faaea i te amuimui e to ˈu mau hoa tei tamata i te turai ia ˈu ia hoˈi faahou i to ˈu oraraa na mua ˈˈe.

I muri mai i teie mau tauiraa, ua imi au i te hoê Piha a te Basileia a te mau Ite no Iehova e ua ani ia apiti atu ia ratou ra. Ua faaterehia ïa ta ˈu haapiiraa Bibilia. I to ˈu faaotiraa i te bapetizo ia ˈu, mai te hoê o te mau Ite no Iehova, aita to ˈu utuafare i oaoa. Ua parau mai to ˈu mama e nehenehe au e maiti i te tahi atu mau haapaoraa “Kerisetiano” eiaha râ te mau Ite no Iehova. Ua tamau noa hoê o te taeae o to ˈu metua tane, e tiaraa teitei to ˈna i roto i te faatereraa, i te faahapahapa ia ˈu no ta ˈu faaotiraa e amuimuiraa e te mau Ite.

Tera râ, ua tauturu mai te haapiiraa i to Iesu huru i nia i te mau taata e i muri iho, te faaohiparaa i ta ˈna mau aˈoraa ia ˈu ia faaruru i te patoiraa e te faaoooraa. Ia faaau vau i ta te mau Ite e haapii ra e ta te Bibilia e parau ra, ua papu ia ˈu ua itehia mai ia ˈu te haapaoraa mau. Ei hiˈoraa, te pee nei ratou i te faaueraa Bibilia e poro ia vetahi ê. (Mataio 28:19, 20; Ohipa 15:14) E eita ratou e faaô i roto i te ohipa poritita.—Salamo 146:3, 4; Ioane 15:17, 18.

TO ˈU FAUFAARAAHIA: Ua tauturu mai te haapiiraa ia ˈu ia ora ia au i te mau ture aveia a te Bibilia i roto i te mau tupuraa atoa. Ei hiˈoraa, i to ˈu faaearaa i te puhipuhi i te avaava taero, aita vau i haamâuˈa faahou i te moni i te mau avaˈe atoa. Aita vau e aoaoa faahou ra e ua maitai mai to ˈu feruriraa e to ˈu ea.

I teie nei, e auraa e e fa to to ˈu oraraa mai ta ˈu i hinaaro mai to ˈu apîraa. Te vahi faahiahia roa ˈtu â, ua ite au e nehenehe ta ˈu e faafatata ˈtu i te Atua.—Iakobo 4:8.

“Ua haapii au i te haavî i to ˈu riri.”—MARTINO PEDRETTI

MATAHITI: 43

FENUA: AUTERALIA

AAMU: TAATA HOO I TE RAAU TAERO

NA MUA ˈˈE: Ua taui pinepine to ˈu utuafare i te vahi nohoraa i to ˈu nainairaa. Ua ora vau i roto i te hoê oire rii, te hoê oire rahi e no te hoê taime poto, i te outback no Auteralia e te mau aborigène. E haamanaˈoraa oaoa to ˈu i taua tau ra e to ˈu mau taeae fetii e te mau taeae o to ˈu metua vahine. E taiâ matou, e aˈuaˈu te animara, hamani te boomerang e e tarai te tahi mau mea.

E taata moto to ˈu papa e ua haamata oia i te haapii ia ˈu i te moto i to ˈu apîraa. Ua riro mai au ei taata ino mau. I to ˈu taurearearaa, e haere pinepine au i te mau fare inuraa no te inu. E imi hara noa na vau e to ˈu mau hoa. E faaohipa matou i te mau tipi e te mau raau no te aro i te hoê nahoa taata e 20 aore ra hau atu â taata.

Ua noaa mai ta ˈu moni ma te hoo i te raau taero e te taihaa eiâhia e te mau rave ohipa i te uahu. Ua titau atoa vau i te moni no te feia e hoo ra i te raau taero e e faariaria vau i te mau taata ma te faaohipa i te mau pupuhi. Ta ˈu fa, o te riroraa ïa ei taata haapohe taata. Mai tera to ˈu feruriraa, e haapohe aore ra e haapohehia vau.

