A faariro na ei tapao na oe te taviniraa i te atua e a muri noa ˈtu
Pene 18
A faariro na ei tapao na oe te taviniraa i te atua e a muri noa ˈtu
1, 2. Eaha te titauhia hau atu i te noaa-noa-raa mai i te ite no nia i te Atua?
AHIRI e tei mua oe i te hoê opani e tatara i te hoê piha mea rahi te mau taoˈa faufaa roa i roto. E e parau na tatou e na te hoê taata i haamanahia i horoa mai i te taviri ia oe e i parau mai ia oe a rave noa mai i teie mau taoˈa faufaa mau ra. Eita oe e maitaihia i teie taviri ahiri eita oe e faaohipa ia ˈna. Oia atoa, e tia ia oe ia faaohipa i te ite ia maitaihia oe i te reira.
2 Mai te reira mau iho â no te ite no nia i te Atua. Oia mau, te auraa o te ite mau no nia i te Atua ra o Iehova e o Iesu Mesia, o te ora mure ore ïa. (Ioane 17:3) Inaha, eita taua tiaturiraa ra e tupu i te noaa-noa-raa mai i te ite. Mai ta oe e faaohipa i te hoê taviri faufaa roa, e tia atoa ia oe ia faaohipa i te ite no nia i te Atua i roto i to oe oraraa. Ua parau hoi o Iesu e e “tae i te basileia” te feia e rave i te hinaaro o te Atua. E noaa i taua mau taata ra i te haamaitairaa i te taviniraa i te Atua e a muri noa ˈtu!—Mataio 7:21; Ioane 1, 2:17.
3. Eaha te hinaaro o te Atua no tatou nei?
3 I muri aˈe i te iteraa eaha te hinaaro o te Atua, mea faufaa roa ia faaohipa i te reira. Ia manaˈo oe, eaha te hinaaro o te Atua no oe? Ua haapotohia ma te tano maitai na roto i teie nei mau parau: A pee ia Iesu. Te parau ra te Petero 1, 2:21 ia tatou e: “I parauhia ˈi hoi outou; i pohe atoa hoi te Mesia iho no outou; e ua vaiiho hoi i te haapaoraa na outou, ia pee outou i to ˈna taahiraa avae.” No reira, no te rave i te hinaaro o te Atua, e tia ia oe ia pee maite i te hiˈoraa o Iesu tei maraa ia oe. Mea na reira oe ia faaohipa i te ite no nia i te Atua.
MEA NAFEA TO IESU FAAOHIPARAA I TE ITE NO NIA I TE ATUA
4. No te aha te ite o Iesu no nia ia Iehova e rahi ai, e mea nafea to ˈna faaohiparaa i taua ite ra?
4 E rahi aˈe to Iesu Mesia ite no nia i te Atua i te tahi pae. Ua ora oia e ua rave i te ohipa i pihai iho i te Atua ra o Iehova i nia i te raˈi ehia aˈenei tau hou oia e haere mai ai i te fenua nei. (Kolosa 1:15, 16) E eaha ta Iesu ohipa i rave i taua ite taatoa ra? Aita oia i mauruuru i te mea noa e ua noaa ia ˈna taua ite ra. Ua ora o Iesu ia au maite i taua ite ra. No reira hoi oia i riro ai ei taata maitai, faaoromai, e te here i roto i to ˈna mau auraa e te mau taata. Inaha, o to ˈna Metua i te raˈi ra hoi ta Iesu e pee ra e te ohipa ra oia ia au maite i te ite i noaa mai ia ˈna no nia i te mau haerea e te huru o Iehova.—Ioane 8:23, 28, 29, 38; Ioane 1, 4:8.
5. No te aha o Iesu i bapetizohia ˈi, e mea nafea to ˈna oraraa ia au maite i te auraa o to ˈna bapetizoraa?
5 Ua faaitoito atoa te ite i noaa ia Iesu ia rave oia i te hoê taahiraa faufaa roa. Ua haere mai hoi oia mai Galilea i te Anavai i Ioridana, i reira to Ioane bapetizoraa ia ˈna. (Mataio 3:13-15) Eaha ta te bapetizoraa o Iesu e faataipe ra? Ei ati Iuda, ua fanauhia oia i roto i te hoê nunaa i pûpûhia i te Atua. No reira, ua pûpûhia o Iesu mai to ˈna fanauraahia mai â. (Exodo 19:5, 6) Ia ˈna i auraro i te bapetizoraa, ua tuu atura oia ia ˈna iho i mua ia Iehova no te rave i te hinaaro o te Atua i haapaohia no ˈna i tera tau. (Hebera 10:5, 7) E ua faatupu hoi o Iesu i te auraa mau o to ˈna bapetizoraa. Ua horoa oia ia ˈna iho i roto i te taviniraa a Iehova, ma te tufa i te ite no nia i te Atua i te mau taata e i te mau taime atoa oia e nehenehe ai. Mea oaoa roa na Iesu i te rave i te hinaaro o te Atua, inaha ua parau roa hoi oia e ua riro te reira ei maa na ˈna.—Ioane 4:34.
