A paruru i to outou manaˈo haava

MEA riaria mau â te manaˈo e tere na nia i te hoê manureva e ua hape te porotarama o te roro uira. A feruri na râ e ua taui te hoê taata i te aveia o te manureva aore ra ua faahape oia ma te opua i te mau haamaramaramaraa o te reira! Tera mau â atoa ta te hoê ihotaata e tamata ra i te rave i nia i to outou manaˈo haava, i roto i te hoê auraa taipe. Ua faaoti papu oia e totoa i to outou aveia morare. E hinaaro oia ia faaû atu outou i te Atua!—Ioba 2:2-5; Ioane 8:44.

O vai teie ihotaata totoa ino? I roto i te Bibilia, e parauhia oia ‘te ophi tahito, o tei parauhia te Diabolo ra e o Satani, o tei haavare i to te ao atoa nei.’ (Apokalupo 12:9) Ua itehia oia i te ohiparaa i roto i te ô i Edene ra i to ˈna turairaa ia Eva, ma te faaohipa i te hoê manaˈo haavarevare, ia ore e tâuˈa i te mea ta ˈna i ite e mea tia e ia patoi atu i te Atua. (Genese 3:1-6, 16-19) Mai reira mai, ua aratai Satani i te tupuraa mai o te tahi mau faanahonahoraa taatoa o te haavare e o te turai i te taata taatoa ia riri i te Atua. I roto i teie mau faanahonahoraa, o te haapaoraa hape te au roa ˈˈe ia faahapahia.—Korinetia 2, 11:14, 15.

E faaino te haapaoraa hape i te manaˈo haava

I roto i te buka bibilia o te Apokalupo, te faataahia ra te haapaoraa hape mai te hoê vahine faaturi taipe parauhia o Babulonia Rahi. Ua taviri ta ˈna mau haapiiraa i te mau huru morare o te aau o te taata e rave rahi e ua turai ia ratou ia riri e ia hamani ino atoa ˈtu i te feia mea taa ê ta ratou mau tiaturiraa. Inaha i mua i te aro o te Atua, ia au i te Apokalupo, o te haapaoraa hape te tumu rahi i manii ai te toto o “te feia atoa i taparahihia i teie nei ao,” e tae noa ˈtu to te feia haamori iho o te Atua.—Apokalupo 17:1-6; 18:3, 24.

Ua faaara Iesu i ta ˈna mau pǐpǐ e e taviri te haapaoraa hape i te aveia morare o te tahi pae i to ˈna parauraa e: “Te fatata mai nei hoi te hora e manaˈo ai te taata e taparahi ia outou na e ua haamori oia i te Atua.” Ua haamatapo-mau-â-hia tera mau taata haavî i te pae morare! Ua parau Iesu e: “Aore ratou i ite i te Metua e ia ˈu hoi.” (Ioane 16:2, 3) Aita i maoro i muri aˈe i to Iesu faahitiraa i taua mau parau ra, ua taparahi-pohe-hia oia iho ia au i te faaueraa a te tahi mau aratai haapaoraa, o tei faatuati i ta ratou ohipa ino e to ratou manaˈo haava. (Ioane 11:47-50) Area râ, ua parau Iesu e maoti te here i roto ia ratou e itehia ˈi ta ˈna mau pǐpǐ mau. E aano atu â râ to ratou here, no te mea e here atoa ratou i to ratou mau enemi.—Mataio 5:44-48; Ioane 13:35.

Te tahi atu ravea e totoa ˈi te haapaoraa hape i te manaˈo haava o te taata e rave rahi, o te faaitoitoraa ïa i te parareraa o te mau mea morare atoa, aore ra morare ore. Teie ta te aposetolo Paulo i  parau no nia i te reira: ‘Te vai atura hoi te tau e ore ai ratou e farii i te parau mau, no te anoenoe râ o to ratou tariˈa, e haaputu ïa ratou i te orometua i au i to ratou iho hinaaro.’—Timoteo 2, 4:3.

