E hopoi mai anei te riroraa ei taata maitai i te hoê a muri aˈe papu?
A mairi ai te tau, e rave rahi taata tei manaˈo e hopoi mai te riroraa ei taata maitai i te hoê a muri aˈe papu. Ei hiˈoraa, te farii ra te feia no Asia i ta te philosopho ra o Confucius i parau: “Ta outou e ore e hinaaro ia ravehia i nia ia outou, eiaha ïa e rave i nia ia vetahi ê.” a
TA E RAVE RAHI E TIATURI RA
I teie mahana, e rave rahi te tiaturi ra mai te peu e rave ratou i te ohipa maitai e fanaˈo ratou i te hoê a muri aˈe papu. E tutava ïa ratou i te faatura ia vetahi ê, i te faaite i te haerea maitai, i te rave i ta ratou tuhaa e i te haapao i to ratou manaˈo haava. Te na ô ra Linh, te hoê vahine no Vietnam: “I manaˈo noa na vau ia faaite au i te haerea tia, e fanaˈo ïa vau i te hoê oraraa oaoa.”
E rave vetahi i te mea maitai no ta ratou mau tiaturiraa. Te na ô ra Hsu-Yun, te hoê tane e ora ra i Taïwan: “Ua haapiihia vau, ia rave te hoê taata i te mea maitai, e oaoa o ˈna i muri aˈe i to ˈna poheraa. Ia rave râ o ˈna i te mea ino, e haamauiuihia o ˈna.”
EAHA TE MAU FAAHOPEARAA?
Ia rave tatou i te mea maitai no vetahi ê, papu roa e haamaitai-rahi-hia tatou. Eita râ te reira e tupu i te mau taime atoa no te mea ia hamani maitai noa ˈtu tatou ia vetahi ê, eita te rahiraa o ratou e haamauruuru mai. Te na ô ra Shiu Ping, te hoê vahine e ora ra i Hong-Kong: “I roto i to ˈu oraraa, ua taa ia ˈu e ia rave te hoê taata i te mea maitai, e ere ïa te auraa e haamaitai-noa-hia o ˈna. Ua tutava vau i te aupuru i to ˈu utuafare e i te rave i te mea maitai no vetahi ê. Ua faarue mai râ ta ˈu tane ia ˈu e i ta mâua tamaiti.”
E rave rahi tei tapao e ere pauroa te feia e haapaoraa ta ratou i te mea maitai. Te na ô ra Etsuko, te hoê vahine no Tapone: “Ua faaô vau i roto i te hoê haapaoraa e ua haamata vau i te faanaho i te mau faaanaanataeraa no te mau ui apî. Ua huru ê roa vau i to ˈu iteraa i te haerea tano ore, te hinaaro e faatere, te huru feruriraa tataˈu e te ohipa piˈo o te feia o teie haapaoraa.”
“Ua tutava vau i te aupuru i to ˈu utuafare e i te rave i te mea maitai no vetahi ê. Ua faarue mai râ ta ˈu tane ia ˈu e i ta mâua tamaiti.”—SHIU PING, HONG-KONG
Noa ˈtu te mau tutavaraa a vetahi no te rave i te mea maitai, ua paruparu roa to ratou faaroo a faaruru ai ratou i te ati. Tera ïa ta Van, te hoê vahine no Vietnam i ite. Te na ô ra o ˈna: “I te mau mahana atoa, ua hoo mai au i te maa hotu, te tiare e te maa no te pûpû atu no to ˈu mau tupuna tei pohe ma te tiaturi e haamaitai mai ratou ia ˈu. Aita roa ˈtu râ te reira i tupu! Noa ˈtu te mau ohipa maitai ta ˈu i rave e te mau tutavaraa no te faatura i te mau faanahoraa i ravehia i roto i ta ˈu haapaoraa, ua maˈi-roa-hia ta ˈu tane e ua pohe atoa ta mâua tamahine tei haere i te fenua ê no te haapiiraa. E 20 noa hoi matahiti to ˈna i te poheraa!”
I te mea e aita e navai ia riro ei taata maitai no te fanaˈo i te hoê a muri aˈe papu, eaha ˈtu â ïa te rave? E titauhia te hoê aratai papu o te nehenehe e pahono i ta tatou mau uiraa e o te faaite mai e nafea ia fanaˈo i te hoê a muri aˈe papu. Ihea roa e itehia ˈi tera aratai?
a No te ite atu â no nia i te haapiiraa a Confucius, a hiˈo i te mau paratarafa 31-35 o te pene 7 o te buka L’humanité à la recherche de Dieu, piahia e te mau Ite no Iehova i nia i te reni natirara www.ps8318.com/fr.
E au atoa outou . . .
TE PAHONO RA TE BIBILIA
Eaha te Ture auro?
I to Iesu faahitiraa i te Ture auro, ua parau oia e nafea tatou eiaha noa i te taatoaraa o te taata, oia atoa râ i to tatou enemi.
TE PARE TIAIRAA
E ati te taata maitai: No te aha?
Te faaite ra te Bibilia e toru tumu e mauiui ai te taata.
