Te faahopearaa o te riroraa ei ivi i nia e piti vahine

E VAHINE ivi o Sandra e faaea ra i Auteralia. I te poheraa ta ˈna tane tau matahiti aˈenei, ua peapea roa o Sandra. “Ua ahoaho roa vau i te taaraa ia ˈu e ua moe taue ta ˈu tane e hoa rahi roa ˈˈe. Aita roa ˈtu vau e haamanaˈo ra nafea to ˈu hoˈiraa i te fare mai te fare maˈi mai aore ra eaha ta ˈu i rave i te toea o taua mahana ra. I te roaraa o nau hebedoma i muri mai, ua riro to ˈu mau mǎtaˈuraa ei mauiui tamau i nia i to ˈu tino.”

E hoa paari aˈe to Sandra, o Elaine te iˈoa, e vahine ivi atoa fatata e ono matahiti i te maoro. Ua haapao o Elaine i ta ˈna tane o David e ono avaˈe i te maoro hou to ˈna poheraa i te mariri ai taata. No to ˈna mihi i te rahi, ua matapohia oia maa taime poto i muri iti noa ˈˈe i te poheraa o ta ˈna tane. E piti matahiti i muri aˈe, ua topa oia i raro i mua i te taata. Aita to ˈna taote i ite i te tahi maˈi i nia ia ˈna. Ua itea mai râ ia ˈna e ua tapea noa o Elaine i to ˈna mihi i roto ia ˈna, no reira, faaitoito atura oia ia Elaine e hoˈi i te fare e e tutava i te taˈi. “Mea huru maoro to ˈu faarururaa i to ˈu mihi,” ta Elaine ïa e faˈi ra, ma te parau atoa e ia moemoe oia, “ua matau atoa vau i te haere i roto i te piha e i te tapoˈi i to ˈu upoo i te ahu o David.”

Oia, e nehenehe te pohe o te hoê hoa faaipoipo here e faatupu e rave rau huru, no te mea te riroraa ei ivi, e ere noa ïa te oraraa aita e tane faaipoipo. No te hoê taime, ua manaˈo o Sandra, ei hiˈoraa, e ua ere oia i to ˈna ihotaata. Mai e rave rahi atu â mau vahine no riro noa ˈtura ei ivi, ua manaˈo atoa oia e mea paruparu, mea panoonoo oia. Te haamanaˈo ra o Sandra e: “Ua matau vau e na ta ˈu tane e rave i te mau faaotiraa hopea, ua vaiiho-taue-hia mai au o vau anaˈe no te rave i taua mau faaotiraa ra. Aita vau e taoto maitai ra. Ua rohirohi e ua paruparu roa vau. Mea fifi ia ite eaha te rave.”

I te mau mahana atoa, te vai ra te mau aamu mai to Sandra e to Elaine na te ao atoa nei. E pinepine o te maˈi, te ati purumu, te tamaˈi, te tamâraa nunaa, e te haavîraa uˈana te tumu e maraa noa ˈi te numera o te mau vahine ivi. * Mea rahi o teie mau vahine o te tapea noa i to ratou mauiui i roto ia ratou, aita ratou i ite e nafea. Eaha ta te mau hoa e te mau fetii e nehenehe e rave no te tauturu i te mau vahine ivi e haamatau ra i to ratou huru tupuraa? Te vai ra te tahi mau manaˈo tauturu faufaa i roto i te tumu parau i muri nei.

[Nota i raro i te api]