Ua fanauhia vau i tei piihia na mua ˈˈe te tuhaa fenua hitia o te râ o Heremani, i roto i te tahi oire iti o Saxe te iˈoa. Mea oaoa roa to matou oraraa i te fare e mea here matou i te tahi e te tahi. Ua haapii mai to ˈu na metua i te mau peu maitatai. Tei raro aˈe te tuhaa fenua hitia o te râ o Heremani i te faatereraa Communiste. No te rahiraa o te feia no Saxe, mea faufaa ore te haapaoraa. O vau iho, i tiaturi na vau aita e Atua. I to ˈu apîraa, ua haafaufaa vau i ta ˈu i tiaturi na e te faatereraa Communiste.

I haafaufaa na vau i te Communiste no ta ratou poritita e mea faito te mau taata atoa. Hau atu â, no ˈu mea tano ia operehia te mau faufaa ma te tia. Eita ïa e ite-faahou-hia te taa-ê-raa i rotopu i te feia taoˈa rahi e te feia veve. Ua haa rahi au i roto i te tahi pupu Communiste no te feia apî. I te 14raa o to ˈu matahiti, ua ohipa rahi au no te tahi opuaraa ia faaohipa faahou i te mau papie faaruehia no te paruru i te natura. Ua mauruuru roa te mau tia faatere o te oire Aue no ta ˈu mau tutavaraa e ua faariro ia ˈu ei tino huiraatira taa ê no te oire. Noa ˈtu to ˈu apî, ua matau aˈena vau i te tahi mau tia poritita o te tuhaa fenua hitia o te râ o Heremani. No ˈu, ua rave au i te eˈa maitai e e ananahi faahiahia te tiai mai ra.

Ua taui taue noa râ i muri aˈe. I 1989, ua topa te patu o Berlin, na reira atoa pauroa te mau pupu Communiste na te pae hitia o te râ o Europa. Aita i maoro i muri iho, ite atura vau e ere no teie nei te ohipa tia ore na te tuhaa fenua hitia o te râ o Heremani. I faarirohia na hoi te feia o te ore e turu i te faatereraa Communiste ei feia haihai i rotopu i te huiraatira. Na ô aˈera vau, ‘Eaha ïa, aita anei te Communiste i turu i te manaˈo e mea faito te mau taata atoa? E haavare anaˈe paha ïa ta te Communiste?’ Ua painu roa vau!

Ua taui ïa vau i ta ˈu mau fa e ua haere atura to ˈu feruriraa i nia i te upaupa e te peniraa hohoˈa. Ua haapii au i te hauti i te upaupa i roto i te tahi pu taa ê no te haere i muri aˈe i te haapiiraa teitei. I hinaaro na hoi au e rave i te toroa hauti upaupa. Taa ê atu i te reira, aita vau i haapao faahou i te mau peu maitatai tei haapiihia mai i te tamariiraa. I roto atura i to ˈu feruriraa, na mua te faaanaanataeraa e te faahoaraa e rave rahi tamahine i te hoê â taime. Ua haapao vau i to ˈu hinaaro, ua hauti i te upaupa e ua peni i te hohoˈa, aita râ to ˈu taiâ no to tatou  ananahi i iti mai. Ua taa-roa-hia te reira na roto i te mau hohoˈa ta ˈu i peni. Ua uiui noa vau, ‘Eaha to tatou a muri aˈe? Eaha te tumu i hamanihia ˈi te taata?’

I to ˈu iteraa i te pahonoraa o tera mau uiraa, ua maere roa vau. I te tahi po, ua paraparau vau e te tahi atu mau piahi o te pu no nia i te ananahi o te taata. Te vai ra hoê i rotopu ia ratou, e Ite no Iehova, o Mandy a to ˈna iˈoa. Ua faaite mai tera tamahine e nafea ia ite i te eˈa maitai. Ua na ô mai oia: “Andreas, ia hinaaro oe e ite i te mau pahonoraa i ta oe mau uiraa no nia i te oraraa e te tupu a muri aˈe, a hiˈo i roto i te Bibilia.”