I to tatou nei tau, te faaanoenoe ra te mau aratai haapaoraa i te tariˈa o te taata na roto i te parauraa e e farii te Atua i te taatiraa pae tino i rapaeau i te faaipoiporaa. Te tapo ra te tahi atu i to ratou mata i mua i te peu mahu. Inaha, te rave nei te tahi mau ekalesiatiko i teie peu. Ia au i te hoê tumu parau i roto i te vea Beretane The Times, “hoê ahuru ma toru ekalesiatiko mahu matauhia e te taatoaraa” tei maitihia no te riro ei melo no te Apooraa rahi o te Ekalesia no Beretane. Ia faarue anaˈe te mau aratai haapaoraa i te morare o te Bibilia e ia ore ta ratou mau ekalesia e tâuˈa roa i te reira, eaha ïa te mau faito e tia i to ratou mau taata ia farii? Te taa ra ïa ia tatou no te aha te mau mirioni taata e feaapiti roa ˈi.

Mea maitai aˈe ïa ia arataihia tatou e te mau parau mau pae varua e te morare, e au i te mori tapao, e haapiihia ra i roto i te Bibilia! (Salamo 43:3; Ioane 17:17) Ei hiˈoraa, te haapii ra te Bibilia e e ore te feia poreneia, e ore atoa te feia faaturi “e parahi i te basileia o te Atua.” (Korinetia 1, 6:9, 10) Te parau maira te Bibilia e te ‘rave ra’ te mau tane e te mau vahine o te ‘ruri ê ra i te mea mau ra i te mea au ore,’ “i te mea haama” i mua i te aro o te Atua. (Roma 1:26, 27, 32) E ere na te taata tia ore i hamani i teie mau parau mau morare; e mau faito faauruahia teie e te Atua, ta ˈna e ore roa ˈtu e faaore. (Galatia 1:8; Timoteo 2, 3:16) Tera râ, te faaohipa ra Satani i te tahi atu â mau ravea no te totoa i te manaˈo haava.

A maiti i te mau faaanaanataeraa

Te faaheporaa i te hoê taata ia rave i te hoê ohipa ino, mea huru ino ïa, te aratairaa râ ia ˈna ia hinaaro e rave i taua ohipa ino ra, mea ino roa ˈtu ïa. Teie hoi te fa a “te arii o teie nei ao,” o Satani. Ia aˈa to ˈna mau manaˈo hairiiri i roto i te feruriraa e te aau o te taata maamaa aore ra ite ore—te feia apî iho â râ te naea-ohie-hia—e faaohipa oia i te mau papai, te mau hohoˈa teata, te upaupa, te mau hauti roro uira huru ê, e te mau afata poroi no nia i te mau hohoˈa faufau i roto i te Internet.—Ioane 14:30; Ephesia 2:2.

“Te manaˈohia ra e e mataitai te feia apî [i te mau Hau Amui no Marite] 10 000 ohipa haavî i te mau matahiti atoa,” ia au i te hoê parau faataa i roto i te vea Pediatrics, “e o te mau porotarama afata teata no te mau tamarii te mea haavî roa ˈˈe.” Ua faaite atoa te parau faataa e “i te mau matahiti atoa, e ite te mau taurearea fatata 15 000 parau faufau, faahitihitiraa faufau, e parau arearea faufau.” Tae noa ˈtu i te po, “e patahia hau atu i te 8 taatiraa i te pae tino i te hora, e hau atu i te maha taime i tei te matahiti 1976 ra.” E ere ïa i te mea maere e ite-atoa-hia ˈi e “te maraa rahi atoa ra te parau faufau.” Te faaara mai ra râ te Bibilia e te mau maimiraa aivanaa e rave rahi e e ino roa ˈtu â te taata i taua mau mea ra. No reira, ia hinaaro mau outou e faaoaoa i te Atua e ia maitaihia outou, a pee ïa i te Maseli 4: 23, e na ô ra e: ‘A tiai i to aau na, o te tumu hoi te reira o te ora.’—Isaia 48:17.

