MEA teiaha e rahi aˈe te tohora tua puu i te hoê pereoo mataeinaa. Noa ˈtu râ, ma te faahiahia e nehenehe ta ˈna e ouˈa e e taviriviri i roto i te miti. No te aha e nehenehe ai ia ˈna e na reira? Te tahi tumu, no te mau puu ïa i nia i to ˈna nau pehau.

A hiˈo na: Mea moremore te hiti o te pehau o te rahiraa tohora e otia. To te tohora tua puu râ, mea taa ê ïa. E puu rahi to nia i to ˈna nau pehau. A hopu ai, e rave rahi ripoa te itehia ia fati mai te pape i nia i taua mau puu ra. E turaihia oia e taua mau ripoa ra a nehenehe atu ai e faatia oioi i to ˈna nau pehau. Noa ˈtu te puai o te miti, e nehenehe iho â oia e hauti ohie maoti tera mau puu. Mea faufaa roa hoi, i te mea e fatata te roa o te hoê pehau i te tuea i te roa o to ˈna tino.

Te faaohipa ra te mau aivanaa i te hohoˈa o te pehau o teie tohora ia maitai atu â te hamaniraa o te mau faatere pahi, matini faaohuraa pape e taviri i te mataˈi. E tano atoa te reira no te mau pererau o te mau manureva tautau.

Eaha to oe manaˈo? Mea tupu noa anei te pehau o te tohora tua puu? Aore ra mea poietehia?