6. Mea nafea to Iesu haapaeraa ia ˈna iho?
6 Ua ite papu o Iesu e te raveraa i te hinaaro o Iehova e titau rahi te reira ia ˈna—e titau hoi i to ˈna iho ora. Tera râ, ua haapae o Iesu ia ˈna iho, e ua tuu i to ˈna mau hinaaro i te piti o te parahiraa. O te raveraa i te hinaaro o te Atua tei vai noa i nia i te parahiraa matamua. Ia au i te reira, nafea tatou e nehenehe ai e pee i te mau taahiraa avae tia roa o Iesu?
TE MAU TAAHIRAA E ARATAI I TE ORA MURE ORE
7. Eaha te tahi mau taahiraa te tia i te hoê taata ia rave ia nehenehe oia ia bapetizohia?
7 Taa ê atu ia Iesu, e feia tia ore tatou e e nehenehe te tapao matamua o te bapetizoraa e noaa ia tatou i muri aˈe i te raveraahia te tahi atu mau taahiraa faufaa roa. E haamata te reira ia rave tatou i te ite mau no nia i te Atua ra o Iehova e o Iesu Mesia i roto roa i to tatou mafatu. E faaitoito hoi te reira ia tatou ia faatupu i te faaroo e ia here hohonu i te Atua. (Mataio 22:37-40; Roma 10:17; Hebera 11:6) E turai hoi te auraroraa i te mau ture, te mau faaueraa tumu e te mau haapiiraa a te Atua ia tatou ia tatarahapa, e ia faaite i to tatou tatarahapa paieti no ta tatou mau hara tahito. E aratai te reira ia tatou ia taui, oia hoi, ia fariu ê e ia faarue roa i te mau haerea iino atoa ta tatou i pee na i te tau i ore â te ite o te Atua i noaa mai ia tatou. (Ohipa 3:19) Parau mau, mai te peu e te rave moe noa râ tatou i te hoê hara maoti hoi i te rave i te mea tia, aitâ ïa tatou i taui mau atura, e e ore hoi te Atua e noaa i te haavare. E itea o Iehova i te mau huru haerea haavarevare atoa.—Luka 12:2, 3.
8. Eaha te ohipa ta oe e rave ia hinaaro oe e apiti atu i roto i te ohipa pororaa i te Basileia?
8 I teie nei ua noaa ia oe i te ite no nia i te Atua, e ere anei i te mea tano ia manaˈo maite oe iho i te mau tumu parau i te pae varua? Eita e ore oe i te hinaaro uˈana e faaite atu i to oe mau fetii, i to oe mau hoa, e i te tahi atu mau taata i te mau mea ta oe e haapii ra. Inaha, eita e ore e ua na reira aˈena oe, mai ta Iesu i tufa i te parau apî maitai i te tahi atu mau taata i te mau taime faanaho-ore-hia. (Luka 10:38, 39; Ioane 4:6-15) I teie nei, te hinaaro ra paha oe e rave hau atu â. E oaoa te mau matahiapo kerisetiano i te paraparau mai ia oe no te faaoti e e nehenehe anei ta oe e apiti atu i roto i te ohipa pororaa i te Basileia a te mau Ite no Iehova ma te tamau. Mai te peu e e nehenehe ta oe, e rave ïa te mau matahiapo i te tahi mau faanahoraa ia haere oe na muri i te hoê Ite i roto i te taviniraa. Ua pee te mau pǐpǐ a Iesu i ta ˈna mau faaueraa no te faatupu i ta ratou taviniraa ma te nahonaho maitai. (Mareko 6:7, 30; Luka 10:1) E fanaˈo oe i te hoê â tauturu a haere noa ˈi oe e poro i te poroi no nia i te Basileia i tera e tera fare e i roto i te tahi atu mau tuhaa o te pororaa.—Ohipa 20:20, 21.