E faaino atoa e rave rahi upaupa matauhia i te manaˈo haava. “E tutava taa ê” te hoê tane himene mea matau-roa-hia oia e mea hoo-roa-hia ta ˈna mau himene i te tahi mau fenua o te Tooa o te râ “i te faahuru ê i te taata,” ta te hoê ïa parau faataa e faaara ra i roto i te vea Auteralia The Sunday Mail. Ia au i te parau faataa, “e faahanahana ta ˈna mau himene i te raau taero, te taotoraa i te fetii e te maferaraa” e e “himene [oia] e e taparahi pohe oia i ta ˈna vahine e taora ˈtu ai i to ˈna tino i roto i te hoê roto.” Te vai ra te tahi atu â mau parau e mea hairiiri roa ia faahiti-faahou-hia i ǒ nei. No ta ˈna râ upaupa, e fanaˈo oia i te hoê re faahiahia. E hinaaro anei outou e ueue i tera mau manaˈo atâta i faahitihia aˈenei i roto i to outou feruriraa e to outou aau, noa ˈtu e mea au ia faaroo i te reira i roto i te upaupa? Mea maitai e eita, e faaino hoi te feia o te na reira i to ratou manaˈo haava e i te pae hopea, e tupu mai “te aau ino” i roto ia ratou, e riro atu ai ratou ei enemi no te Atua.—Hebera 3:12; Mataio 12:33-35.

No reira, a haapao maitai i te faaanaanataeraa ta outou e maiti. Te aˈo maira te Bibilia e: “Te mau mea haavare ore ra, te mau mea au maitai ra, te mau mea tia ra, te mau mea viivii ore ra, te mau mea popouhia ra, te mau mea roo maitatai ra; te vai na te tahi maitai e te tahi mea haamaitai ra, e haamanaˈo i taua mau mea ra.”—Philipi 4:8.

E ohipa te mau amuimuiraa i nia i to outou manaˈo haava

I to raua tamariiraa, mea au na Neil raua o Franz e amuimui i te mau Kerisetiano haavare ore. * Ia maoro râ, teie ta Neil i parau, “ua haamata vau i te amuimui i te mau hoa iino.” O te ohipa ino e te fare tapearaa te faahopearaa, e e tatarahapa rahi to ˈna. Hoê â huru no Franz. “Ua manaˈo vau e e nehenehe ta ˈu e amuimui i te feia apî no teie nei ao ma te ore e pee ia ratou,” ta ˈna ïa i parau. “Mai ta te Galatia 6:7 râ e parau ra, ‘e ore te Atua e noaa i te haavare, o ta te taata e ueue ra, o ta ˈna â ïa e ooti mai.’ Ua haapii au i roto i te fifi e ua hape au e ua tano o Iehova. Tei roto vau i te fare tapearaa e tae noa ˈtu i to ˈu poheraa no te hape ta ˈu i rave.”

Eita iho â ïa te taata mai ia Neil e ia Franz e rave taue noa i te ohipa ino; i te omuaraa, eita paha ratou e manaˈo i te reira. Te vai ra te mau taahiraa avae e aratai atu i te atea-ê-raa ra, e pinepine, o te mau amuimuiraa iino te taahiraa avae matamua. (Korinetia 1, 15:33) O te raau taero aore ra te ava paha to muri iho. Inaha, ua faataahia te manaˈo haava ma te tano mai te “tuhaa o te huru taata e tahe i roto i te ava.” Mai reira ˈtu, o te tahi noa taahiraa avae iti te aratai atu i te ohipa ino aore ra te morare ore ra.