Aita vau i tiaturi oioi ia ˈna, i tera râ mahana ua faaoti au i te hiˈo roa i te mau pahonoraa i roto i te Bibilia. Ua faaitoito mai Mandy ia hiˈo i te pene 2 o te buka Daniela, ua maere roa vau i ta ˈu i taio. Ua faahiti tera parau tohu e rave rahi faatereraa puai o te taui roa i te tupuraa o te ao e tae roa mai i teie mahana. Ua faaite atoa mai Mandy i te tahi atu mau parau tohu Bibilia o te faataa ra eaha te tupu i mua ia tatou. Itehia ˈtura ia ˈu te pahonoraa i ta ˈu mau uiraa! Tera râ, mea ê atu â ïa uiraa tei hiti mai, ‘Na vai i papai i tera mau parau tohu? O vai te nehenehe e faaite ma te tia i te tupu ananahi? Te vai ra iho â anei te hoê Atua?’

Ua faanaho Mandy ia farerei au ia Horst e ta ˈna vahine o Angelika. E Ite no Iehova na hoa faaipoipo e na raua i tauturu mai ia taa maitai atu â i te Bibilia. Ua tapao oioi au o te mau Ite no Iehova anaˈe te haapaoraa o te faahiti pinepine e te faaite i te iˈoa o te Atua. (Salamo 83:18; Mataio 6:9) Ua haapii au e horoa o Iehova i te taata i te tiaturiraa e ora e a muri noa ˈtu i nia i te fenua o te faarirohia ei paradaiso. Te na ô ra te Salamo 37:9: “Te feia . . . i tiaturi ia Iehova ra, no ratou ïa te fenua.” Ua oaoa roa vau i te ite e nehenehe te taata atoa e fanaˈo i tera tiaturiraa. Ta te Atua noa e ani ra, ia faaau tatou i to tatou haerea i ta ˈna mau faaueraa faaitehia i roto i te Bibilia.

E ere roa ˈtu râ i te mea ohie ia taui e ia ora mai ta te Bibilia e haapii ra. I te noaaraa ia ˈu te toroa hauti upaupa, ua riro vau ei taata faaoru. Ua titauhia ïa ia haapii i te faaite i te haehaa. E ere atoa i te mea ohie ia faarue i ta ˈu mau peu haapaoraa ore. Auê au i te mauruuru ia Iehova no to ˈna faaoromai e to ˈna aroha! Ua taa atoa hoi ia ˈna i te huru o te feia e faaitoito ra i te haapao i ta te Bibilia e haapii ra.

Ua haa rahi te Communiste e te tiaturiraa e aita e Atua i nia i to ˈu feruriraa e to ˈu huru i te apîraa ra. Ua taui roa râ to ˈu oraraa i te Bibilia. Aita vau e taiâ faahou no to tatou a muri aˈe, tei nia vau i te eˈa maitai e e oraraa oaoa to ˈu. I 1993, ua bapetizohia vau ei Ite no Iehova e i 2000, ua faaipoipohia mâua Tabitha, e Ite no Iehova itoito atoa o ˈna. E taime rahi ta mâua e faataa nei no te tauturu i te taata ia taa i te Bibilia. E farerei mâua e rave rahi taata hoê â tupuraa e to ˈu na mua ˈˈe, o te turu i te Communiste e te tiaturi atoa aita e Atua. Ua oaoa roa vau i te faaite ia ratou o vai o Iehova.

I te haamataraa vau i te amuimui e te mau Ite no Iehova, ua riri roa to ˈu na metua. Ua ite râ raua ua faufaahia vau i te faahoaraa ia ratou. I teie nei, e oaoa iti rahi to ˈu i te faaite atu, te taio nei raua i te Bibilia e te apiti atoa ra i te mau putuputuraa a te mau Ite no Iehova.

E oraraa oaoa to mâua Tabitha no te mea te tutava ra mâua i te haapao maite i te mau aˈoraa Bibilia no te feia faaipoipo. Te tahi hiˈoraa, te horoa ra te Bibilia i te aˈoraa eiaha na hoa faaipoipo ia taiva i te tahi e te tahi. Ma te haapao maite i te reira, ua piri roa ˈtu â mâua Tabitha.—Hebera 13:4.

Aita vau e riaria e e taiâ faahou nei no to tatou ananahi. E mero vau no te hoê utuafare fetii taeae na te ao nei o te fanaˈo ra i te hau e te auhoêraa. Aita e taa-ê-raa i rotopu ia matou, hoê â faito te mau taata atoa. Tera te tahi mea ta ˈu i tiai noa na e e hinaaro vau ia vai noa mai tera e tae roa ˈtu i te hopea.