A FERURI NA: Te mataitai ra outou i te mau paturaa tahito i te hoê fare vairaa taihaa tahito. Ua ino roa te rahiraa o taua mau paturaa ra i te roaraa o te tau. Te vai ra ua moˈe vetahi tuhaa rahi. Te vai ra râ hoê paturaa tahito tei ore i ino. Mea maitai roa to ˈna rapaeauraa, oia atoa te mau tuhaa rii. E ani outou i te taata aratai: “Mea apî aˈe tera paturaa i te tahi atu?” E pahono mai oia: “Aita. Mea tahito aˈe tera i te rahiraa e aita roa ˈtu te reira i faaapîhia.” E ani outou: “Ua paruruhia anei te reira?” E pahono mai te taata aratai: “Aita. Ua faaruru tera paturaa i te tau mataˈi e te ûa ino roa ˈˈe. E rave rahi feia totoa tei tamata i te tuino i te reira.” E maere paha outou a manaˈo ai: “Eaha tei faaohipahia no te patu i te reira?”

E au te Bibilia i tera paturaa tahito faahiahia mau. Papu maitai, e rave rahi buka tahito. Mea tahito aˈe râ te Bibilia i te rahiraa. Mai te mau paturaa tei ino mai, ua ino roa te rahiraa o te mau papairaa tahito i te roaraa o te tau. Ei hiˈoraa, mea hape roa te mau papairaa ihi ia faaauhia i te mau haapapuraa apî. Pinepine ta ratou mau aˈoraa i te pae o te ea i te mea atâta no te oraraa. E rave rahi atoa papairaa tahito ua moˈehia aore ra ua inohia te tahi mau tuhaa.

Mea taa ê râ te Bibilia. Ua haamata te papairaa Bibilia a hau atu 35 senekele i teie nei. Te vai noa nei râ teie buka. I te roaraa o te mau senekele, ua rave-ino-hia tera buka. Ua tutuihia, opanihia e haafaufaa-ore-hia ta ˈna mau papairaa. Noa ˈtu râ, te vai noa â ra te Bibilia. Noa ˈtu te mau haamaramaramaraa apî, e tano noa â te aratairaa Bibilia no teie tau.—A hiˈo i te tumu parau tarenihia “Mea tahito roa anei aore ra to mua roa?”

Te ui ra paha outou: “Mea tano iho â anei te mau aratairaa Bibilia no teie tau?” No te pahono atu, a ui: “Eaha te mau fifi ino roa ˈˈe ta te huitaata e faaruru nei? Eaha te mau fifi riaria roa ˈˈe?” Peneiaˈe te manaˈo ra outou i te tamaˈi, te haaviiviiraa fenua, te ohipa ino aore ra te petaraa. A hiˈopoa na vetahi mau aratairaa Bibilia. A na reira ˈi, a ui: “Mai te peu e pee te taata i taua mau faaueraa ra, aita anei te ao taatoa e maitai mai?”

TE HAU

“E oaoa te feia faatupu i te hau, e parauhia hoi ratou e tamarii na te Atua.” (Mataio 5:9) “A tutava i te rave i te mea e tia ia outou tataitahi no te parahi hau noa e te taata atoa.”—Roma 12:18.

TE AROHA HAMANI MAITAI, TE FAAORERAA I TE HAPA

“E oaoa te feia aroha hamani maitai, e aroha-hamani-maitai-hia hoi ratou.” (Mataio 5:7) “A faaoromai noa i te tahi e te tahi, e ia hapa noa mai te tahi ia oe, a faaore noa ˈtu ïa i ta ˈna hapa. Mai ia Iehova a i faaore noa mai i ta outou ra, ia na reira atoa ˈtu outou.”—Kolosa 3:13.

TE HAU I ROTOPU I TE MAU NUNAA ATOA

“Ua hamani [te Atua] i te mau nunaa atoa ia parahi ratou i nia i te fenua taatoa.” (Ohipa 17:26) “E ore te Atua e maitiiti i te taata, i roto râ i te mau nunaa atoa, e farii oia i te taata o te mǎtaˈu ia ˈna e o te rave i te mea tia.”—Ohipa 10:34, 35.

IA FAATURAHIA TE FENUA

“Ua rave ihora te Atua ra o Iehova i te taata, tuu ihora ia ˈna i roto i taua ô i Edene ra, ei faaapu, e ei tiai.” (Genese 2:15) E “haamou [te Atua] i te feia e tuino ra i te fenua.”—Apokalupo 11:18.