9. Nafea te hoê taata ia pûpû ia ˈna iho i te Atua, e nafea te pûpûraa ia ohipa i nia i te oraraa o te taata?
9 Te pororaa i te parau apî maitai i te mau huru taata atoa i roto i te tuhaa fenua a te amuiraa, o te hoê ïa ravea e itea mai ai te feia aau maitai e tei roto hoi te reira i te mau ohipa maitatai e haapapu ra e e faaroo to oe. (Ohipa 10:34, 35; Iakobo 2:17, 18, 26) Te amui-tamau-raa i roto i te mau putuputuraa kerisetiano e te apiti-maite-raa i roto i te ohipa pororaa, o te tahi atoa ïa mau ravea no te faaite e ua tatarahapa oe e ua taui oe e ua opua mau hoi oe i teie nei i te ora ia au maite i te ite no nia i te Atua. E eaha ïa to muri iho taahiraa? O te pûpûraa ïa ia oe iho no te Atua ra o Iehova. Te auraa ra, na roto i te pure hohonu, e faaite atu oe i te Atua e e horoa oe ma te hinaaro mau e ma te mafatu taatoa i to oe ora no ˈna no te faatupu i to ˈna hinaaro. Tera te ravea no te pûpû ia oe iho no Iehova e no te farii i te zugo mǎrû a Iesu Mesia.—Mataio 11:29, 30.
TE BAPETIZORAA—EAHA TO ˈNA AURAA NO OE
10. No te aha oe e bapetizohia ˈi i muri aˈe oe e pûpû ai ia oe iho no Iehova?
10 Ia au i te parau a Iesu, te feia atoa e riro mai ei mau pǐpǐ na ˈna, e tia ratou ia bapetizohia. (Mataio 28:19, 20) No te aha te reira e titauhia ˈi i muri aˈe oe e pûpû ai ia oe iho no te Atua? I te mea hoi e ua pûpû oe ia oe iho no Iehova, ua ite oia e te here ra oe ia ˈna. Tera râ, eita e ore e te hinaaro ra oe e rave i to mua ˈtu ohipa ia ite atoa te tahi pae i to oe here i te Atua. Oia mau, te horoa maira te bapetizoraa i te hoê ravea no oe ia ite te taata atoa e ua pûpû oe ia oe iho no te Atua ra o Iehova.—Roma 10:9, 10.
11. Eaha te auraa o te bapetizoraa?
11 E rave rahi auraa taipe to te bapetizoraa. Ia taumihia oe i raro i te pape, aore ra ia “hunahia,” mai te huru ra ïa e ua pohe oe ia au i to oe huru oraraa tahito. E ia haere mai oe i rapaeau i te pape, mai te huru ra ïa e te rave ra oe i te hoê oraraa apî, tei faaterehia e te hinaaro o te Atua eiaha e to oe iho hinaaro. Parau mau, e ere ïa te auraa e eita oe e rave faahou i te hara, inaha e feia hara anaˈe hoi tatou paatoa e e hara tatou i te mau mahana atoa. Ei tavini râ pûpûhia e bapetizohia no Iehova, e ô atu oe i roto i te hoê taairaa taa ê e o ˈna. No to oe tatarahapa e to oe auraroraa ma te haehaa i te bapetizoraa, ua ineine o Iehova i te faaore mai i ta oe mau hara na nia i te niu o te tusia taraehara o Iesu. E faatupu ïa te bapetizoraa i te hoê haava manaˈo viivii ore i mua i te Atua.—Petero 1, 3:21.
12. Eaha te auraa ia bapetizohia (a) “i roto i te iˈoa o te Metua”? (b) ‘i te iˈoa o te Tamaiti’? (c) ‘i te iˈoa o te varua moˈa’?
