O ta te tahi ïa tamahine 13 matahiti i parau i te horoaraahia te hoê urî na ˈna. Ua parau te tahi vahine e toroa fanaˈo to ˈna i teie nei, ua taui roa to ˈna oraraa a horoa ˈi to ˈna papa i te hoê matini roro uira na ˈna i te haapiiraa tuarua. Area no te tahi tane faaipoipo apî, ua riro te api parau hamanihia e ta ˈna vahine no te matahiti matamua o to raua faaipoiporaa ei ô maitai roa ˈˈe.

I te mau matahiti atoa, e faataa te taata e rave rahi taime no te imi eaha te ô maitai roa ˈˈe e horoa na te hoa aore ra na te fetii. E hinaaro te rahiraa ia faahiti te taata o te fanaˈo i te ô i te mau parau mai te itehia i nia ˈtu. E oe, e hinaaro atoa anei oe e horoa e e fanaˈo i te ô o te faatupu i te oaoa mau?

Tera iho â ta tatou e hinaaro, ia oaoa tei fanaˈo i te ô, oia atoa râ tei horoa ˈtu i te reira. Te na ô ra hoi te Bibilia: “E rahi aˈe te oaoa ia horoa ˈtu i te horoahia mai.” (Ohipa 20:35) E rahi roa ˈtu â râ te oaoa o tei horoa ˈtu i te ô ia haafaufaa mau tei fanaˈo i te reira.

E nafea ïa oe e te taata ta oe e horoa ˈtu i te ô e ite ai i tera huru oaoa? E mai te peu e eita e nehenehe e horoa i te ô maitai roa ˈˈe, eaha te tia ia rave ia haafaufaa-mau-hia te reira?