IA RIRI I TE NOUNOU TAOˈA E TE PEU TAOTORAA TIA ORE

“A ara e eiaha e nounou i ta vetahi ê taoˈa, no te mea noa ˈtu e mea rahi te taoˈa a te hoê taata, eita oia e ora i te reira.” (Luka 12:15) “Eiaha roa ˈtu te mau peu taotoraa tia ore, e te peu viivii e rave rau, e te nounou ia faahitihia i rotopu ia outou, mai tei au i te feia moˈa.”—Ephesia 5:3.

TE HAEREA TIA, TE ITOITO I ROTO I TE OHIPA

“Te hinaaro ra matou ia afaro noa to matou haerea i te mau mea atoa.” (Hebera 13:18) “Eiaha te taata e eiâ ra ia eiâ faahou, ia rohi râ i te raveraa i te ohipa.”—Ephesia 4:28.

TE FAUFAARAA IA TAUTURU I TE FEIA I ROTO I TE ATI

“Ei parau mahanahana ta outou i te feia e hepohepo ra, e turu i tei paruparu, e faaoromai i te taata atoa.” (Tesalonia 1, 5:14) “Ia aupuru i te mau otare e te mau vahine ivi i roto i to ratou ati.”—Iakobo 1:27.

Aita te Bibilia e faahiti noa ra i tera mau manaˈo. Te haapii ra râ te Bibilia ia tatou ia haafaufaa i teie mau aratairaa e ia faaohipa i te reira i roto i to tatou oraraa. Mai te peu e pee te taata i te mau haapiiraa faahitihia na mua ˈtu, papu maitai e iti mai te mau fifi i nia i te fenua, e ere anei? No reira, mea tano iho â te mau aratairaa Bibilia no teie tau! Eaha ïa ta te Bibilia e nehenehe e haapii ia outou i teie mahana?

I te hoê mahana, ua parau te taata î roa ˈˈe i te paari: “Na te mau ohipa parau-tia ta te hoê taata e rave e haapapu e e taata paari oia.” (Mataio 11:19) Te farii anei ra outou i tera parau? E itehia te paari o te taata ia faaohipa oia i te reira. E manaˈo paha outou: “Mai te peu e mea maitai te Bibilia no te oraraa, aita anei e itehia te faahopearaa maitai i roto i to ˈu oraraa? Nafea te reira e tauturu mai ai i mua i te mau fifi ta ˈu e faaruru ra?” A feruri na i teie hiˈoraa.

No Delphine, b mea maitai te oraraa, e rave rahi ohipa e mea fanaˈohia. Ua tupu taue râ e rave rahi ati i roto i to ˈna oraraa. Ua pohe ta ˈna tamahine. Ua fifihia to ˈna faaipoiporaa. Ua roohia oia i te fifi i te pae moni. Te haamanaˈo ra oia: “Aita vau i ite faahou o vai au: aita faahou ta ˈu tamahine, ta ˈu tane e to ˈu fare. E au ra e mea faufaa ore au: aita e ihotaata, e puai e e opuaraa no a muri aˈe.”

A tahi ra o Delphine i ite ai e mea mau teie parau: “To matou pue mahana i te oraraa nei e hitu ïa ahuru i te matahiti, e ia tae i te vau i te ahuru i te matahiti i te etaeta, e riro râ taua etaeta ra ei rohirohi e ei taiâraa: e ore hoi e mahia motu ê atura, maue atura matou!”—Salamo 90:10.

 I taua tau fifi mau, ua noaa ia Delphine i te tauturu faahiahia mau maoti te Bibilia. Mai ta to muri nei nau tumu parau e toru e faaite mai, e rave rahi atoa tei faufaahia i te Bibilia a pee ai i ta ˈna mau aˈoraa no te faaruru i te mau fifi o te oraraa. No ratou, e au te Bibilia i te paturaa faahitihia i te omuaraa. Mea taa ê roa te Bibilia i te mau buka tahito atoa. No te mea anei no ǒ mai te mau manaˈo Bibilia i te Atua, eiaha râ i te taata?—Tesalonia 1, 2:13.

Peneiaˈe no outou atoa mea poto e mea fifi te oraraa. Ia rahi roa mai te fifi, ihea outou e ite ai i te tamahanahanaraa, te tauturu e te aˈoraa tano?

E hiˈopoa anaˈe e toru tuhaa e haapapu ra mea maitai te Bibilia no to outou oraraa. E nehenehe te reira e haapii atu e nafea ia

1. ape i te mau fifi, ia nehenehe.

2. faaafaro i te mau fifi a tupu ai te reira.

3. faaoromai i te mau fifi noa ˈtu aita e ravea faahou.

E itehia nau tumu faufaa e toru i to muri nei mau tumu parau.