Te maitai e te ino: Te hoê aratairaa e faufaahia ˈi oe
Ua haapii e mirioni taata e nehenehe te mau aratairaa Bibilia e tiaturihia e ua faufaahia ratou i te reira. E hiˈo anaˈe e maha tuhaa o te oraraa.
1. Te faaipoiporaa
Ua rau te manaˈo o te taata no nia i te faaipoiporaa e e nafea ia oaoa i roto i te faaipoiporaa.
TA TE BIBILIA E PARAU RA: “Ia here te tane faaipoipo tataitahi i rotopu ia outou i ta ˈna vahine mai ta ˈna e here ia ˈna iho. Area te vahine faaipoipo ra, ia faatura maite ïa i ta ˈna tane e tia ˈi.”—Ephesia 5:33.
AURAA: E faanahoraa te faaipoiporaa no ǒ mai i te Atua. O ˈna ïa tei ite eaha ta te tane e ta ˈna vahine faaipoipo e rave e oaoa ˈi raua. (Mareko 10:6-9) Ia haapao raua i to te tahi e te tahi maitai, e oaoa ïa raua. Te hoê tane mea here na ˈna i ta ˈna vahine, e aupuru e e hamani maitai oia i ta ˈna vahine. E faaite te hoê vahine mea faatura oia i ta ˈna tane na roto i ta ˈna huru paraparau e ohipa.
E FAUFAAHIA OE I TE ARATAIRAA BIBILIA: Aita Quang raua Thi no Vietnam i oaoa faahou. Te na ô ra Quang: “Mea ino roa vau i nia i ta ˈu vahine. Aita vau i tâuˈa faahou i to ˈna mau huru aau e pinepine au i te faahaama ia ˈna.” Ua hinaaro Thi e faataa. Te na ô ra oia: “Ua manaˈo vau eita ta ˈu e nehenehe faahou e tiaturi e e faatura i ta ˈu tane.”
Auaˈe raua i haapii i te Bibilia e i faaohipa i te Ephesia 5:33. Te faatia ra o Quang: “Ua tauturu mai teie irava ia ˈu ia ite i te faufaaraa ia hamani maitai e ia aupuru i ta ˈu vahine i te pae materia, i te pae tino e ia haapao atoa i to ˈna mau huru aau. A na reira ˈi, ua here e ua faatura o ˈna ia ˈu.” Te faatia ra o Thi: “Rahi atu â vau i te faaohipa i te Ephesia 5:33 e i te faatura i ta ˈu tane, rahi atu â oia i te here, i te paruru e i te aupuru ia ˈu.”
No te ite atu â no nia i te faaipoiporaa, a taio i te A ara mai na! No 2 2018 “12 ravea e oaoa ˈi te utuafare” i nia i te jw.org.
2. To tatou huru i nia ia vetahi ê
Pinepine te taata i te ore e faatura i te tahi atu no to ratou iri, to ratou huru rapaeau, nunaa aore ra no ta ratou haapaoraa.
TA TE BIBILIA E PARAU RA: “A faatura i te mau huru taata atoa.”—Petero 1, 2:17.
AURAA: Aita te Bibilia e haapii ra ia hae i te taata no to ˈna iri, nunaa aore ra no te mea e mahu o ˈna. Te faaitoito mai ra hoi te Bibilia ia faatura i te mau huru taata atoa noa ˈtu mea rahi ta ratou moni aore ra aita. (Ohipa 10:34) Noa ˈtu aita tatou e afaro ra i ta vetahi ê mau tiaturiraa aore ra i to ratou huru, e tutava anaˈe i te faatura e i te hamani maitai ia ratou.—Mataio 7:12.
E FAUFAAHIA OE I TE ARATAIRAA BIBILIA: Ua haapiihia Daniel ia au ore i te feia no Asia. Mea hae roa na ˈna i teie mau taata, e pinepine o ˈna i te parau ino ia ratou. Te na ô ra Daniel: “No ˈu ua tano vau, ua hinaaro hoi au e paturu i to ˈu fenua. Aita vau i manaˈo e mea ino ta ˈu e rave ra.”
Auaˈe Daniel i haapii i te Bibilia. Te faatia ra o ˈna: “Ua titauhia ia taui roa vau i to ˈu huru feruriraa. Ua haapii au i te hiˈo i te taata mai ta te Atua e hiˈo ia ratou. No ˈna, hoê â tatou pauroa noa ˈtu nohea mai tatou. Eita vau e haapao faahou nohea mai te tahi taata. I teie nei, mea here na ˈu i te mau huru taata atoa e e hoa rahi to ˈu ati aˈe te ao nei.”
No te ite atu â, a taio i te A ara mai na! No 3 2020 (Farani) “Y a-t-il un remède contre les préjugés?” i nia i te jw.org.
