MEA rahi e ua rau te faataaraa a te taata no nia i te ora e te pohe. I muri aˈe i to ratou poheraa, te parau ra vetahi e tamau ratou i te ora i te tahi atu vahi e i roto i te hoê tino ê. No te tahi atu, e fanau-faahou-hia ratou no te haamata i te hoê oraraa apî. E te vai ra o te parau ra aita hoê aˈe ohipa te tupu i muri aˈe.

Ia au i tei haapiihia ˈtu e te fenua i paari ai oe, mea taa ê atoa paha ta oe e tiaturi ra. Mea rahi ta te taata parau no nia i te tupu ia pohe tatou. O vai râ aore ra ihea tatou e ite ai i te pahonoraa papu e te tano i tera uiraa?

Mea maoro i teie nei to te mau tia faaroo haapiiraa te vai ra hoê mea o te ora ˈtu ia pohe te taata. Te feia e tiaturi ia Iesu, te haamori i te mau atua Initia, te mau ati Iuda, to te haapaoraa Mahometa e te vai ra ˈtu â, fatata pauroa te feia o teie mau haapaoraa, te tiaturi ra ïa i tera haapiiraa. No ratou, e ora ˈtu te tahi mea i roto i te tino pohe o te tahi taata no te haere i roto i te ao varua. Area te feia e pee ra ia Bouddha, te tiaturi ra ïa e na roto e rave rahi fanau-faahou-raa, e nehenehe te puai e vai ra i roto i te tahi taata e naea i te hoê faito hau ê parauhia Nirvana.

No tera mau haapiiraa e tiaturiraa, fatata pauroa te huiraatira na te ao o te tiaturi ra e tamau ratou i te ora i te tahi atu vahi ia pohe ratou. No te rahiraa, ua riro atura te pohe ei tuhaa faufaa i roto i te oraraa o te taata e e au ra no ratou, tei roto te reira i te opuaraa a te Atua. Eaha râ ta te Bibilia e parau ra? A taio na i te tuhaa i mua ˈtu, e maere paha oe i te pahonoraa o tera uiraa.