UA TAUI TE BIBILIA I TO ˈU ORARAA: Ua faaroo vau no nia i te mau Ite no Iehova i to ˈu apîraa. I te 20raa o to ˈu matahiti te haamanaˈo nei au i to ˈu aniraa i to ˈu mama, ua ite anei oia teihea ra ratou. Piti mahana i muri iho, ua patoto mai hoê Ite o Dixon te iˈoa i to ˈu opani. I muri iho i to mâua aparauraa, ua titau manihini mai oia ia ˈu i te hoê putuputuraa a te mau Ite no Iehova. Ua haere au i teie putuputuraa e te apiti noa râ vau i teie mau putuputuraa ua hau atu e 20 matahiti i teie nei. Ua pahono te mau Ite i te mau uiraa atoa ta ˈu i ui maoti i te Bibilia.

Ua putapû roa vau, i to ˈu iteraa te tâuˈa mau ra Iehova i te taata tataitahi oia atoa te taata aita e tiaturi ra i te Atua. (Petero 2, 3:9) Ua ite au e Metua î i te here o ˈna o tei aupuru ra ia ˈu, noa ˈtu aita te tahi atu taata e na reira no ˈu. Ua mâmâ atoa vau i to ˈu iteraa e faaore oia i ta ˈu mau hara mai te peu e taui au i to ˈu haerea. Mea faufaa roa no ˈu te Ephesia 4:22-24. Ua tauturu mai teie mau irava ia ˈu “ia haapae te huru taata tahito” e ia “ahu mai i te huru taata apî tei poietehia ia au i te hinaaro o te Atua.”

Titauhia ia ˈu te taime no te taui i to ˈu huru oraraa. I te hebedoma, eita vau e rave i te raau taero, tera râ, i te hopea hebedoma ia amuimui au e to ˈu mau hoa, e rave ïa vau i te raau taero. Ua taa ia ˈu e titauhia ia faaatea ê i to ˈu mau hoa mai te peu e hinaaro vau e maitai mai to ˈu oraraa, no reira vau i faaoti ai e haere e noho i te tahi atu vahi. Ua apiti mai te tahi o to ˈu mau hoa i to ˈu tereraa e ua farii au. I te roaraa o te tere, ua haamata ratou i te puhipuhi i te raau taero e ua horoa atoa mai na ˈu. Ua parau vau ia ratou, ua faaea vau teie mau peu e ua vaiiho vau ia ratou i te otia fenua. Ua ite au tau taime i muri iho e ua haru ratou i te hoê fare moni ma te faaohipa i te pupuhi.

TO ˈU FAUFAARAAHIA: I to ˈu faaearaa i te amuimui e to ˈu mau hoa, ua ohie ïa vau i te rave i te mau tauiraa i roto i to ˈu oraraa. I 1989, ua riro mai au ei Ite bapetizohia. I muri i to ˈu bapetizoraahia, ua amui mai to ˈu tuahine, to ˈu mama e to ˈu papa no te tavini ia Iehova.

I teie nei, 17 matahiti to ˈu faaipoiporaa e e toru tamarii ta ˈu. Ua haapii au i te haavî i to ˈu riri, noa ˈtu e tamatahia vau. E ua haapii au i te here i te mau taata no “roto mai i te mau nunaa e opu e reo atoa.” (Apokalupo 7:9) Ua ite au, mea mau te mau parau a Iesu i roto i to ˈu tupuraa. Ua parau oia: “Ia haapao noa outou i ta ˈu parau, e pǐpǐ mau ïa outou na ˈu e e ite outou i te parau mau e na te parau mau e faatiamâ ia outou.”—Ioane 8:31, 32.

 [Hohoˈa i te api 19]

No te raveraa i te mau tauiraa, ua titauhia ia ˈu ia faaea i te faaroo i te mau pehe tei faaitoito ra i te au-ore-raa i te tahi nunaa ê

[Hohoˈa i te api 19]

E imi hara noa na vau e to ˈu mau hoa. E faaohipa matou i te mau tipi e te mau raau no te aro i te hoê nahoa taata e 20 aore ra hau atu â taata