MEA au roa na Hilton i te ohipa motoraa. I te hituraa o to ˈna matahiti, ua haamata oia i te aro eiaha noa i nia i te tahua motoraa, i te mau vahi atoa râ. I te fare haapiiraa, e haere oia na muri i te mau hoa no te imi o vai ta ratou e taparahi. Te na ô ra oia: “Ua matau vau i te eiâ, te pere, te mataitai i te hohoˈa faufau, te hamani ino i te mau vahine e te parau ino i to ˈu na metua. No tera huru to ˈu raua i manaˈo ai eita vau e taui i te hoê mahana. A oti ai ta ˈu tau haapiiraa, ua faarue au i te fare.”

I to Hilton hoˈiraa mai i te fare 12 matahiti i muri aˈe, ua maere roa to ˈna na metua ua taui roa oia. Ua faaite hoi ta raua tamaiti i te mǎrû, te hau e te faatura. Eaha tei tauturu ia ˈna ia taui? Ua feruri papu oia no nia i to ˈna oraraa. Ua hiˈopoa atoa i te Bibilia no te ite e nehenehe anei te reira e tauturu ia ˈna. Te na ô ra Hilton: “Ua faaohipa vau i ta ˈu i taio i roto i te Bibilia e ua taui i to ˈu huru. Ua haapao vau i te faaueraa o te Ephesia 6:2, 3 ia faatura i to ˈu na metua. No te taime matamua o to ˈu oraraa, ua oaoa mau vau e ua mauruuru papa e mama ia ˈu, aita râ i mauiui faahou!”

Te haapapu ra te aamu o Hilton mea faufaa e mea puai mau te Bibilia. (Hebera 4:12) E hiˈopoa anaˈe vetahi huru maitatai haafaufaahia i roto i te Parau a te Atua mai te haerea tia, te faaoromai, te taiva ore e te here. E faaite-atoa-hia eaha te mau maitai ta tatou e fanaˈo.