12 Ua faaue maira o Iesu i ta ˈna mau pǐpǐ e bapetizo i te mau pǐpǐ apî “i roto i te iˈoa o te Metua, e no te Tamaiti, e no te [varua moˈa].” (Mataio 28:19) Eaha ta Iesu e hinaaro ra e parau? Te faaite ra te bapetizoraa “i roto i te iˈoa o te Metua” e te farii ra te taata e bapetizohia ma to ˈna mafatu atoa i te Atua ra o Iehova ei Poiete no ˈna e ei Mana hope parau-tia no te ao taatoa nei. (Salamo 36:9; 83:18; Koheleta 12:1) Te auraa o te parau ra bapetizohia ‘i te iˈoa o te Tamaiti,’ te farii ra ïa te taata ia Iesu Mesia—e To ˈna tusia taraehara iho â ra—ei ravea hoê roa no te ora i faaineinehia e te Atua. (Ohipa 4:12) Te bapetizoraa ‘i te iˈoa o te varua moˈa,’ te auraa ra te farii ra ïa te taata e bapetizohia e e mauhaa na te Atua te varua moˈa o Iehova, aore ra puai ohipa, no te faatupu i Ta ˈna mau opuaraa e no te faaitoito i Ta ˈna mau tavini ia rave i To ˈna hinaaro tia ma te amui atu i Ta ˈna faanahonahoraa e arataihia ra e te varua.—Genese 1:2; Salamo 104:30; Ioane 14:26; Petero 2, 1:21.
UA INEINE ANEI OE NO TE BAPETIZORAA?
13, 14. No te aha tatou e ore ai e mǎtaˈu i te maitiraa i te tavini i te Atua ra o Iehova?
13 I te mea hoi e rave rahi auraa to te bapetizoraa e ei tapao matamua faufaa roa i roto i te oraraa o te hoê taata, e taahiraa anei râ te reira o ta oe e mǎtaˈu nei? Eita roa ˈtu! I te mea hoi e eita te opuaraa e bapetizo e tia ia ravehia ma te ore e ferurimaitai-hia, papu maitai o te opuaraa paari roa ˈˈe ïa o ta oe e nehenehe e rave.
14 E haapapu mai te bapetizoraa i to oe hinaaro e tavini i te Atua ra o Iehova. A manaˈo na i te mau taata ta oe e farerei nei. Noa ˈtu eaha te huru, aita anei ratou tataitahi e tavini ra i te hoê fatu? Te tavini nei vetahi i te taoˈa rahi. (Mataio 6:24) Te tahi pae te tapapa maite ra ïa i to ratou toroa aore ra te tavini ra ia ratou iho ma te haafaufaa rahi i te haamâharaa i to ratou mau hiaai i roto i to ratou oraraa. Area vetahi ê ra, te tavini nei ïa i te mau atua hape. Ua maiti râ oe e tavini i te Atua mau ra o Iehova. Aita ˈtu tei faaite i te maitai rahi, i te aroha, e te here mai ia ˈna te huru. E faatoroa te Atua i te mau taata i te ohipa faufaa roa e aratai ia ratou i te ora. E haamauruuru oia i ta ˈna mau tavini i te ora mure ore. Papu maitai, eiaha ïa te peeraa i te hiˈoraa o Iesu e te pûpûraa i to oe oraraa no Iehova, ia haamǎtaˈu ia oe. I teie mahana, tera anaˈe te oraraa e fariihia e te Atua e te mea tano roa.—Te mau arii 1, 18:21.
15. Eaha vetahi mau fifi matauhia o te bapetizoraa?
15 Teie nei râ, e ere te bapetizoraa i te hoê taahiraa te tia ia ravehia ma te faahepohia mai e te hoê taata. E ohipa te reira i rotopu ia oe e o Iehova. (Galatia 6:4) A haere noa ˈi oe i mua i te pae varua, e uiui paha oe e: “Eaha te mea e ore e tia ˈi ia bapetizo ia ˈu?” (Ohipa 8:35, 36) E uiui paha oe ia oe iho e, ‘Te tapea ra anei te patoiraa a te fetii ia ˈu? Tei roto noâ anei au i te hoê huru tupuraa eita e au i te mau Papai aore ra te rave noa ra anei au i te hara? Te mǎtaˈu ra anei au i te ore te taata e au faahou mai ia ˈu?’ Tera te tahi mau tuhaa te tia ia tuatapapahia, ia faito maitai râ oe i te reira e tia ˈi.
