I TAHITO ra, ia hinaaro te hoê tane e faaipoipo, e horoa o ˈna i te moni faaipoiporaa i te utuafare o te vahine. E nehenehe o ˈna e horoa i te taoˈa faufaa, te animara aore ra te moni. I te tahi taime, e tavini o ˈna i te metua tane o te vahine ta ˈna e hinaaro e faaipoipo. Tera te tupuraa o Iakoba. A hinaaro ai o ˈna e faaipoipo ia Rahela, ua tavini o ˈna i te metua tane o Rahela e hitu matahiti. (Gen. 29:17, 18, 20) No te aha râ e aufauhia ˈi te moni faaipoiporaa?

Ia au i te taata tuatapapa Bibilia Carol Meyers: “E aufauhia te moni faaipoiporaa i te utuafare o te vahine no te mea e ravehia ta ratou tamahine tei tauturu na ia ratou i roto i te faaapu.” Ma te aufau i te reira, e taati-atoa-hia na utuafare e piti tei faaau i te faaipoiporaa. E nehenehe ïa na utuafare e piti e tauturu te tahi i te tahi i roto i te mau taime fifi. Hau atu, e haapapu te moni faaipoiporaa e ua momoˈahia te hoê vahine e fatata o ˈna i te faarue i to ˈna metua tane no te haere e ora e ta ˈna tane.

Te aufauraa i te moni faaipoiporaa, e ere ïa i te faariroraa i te vahine ei taihaa. Ia au i te buka Iseraela tahito: To ˈna oraraa e ta ˈna mau faanahoraa (Beretane): “Ia horoahia te hoê tino moni, aore ra te tahi atu taoˈa faufaa i te fetii o te vahine, e nehenehe e manaˈohia e te hoo mai ra te tane i ta ˈna vahine. No reira, te aufauraa i te moni faaipoiporaa, e ere ïa no te hoo mai i te vahine, ei faahoˈiraa râ te reira i te utuafare.”

I teie mahana, te pee noa ra te tahi mau fenua i teie peu. Ia ani noa ˈtu te mau metua Kerisetiano i te moni faaipoiporaa, e faaite noa ratou i te “huru au noa” ma te ore e titau rahi roa i te tane e hinaaro ra e faaipoipo. (Phil. 4:5; Kor. 1, 10:32, 33) A na reira ˈi, e faaite ïa ratou e ere ratou i te nounou moni. (Tim. 2, 3:2) Ia titau rahi te mau metua Kerisetiano i te moni faaipoiporaa i te tane, e nehenehe o ˈna e faanuu noa i te mahana faaipoiporaa e tae roa ˈtu i te taime e pee roa ˈi te moni faaipoiporaa. E titau-atoa-hia paha ia ˈna ia faarue i ta ˈna taviniraa pionie no te ohipa rahi atu â ia noaa ta ˈna moni no te faaipoiporaa.

I te tahi atu mau fenua, tei roto te aufauraa i te moni faaipoiporaa i te ture. I reira, e pee te mau metua Kerisetiano i tera mau ture. No te aha? No te mea ua faaue te Atua i te mau Kerisetiano “ia auraro . . . i te feia mana” e te mau ture o te ore e ofati ra i te mau ture a te Atua.​—Roma 13:1; Ohi. 5:29.