Mau uiraa a te feia taio

I Ura anei aore ra i Harana to Iehova faaauraa i ta ˈna faufaa ia Aberahama?

To roto te faatiaraa matamua roa o te faufaa ta Iehova i faaau ia Aberahama i te Genese 12:1-3, o te na ô ra e: “I parau mai hoi Iehova ia Aberama, E haere ê mai oe i to fenua na, e to fetii, e te utuafare o to metua na, i te fenua na ˈu e faaite atu ia oe na: e faariro hoi au ia oe ei nunaa rahi . . . E ei ia oe e maitai ai te mau fetii atoa o te ao nei.” * Ua faaau paha Iehova i teie faufaa ia Aberahama a vai ai Aberahama i Ura e ua faahiti faahou oia i te reira a vai ai Aberahama i Harana.

I te senekele matamua, ua faahitihiti o Setephano i ta Iehova faaueraa ia haere o Aberahama i Kanaana. I mua i te Sunederi, teie ta ˈna i parau: “Ua faaite mai te Atua mana ia Aberahama i to tatou metua, a parahi ai oia i Mesopotamia ra, hou oia i parahi ai i Harana ra, ua na ô maira ia ˈna, E haere ê mai oe, e vaiiho atu i to fenua e to fetii atoa, e haere mai oe i teie nei fenua na ˈu e faaite atu ia oe.” (Ohipa 7:2, 3) Na mua, no Ura o Aberahama, e mai ta Setephano i faaite, i reira to ˈna faaroo-na-mua-raa i te faaueraa e haere i Kanaana. (Genese 15:7; Nehemia 9:7) Aita o Setephano i faahiti i te faufaa ta te Atua i faaau ia Aberahama, i roto râ i te Genese 12:1-3, ua taaihia taua faufaa ra i te faaueraa e haere i Kanaana. Mea tano ïa ia manaˈo e ua faaau Iehova i te faufaa ia Aberahama i Ura.

Teie râ, ia taio-maitai-hia te faatiaraa o te Genese, te itehia ra e ua parau faahou Iehova i ta ˈna faufaa i faaau ia Aberahama i Harana, mai ta ˈna i faahiti pinepine e i haamataratara i te mau tuhaa o te reira e rave rahi taime i Kanaana. (Genese 15:5; 17:1-5; 18:18; 22:16-18) Ia au i te Genese 11:31, 32, ua faarue o Tera, te metua tane o Aberahama, ia Ura no te haere i Kanaana, e o Aberahama, o Sara, e o Lota. Ua haere ratou i Harana e ua faaea i reira e tae noa ˈtu i te poheraa o Tera. Mea huru maoro to Aberahama faaearaa i Harana ia noaa mai te taoˈa rahi. (Genese 12:5) E i te hoê taime, ua haere atoa o Nahora, te tuaana o Aberahama, i reira.

I muri aˈe i te faatiaraa i te poheraa o Tera, te faahiti ra te Bibilia i ta Iehova i parau ia Aberahama e te na ô â ra e: “Haere atura Aberama, i ta Iehova i parau mai ia ˈna ra.” (Genese 12:4) No reira, te horoa ra te Genese 11:31–12:4 i te manaˈo puai ra e ua faahiti Iehova i te mau parau o te Genese 12:1-3 i muri aˈe i te poheraa o Tera. Mai te peu e tera iho â, ua faarue ïa Aberahama ia Harana e ua haere i te fenua ta Iehova e faaite ia ˈna ei auraroraa i te hoê faaueraa ta ˈna i faaroo noa ˈtura, e i te hoê atoa faaueraa ta ˈna i faaroo na tau matahiti na mua ˈtu i Ura.

Ia au i te Genese 12:1, ua faaue Iehova ia Aberahama: “E haere ê mai oe i to fenua na, e to fetii, e te utuafare o to metua na.” I te hoê taime, o Ura te “fenua” o Aberahama, e to reira te “utuafare” o to ˈna metua tane. Teie râ, ua aratai te metua tane o Aberahama i to ˈna utuafare i Harana, e ua parau aˈera Aberahama i taua vahi ra to ˈna fenua. E rave rahi matahiti i muri aˈe i Kanaana, i to ˈna tonoraa i ta ˈna tavini i ‘to ˈna ra fenua e to ˈna ra fetii’ ia itea mai te hoê vahine na Isaaka, ua haere te tavini i “te oire o Nahora” (i Harana aore ra i te tahi vahi tapiri). (Genese 24:4, 10) I reira to te tavini iteraa ia Rebeka i roto i te fetii o Aberahama, te utuafare rahi o Nahora.—Genese 22:20-24; 24:15, 24, 29; 27:42, 43.

I roto i ta ˈna paraparauraa i te Sunederi, teie ta Setephano i parau: “E pohe atura tana metua ra, . . . ua aratai maira te Atua ia [Aberahama] i teie nei fenua, e parahihia e outou nei.” (Ohipa 7:4) E tapao faaite ïa e ua paraparau Iehova ia Aberahama i Harana. Mea tano ïa ia manaˈo e i taua taime ra, ua faahiti faahou Iehova i ta ˈna faufaa i faaau ia Aberahama ia au i te Genese 12:1-3, i te mea e ua mana te faufaa i to Aberahama haereraa i Kanaana. No reira, e hopoi mai te hiˈopoaraa i te mau tupuraa atoa i te faaotiraa e ua faaau paha na mua Iehova i ta ˈna faufaa ia Aberahama i Ura e ua faahiti faahou oia i te reira i Harana.

[Nota i raro i te api]