16. Nafea oe e fanaˈo ai i te taviniraa ia Iehova?
16 E ere roa ˈtu i te mea tano ia faito i te mau vahi ino ma te ore e hiˈopoa i te mau haamaitairaa i te taviniraa ia Iehova. Ei hiˈoraa, a rave na i te parau no te patoiraa a te fetii. Ua tǎpǔ mai o Iesu e ia erehia ta ˈna mau pǐpǐ i to ratou mau fetii no te mea ua pee mai ratou ia ˈna, e itea ˈtu ïa ia ratou i te hoê fetii i te pae varua rahi aˈe. (Mareko 10:29, 30) E faaite mai teie mau hoa faaroo i to ratou here taeae ia oe, e tauturu mai ia oe ia faaoromai i te hamani-ino-raa, e ia turu ia oe i nia i te eˈa o te ora. (Petero 1, 5:9) E nehenehe te mau matahiapo a te amuiraa e tauturu taa ê mai ia oe ia faaruru ma te manuïa i te mau fifi e ia na nia ˈˈe i te tahi atu mau fifi. (Iakobo 5:14-16) Ia ore teie nei ao e au ia oe, e tia ia oe ia uiui ia oe iho e, ‘Eaha te nehenehe e faaauhia i te fariiraa mai te Poiete o te ao nei ia ˈu, e o te faaoaoa hoi ia ˈna i te oraraa ta ˈu i maiti?’—Maseli 27:11.
TE ORARAA IA AU MAITE I TE PÛPÛRAA OE IA OE IHO E TE BAPETIZORAA
17. No te aha oe e faariro ai i te bapetizoraa ei haamataraa eiaha râ ei hopea?
17 Mea faufaa roa ia haamanaˈo e e ere te bapetizoraa i te hopea no ta oe mau haereraa i mua i te pae varua. E tapao oia i te haamataraa o ta oe taviniraa i te Atua i te roaraa o to oe oraraa ei tavini nominohia e ei Ite no Iehova. Noa ˈtu â ïa e mea faufaa roa te bapetizoraa, aita râ te reira i riro ei haapapuraa no te ora. Aita o Iesu i parau e: ‘Te taata i bapetizohia, oia te ora.’ Ua parau râ oia e: “Area te mau papu e tae noa ˈtu i te hopea ra, oia te ora.” (Mataio 24:13) No reira, mea faufaa roa ia mata na oe i te imi i te Basileia o te Atua ma te faariro i te reira ei ohipa faufaa roa ˈˈe i roto i to oe oraraa.—Mataio 6:25-34.
18. I muri aˈe i te bapetizoraa, eaha vetahi mau tapao ta oe e titau?
18 No te mau papu i roto i ta oe taviniraa ia Iehova, e hinaaro oe e haamau no oe iho i te mau tapao i te pae varua. Te hoê tapao faufaa roa o te faarahiraa ïa i to oe ite no nia i te Atua na roto i te hoê haapiiraa tataitahi no nia i ta ˈna Parau. A faanaho i te hoê taioraa bibilia i te mau mahana atoa. (Salamo 1:1, 2) A haere tamau atu i te mau putuputuraa kerisetiano, inaha e tauturu te amuimuiraa ta oe e ite atu i reira ia oe ia vai puai i te pae varua. E oe iho, no te aha ïa oe e ore ai e haamau ei tapao na oe i te horoaraa i te pahonoraa i te mau putuputuraa a te amuiraa e e na reira ïa oe i te arue atu ia Iehova e e faaitoito atu ai i te tahi pae? (Roma 1:11, 12) Te tahi atu tapao o te haamaitairaa paha ïa i te huru o ta oe mau pure.—Luka 11:2-4.
19. Eaha te mau huru maitatai ta te varua moˈa e nehenehe e tauturu ia oe ia faaite?
19 Ia ora oe ia au maite i te auraa o to oe bapetizoraa, e tia ia oe ia haapao maitai i te mau ohipa o ta oe e rave, ma te vaiiho i te varua moˈa o te Atua ia faatupu i roto ia oe i te mau huru mai te here, te oaoa, te hau, te faaoromai, te maitai, te hamani maitai, te faaroo, te mǎrû, e te hitahita ore. (Galatia 5:22, 23; Petero 2, 3:11) A haamanaˈo na, e horoa mai o Iehova i to ˈna varua moˈa i te feia atoa e ani atu ia ˈna ma te pure e e auraro ia ˈna ei mau tavini haapao maitai na ˈna. (Luka 11:13; Ohipa 5:32) No reira, a pure i te Atua ia horoa mai i to ˈna varua e a ani atu i ta ˈna tauturu no te faatupu i te mau huru e fariihia mai e ana. E ite-papu-hia taua mau huru ra i roto i ta oe huru paraparau e i to oe haerea a farii noa ˈi oe i te faaohiparaa a te varua o te Atua. Parau mau, te tutava nei te taata tataitahi i roto i te amuiraa kerisetiano e “faataata-apî” ia ratou e ia riro hau atu â mai te Mesia ra te huru. (Kolosa 3:9-14) I te na reiraraa te faaruru nei tatou tataitahi i te mau tautooraa taa ê no te mea e ere hoê â faito to tatou i te pae no te haereraa i mua i te pae varua. I te mea hoi e e taata hara oe, e tia ia oe ia haa ma te puai, ia noaa ia oe i te huru mai to te Mesia ra. I reira râ, eiaha roa ˈtu e haaparuparu, no te mea e tupu mau â hoi te reira maoti te tauturu a te Atua.