No te aha ïa e rave ai i taua taahiraa avae matamua ra? A amuimui maoti râ i te feia paari e  here mau ra i te Atua. E tauturu ratou ia outou ia haapuai i to outou manaˈo haava ia aratai hoi te reira ia outou ma te tano, e ape atu ai outou i te mauiui e rave rahi. (Maseli 13:20) Noa ˈtu e to roto noa raua i te fare tapearaa, te faariro nei o Neil raua o Franz i teie nei i to raua manaˈo haava mai te hoê ô no ǒ mai i te Atua ra e tia ia faaineine-maitai-hia e ia poihere-mau-hia. Hau atu â, te tutava puai nei raua i te patu i te hoê taairaa maitai e to raua Atua ra o Iehova. Ia paari outou e tia ˈi, e ia haapii na roto i ta raua mau hape.—Maseli 22:3.

A paruru i to outou manaˈo haava

E faaite tatou e e hinaaro tatou e paruru i to tatou manaˈo haava ia faahotu tatou i te here e te faaroo i te Atua, e te mǎtaˈu faatura ia ˈna. (Maseli 8:13; Ioane 1, 5:3) Te faaite ra te Bibilia e e pinepine, e ere te hoê manaˈo haava aita teie mau mea i te mea papu i te pae morare. Ei hiˈoraa, te faahiti ra te Salamo 14:1 i te feia e parau i roto i to ratou aau: “Aore e Atua!” Eaha te faahopearaa o teie ereraa i te faaroo i nia i to ratou haerea? Te na ô â ra te irava e: ‘Ua ino ratou, e te faufau hoi i ta ratou ohipa.’

Aita atoa e tiaturiraa papu o te hoê oraraa maitai aˈe no a muri aˈe to te feia aita e faaroo mau to ratou i te Atua. No reira ratou e ora ˈi no teie nei tau, ma te haapao i te mau hinaaro o to ratou tino. Teie ta ratou philosophia: “E amu tatou e e inu hoi; ananahi hoi tatou e pohe ai.” (Korinetia 1, 15:32) Area râ te feia e tiatonu ra i te re o te ora mure ore, aita ïa e hema ra i te mau mea navenave taime poto o te ao. Mai te hoê roro uira taa maitai no te tere, e aratai tia ˈtu to ratou manaˈo haava haapiihia ia ratou ia auraro ma te taiva ore i te Atua.—Philipi 3:8.

Ia atuatu noa to outou manaˈo haava i to ˈna puai e to ˈna afaro-tia-raa, mea hinaarohia te aratairaa tamau a te Parau a te Atua. Te na ô maira te Bibilia e te vai ra taua aratairaa ra ma te parau faahohoˈa e: “Na to outou tariˈa e faaroo i te hoê reo i muri mai ia outou, i te na ôraa e, Teie te eˈa: e na reira i te haere, ia haapehao ê i te pae atau e te pae aui.” (Isaia 30:21) No reira, a faataa i te taime no te taio i te Bibilia i te mau mahana atoa. E haapuai e e faaitoito te reira ia outou ia tutava outou i te rave i te mea tia aore ra ia faaruru outou i te tapitapi e te ahoaho. Ia papu ia outou e e aratai Iehova ia outou i te pae morare e te pae varua mai te peu e e tiaturi roa outou ia ˈna. Oia, a pee i te fatu salamo o tei papai e: “Ua tuu vau ia Iehova ei muâ ia ˈu; tei tau rima atau oia, e ore au e aueue.”—Salamo 16:8; 55:22.

[Nota i raro i te api]

[Hohoˈa i te api 5]

O te haapaoraa hape, ta te Bibilia i faataa mai ia “Babulonia Rahi,” te tumu e paruparu ai te manaˈo haava o te taata e rave rahi

[Faaiteraa i te tumu]

Perepitero e haamaitai ra i te mau nuu: U.S. Army photo

[Hohoˈa i te api 6]

E faaino te mataitairaa i te haavîraa uˈana e te morare ore i to outou manaˈo haava

[Hohoˈa i te api 7]

E paruru te aratairaa tamau a te Parau a te Atua i to outou manaˈo haava