I 1970, ua itehia mai i te feia ihipǎpǎ te tahi otaro tei paapaa i Ein Gedi, te hoê oire i te tuhaa fenua o Iseraela. Ua itehia mai tera otaro i te pae tooa o te râ o te miti Pohe i roto i te mau huˈahuˈa o te tahi sunago tei paapaa a haamouhia ˈi te oire i te onoraa o te senekele. Ua ino roa te otaro, eita e nehenehe e hohora maitai e eita atoa e taa-papu-hia te mau papai. Maoti râ te pata hohoˈa apî 3D, ua nehenehe atura e taio faahou i tei papaihia i roto i tera otaro.

Te tuati ra te mau papai o te tuhaa i toe mai i te tahi mau irava o te omuaraa o te buka Levitiko. Ua faahiti atoa tera mau irava i na reta Hebera e maha o te iˈoa o te Atua. E au ra ua papaihia te reira i ropu i te matahiti 50 e te matahiti 400. I teie nei, o te mau otaro o te miti Pohe (pii-atoa-hia te mau otaro o Qoumrân) no te area matahiti 100 hou te Mesia te otaro tahito roa ˈˈe o te mau papai Hebera. I muri mai, o te otaro no Ein Gedi e te toru, o te Codex no Alep ïa no te area matahiti 930 i muri aˈe te Mesia. I roto i te vea The Jerusalem Post, te faahiti ra Gil Zohar: “I te taime i noaa mai ai te otaro i Ein Gedi, tau tausani matahiti te faataa ê ra i te mau otaro o te miti Pohe i te Codex no Alep.” Ia au i te tahi mau taata tuatapapa aravihi, te haapapu ra te hohoˈa patahia o te otaro no Ein Gedi ua faaherehere-maitai-hia te mau papai o te Torah i te roaraa o te tau e aita te mau hape rii a te mau papai parau i faahuru ê i te poroi roto te otaro.