Mea rahi te taata e parau ra e tiaturi i te Atua. A ani ai râ oe ia ratou o vai te Atua, e pahonoraa taa ê te horoahia mai. No vetahi, e haava etaeta roa te Atua o te hinaaro noa e faautua i te taata no ta ratou mau hape. No te tahi atu râ, mea here te Atua e e faaore noa oia i te mau hara atoa a te taata. Te tiaturi ra te tahi atu e mea atea te Atua e aita oia e tâuˈa ra ia tatou. I te mea e e rave rahi manaˈo taa ê no nia i te Atua, mea rahi te taata e manaˈo ra aita roa ˈtu e nehenehe e ite o vai te Atua.

Mea faufaa anei ia ite o vai te Atua? E. E oaoa oe i roto i to oe oraraa ia ite atu â oe no nia ia ˈna. (Ohipa 17:26-28) Rahi atu â oe i te faafatata ˈtu ia ˈna, rahi atu â oia i te here e i te tauturu ia oe. (Iakobo 4:8) I te pae hopea, e noaa ia oe te ora mure ore maoti te ite-papu-raa o vai te Atua.—Ioane 17:3.

Nafea oe e ite ai o vai te Atua? A feruri na i te hoê taata ta oe i matau maitai, mai te hoê hoa piri. Nafea orua i riro ai ei hoa mau? Ua haapii mai oe o vai to ˈna iˈoa, to ˈna huru, ta ˈna e au, ta ˈna e ore e au, te mau mea ta ˈna i rave aore ra ta ˈna e opua, e te vai atu â. Ua haapii mai oe o vai o ˈna.

Oia atoa, e nehenehe oe e ite o vai te Atua ma te feruri i teie:

• O VAI TO TE ATUA IˈOA?

• MAI TE AHA TO ˈNA HURU?

• EAHA TA TE ATUA I RAVE?

• EAHA TA ˈNA E RAVE?

• NAFEA OE E FAUFAAHIA ˈI IA ITE O VAI TE ATUA?

Ua piahia teie vea no te pahono i taua mau uiraa ra ma te faaohipa i te Bibilia. Maoti teie mau tumu parau, e haapii mai oe o vai te Atua e e nafea oe e faufaahia ˈi ia faatupu i te auhoaraa piri e o ˈna.