Ua hinaaro anei oe e taio i te Bibilia e i muri iho, ua otohe no te mea ua manaˈo oe mai te feia i faahitihia i nia ˈtu? E rave rahi o tei na reira atoa. Mai te peu e faaitehia ˈtu e nehenehe te Bibilia e tauturu ia oe ia fanaˈo i te oraraa oaoa e te mauruuru mau, e te vai ra te tahi mau ravea ia anaanatae oe i te taioraa Bibilia. E tamata anei oe i te na reira?

A hiˈo na i ta vetahi i parau, ua oaoa mau hoi ratou i te haamata i te taio i te Bibilia.

Ua parau Ezekiel, 20 matahiti: “Na mua ˈˈe, mai te hoê taata faahoro pereoo vau o tei ore i ite e haere o ˈna ihea. I to ˈu râ taioraa i te Bibilia, ua tauturu mai ta ˈna mau aratairaa ia fanaˈo i te hoê oraraa oaoa. Ua ite au i te mau aˈoraa tano i roto o ta ˈu e haapao ra i te mau mahana atoa.”

Te faataa ra Frieda, 20 atoa matahiti: “E taata vau o te riri hanoa na mua ˈˈe. Maoti râ ta ˈu taioraa Bibilia, ua haapii au i te haavî i to ˈu huru. Ua riro mai au ei taata ohie aˈe ia haafatata, mea rahi to ˈu hoa i teie nei.”

Teie ta Eunice, 50 matahiti i parau no nia i te Bibilia: “Ua tauturu mai te reira ia riro ei taata maitai aˈe, ia faarue i ta ˈu mau peu tano ore.”

Mai ta teie feia taio Bibilia e e mirioni atu i ite, ua tauturu te taioraa Bibilia ia ratou ia oaoa ˈtu â. (Isaia 48:17, 18) E ere râ tera anaˈe, e faaite atoa te reira e nafea ia rave i te faaotiraa maitai, ia maiti i te hoa papu, ia ore ia haapeapea roa ino e te mea faufaa roa ˈtu â, ia ite i te parau mau no nia i te Atua. No ǒ mai te mau aˈoraa Bibilia i te Atua, eita roa ïa oe e fifihia ia haapao i te reira! Mea maitai noa hoi ta te Atua mau aˈoraa!

Te mea faufaa, o te haamataraa ïa. Eaha te tahi mau manaˈo o te tauturu atu ia haamata e ia anaanatae i ta oe taioraa Bibilia?