20. Nafea oe ia pee i te hiˈoraa o Iesu i roto i te taviniraa?
20 I roto i ta oe mau tapao i te pae varua, te vai ra ïa te pee-maite-raa i te hiˈoraa oaoa o Iesu. (Hebera 12:1-3) Mea here na ˈna te taviniraa. Mai te peu e ua noaa ia oe i te haamaitairaa taa ê e apiti atu i roto i te ohipa pororaa i te Basileia, eiaha roa ˈtu e faariro i te reira ei peu matau-noa-hia. A tutava e ia oaoa oe i te haapii atu ia vetahi ê i te parau no nia i te Basileia o te Atua mai ta Iesu i na reira. A faaohipa i te haapiiraa ta te amuiraa i horoa mai no te tauturu ia oe ia riro mai ei taata haapii maitai aˈe. E ia papu na ia oe e e nehenehe ta Iehova e horoa mai i te puai no te faatupu i ta oe taviniraa.—Korinetia 1, 9:19-23.
21. (a) Nafea tatou e ite ai e mea faufaa roa na Iehova i te mau taata haapao maitai i bapetizohia? (b) Na te aha e faaite e mea faufaa roa te bapetizoraa no to tatou oraraa ˈtu i te tupuraa te haavaraa a te Atua i nia i te amuiraa ino o te mau mea nei?
21 E taata faaturahia e te Atua, te hoê taata tei pûpû ia ˈna iho e tei bapetizohia e o te tutava ra hoi i te pee ma te haapao maitai i te hiˈoraa o Iesu. Te hiˈopoa mai nei Iehova i te mau mafatu o te mau tausani mirioni taata e ua ite oia e mea faufaa rahi mau te taata mai te reira te huru. Te hiˈo mai nei oia ia ratou mai te mau taoˈa faufaa roa te huru, mai “tei hinaarohia ra.” (Hagai 2:7) Te faaite ra te mau parau tohu a te Bibilia e te hiˈo maira te Atua i taua feia ra mai tei tapaohia no te ora ˈtu i ta ˈna haavaraa e fatata maira i nia i te amuiraa ino o te mau mea nei. (Ezekiela 9:1-6; Malaki 3:16, 18) E taata “haapaohia no te ora mure ore” anei oe? (Ohipa 13:48) O to oe anei hinaaro uˈana ia tapaohia oe ei taata e tavini ra i te Atua? Ua riro te pûpûraa ia ˈna iho e te bapetizoraa ei tuhaa no taua tapao ra, e mea faufaa roa hoi no te ora.
22. E tia i te “feia rahi roa” ia tiai i teihea tiaturiraa?
22 I muri aˈe i te Diluvi rahi, ua haere maira o Noa e to ˈna utuafare i rapae i te araka i nia i te hoê fenua i tamâhia. Oia atoa i teie mahana, “e feia rahi roa” e faaohipa ra i te ite no nia i te Atua i roto i to ratou oraraa e tei noaa ia ratou i te haamaitairaa a Iehova, teie e tiaturi nei e ora ˈtu i te hopea o te amuiraa ino o te mau mea nei e o te fanaˈo i te ora mure ore i nia i te hoê fenua mâ aita e hopearaa. (Apokalupo 7:9, 14) Eaha ïa te huru o taua oraraa ra?
A HIˈOPOA NA I TO OE ITE
Nafea o Iehova ia hinaaro mai ia oe ia faaohipa i to oe ite no nia ia ˈna?
Eaha vetahi taahiraa e aratai i te bapetizoraa?
No te aha te bapetizoraa e riro ai ei haamataraa eiaha râ ei hopea?
Nafea tatou e ora ˈi ia au i to tatou pûpûraa e te bapetizoraa?
[Uiraa haapiiraa]
[Hohoˈa i te api 172]
Ua pûpû anei oe ia oe iho i te Atua na roto i te pure?
[Hohoˈa i te api 174]
Na te aha e tapea ra ia oe ia bapetizohia?