3. Te moni
E rave rahi taata o te tapi i te taoˈa rahi no te fanaˈo i te oraraa oaoa e te hoê a muri aˈe papu.
TA TE BIBILIA E PARAU RA: “E parururaa hoi te paari mai te moni e parururaa atoa, te faufaaraa râ o te ite: E faaherehere te paari i te ora o to ˈna fatu.”—Koheleta 7:12.
AURAA: E hinaaro iho â tatou i te moni, eita râ te reira e horoa mai i te oraraa oaoa aore ra te hoê a muri aˈe papu. (Maseli 18:11; 23:4, 5) No te fanaˈo i te reira, ia pee ïa tatou i te mau aratairaa Bibilia î i te paari ta te Atua i horoa mai.—Timoteo 1, 6:17-19.
E FAUFAAHIA OE I TE ARATAIRAA BIBILIA: I tapi noa na Cardo no Initonetia i te oraraa fanaˈo. Te na ô ra oia: “Mea rahi ta ˈu taoˈa, ta te rahiraa e moemoeâ ra. Nehenehe ta ˈu e ratere na te ara, e hoo mai i te mau taihaa, te pereoo e te fare mea moni roa.” Aita râ te reira i maoro. Te faatia ra Cardo: “Ua tavirihia vau. Ua moˈe taue noa te moni ta ˈu i rohi ia noaa mai ehia matahiti. I tapi noa na vau i te oraraa fanaˈo, eaha râ tei toe mai? Te moˈemoˈe ïa, te inoino e te manaˈo mea faufaa ore au.”
Ua faaohipa Cardo i ta te Bibilia e parau ra no nia i te moni. Aita oia i haamâuˈa faahou i to ˈna taime no te taoˈa rahi, ua maiti râ o ˈna i te hoê oraraa haihai. Te parau ra oia: “Ua noaa mai ia ˈu te hoê ô faufaa aˈe, oia hoi to ˈu auhoaraa e te Atua. I teie nei, topa maitai to ˈu taoto e te ite ra vau i te oaoa mau.”
No te ite atu â i ta te Bibilia e parau ra no nia i te moni, a taio i te tumu parau “E hopoi mai anei te haapiiraa teitei e te moni i te hoê a muri aˈe papu?” o Te Pare Tiairaa No 3 2021 i nia i te jw.org.
4. Te taotoraa i te apiti
Ua rau te manaˈo o te taata.
TA TE BIBILIA E PARAU RA: “Ia haapae i te mau peu taotoraa tia ore e tia ˈi. Ia ite outou tataitahi e nafea ia haavî i to outou iho tino e tia ˈi ma te moˈa e te tura, eiaha ma te nounou e te hinaaro faufau vî ore mai to te mau nunaa ite ore i te Atua.”—Tesalonia 1, 4:3-5.
AURAA: Te haapii ra te Bibilia e nafea ia haavî i to tatou mau hinaaro tia ore. I roto i te “peu taotoraa tia ore” e ô atoa mai te faaturi, te taiata, te taotoraa e piti taata tei ore i faaipoipo, te peu mahu e te taotoraa i te animara. (Korinetia 1, 6:9, 10) E ô te taotoraa te tane i ta ˈna vahine faaipoipo no ǒ mai i te Atua ra.—Maseli 5:18, 19.
E FAUFAAHIA OE I TE ARATAIRAA BIBILIA: Te na ô ra Kylie vahine taa noa no Auteralia: “I manaˈo na vau e ia taoto vau i te hoê apiti, e fanaˈo ïa vau i te here. E ere râ tera tei tupu. Ua ino e ua mauiui roa vau.”
I muri aˈe, ua haapii e ua faaohipa Kylie i ta te Bibilia e parau ra no nia i te taotoraa i te apiti. Te faatia ra oia: “Ua taa ia ˈu e paruru te mau ture aveia a te Atua ia ˈu, ia ore au e fifihia. Te fanaˈo ra vau i teie nei i te hau e te ite ra vau eaha te here mau, no te mea te rave ra vau i te hinaaro o Iehova. Mea papu, ua faaora te mau aratairaa Bibilia ia ˈu!”
No te ite atu â, a taio i te tumu parau “Eaha ta te Bibilia e parau ra no nia i te hoê tane e te hoê vahine o te faaea ma te ore e faaipoipo?” i nia i te jw.org.
E tauturu mai to tatou Atua poiete ia ite eaha te mea maitai e te mea ino. Noa ˈtu e ere i te mea ohie ia pee i ta ˈna mau aratairaa, mea hoona te reira. Mea papu e oaoa tatou i teie nei e a muri noa ˈtu.
