1, 2. (a) No te aha i tiaturi papu ai outou e te here ra Iehova i to ˈna nunaa? (b) Ua poietehia te taata e teihea hinaaro?

 NO TE aha outou e tiaturi papu ai e te here ra Iehova i to ˈna nunaa? Hou a pahono ai i tera uiraa, a hiˈo na i teie mau hiˈoraa: E rave rahi matahiti i te maoro, ua faaitoito te mau taeae e te mau tuahine ma te hamani maitai i te hoê tuahine o Taylene te iˈoa. Ua parau ratou ia ˈna eiaha e titau rahi ia ˈna iho. Te parau ra oia: “Ahani aita Iehova i here ia ˈu, eita ïa ta ˈna mau aˈoraa e horoahia ma te tuutuu ore.” Ua parau o Brigitte o tei haapao i ta ˈna na tamarii e piti o ˈna anaˈe i muri aˈe a pohe ai ta ˈna tane: “E tautooraa fifi mau ia haapao i te tamarii i roto i te ao a Satani, no te hoê metua faaea taa noa iho â râ aita e apiti faahou. Ua papu râ ia ˈu i to Iehova here, no te mea ua aratai oia ia ˈu i te mau taime a taˈi ai e a oto noa ˈi au, e aita oia i vaiiho ia ˈu ia faaruru hau atu â i ta ˈu i nehenehe e faaoromai.” (Kor. 1, 10:13) Ua roohia Sandra i te hoê maˈi e aita e rapaauraa. I te hoê tairururaa, ua faaite te hoê tuahine i te  anaanatae mau ia Sandra. Ua parau te tane a Sandra: “Noa ˈtu e aita mâua i matau ia ˈna, ua hopoi mai to ˈna haapeapea hohonu i te oaoa rahi. Noa ˈtu mea haihai te mau tapao o te here o ta te mau taeae e tuahine e faaite mai, te haapapu râ te reira i to Iehova here no tatou.”

² Ua poiete Iehova i te taata ma te hinaaro e here e ia herehia ratou. Tera râ, mea ohie ia toaruaru no te maˈi aore ra no te fifi moni aore ra no te manuïa ore i roto i ta tatou taviniraa. Ia haamata tatou i te manaˈo e aita Iehova e here faahou ra ia tatou, e mea titauhia ia haamanaˈo e mea faufaa tatou no ˈna e tei pihaiiho noa oia ia tatou, a tapea noa ˈi i to tatou rima atau e a tauturu mai ai. Eita roa ˈtu oia e haamoe ia tatou, ia tapea râ tatou i te taiva ore ia ˈna.—Isa. 41:13; 49:15.

3. Eaha te nehenehe e haapuai i to tatou tiaturiraa e te here tamau ra Iehova ia tatou?

³ Ua tiaturi te mau Ite no Iehova i faahitihia i nia ˈtu e tei pihaiiho te Atua ia ratou i roto i te taime fifi. E nehenehe atoa tatou e tiaturi e tei pihaiiho oia ia tatou. (Sal. 118:6, 7) I roto i teie tumu parau, e hiˈopoa tatou i na ô e maha o te faaite ra e te here ra Iehova ia tatou. Te vai ra (1) te poieteraa, (2) te Bibilia, (3) te pure e (4) te hoo. Ia feruri maite tatou i nia i te mau mea maitai atoa ta Iehova i rave, e tauturu ïa te reira ia tatou ia haamauruuru atu â ia ˈna no to ˈna here tamau.—A taio i te Salamo 77:11, 12.

4. Eaha ta tatou e haapii mai ia hiˈo tatou i ta Iehova i poiete?

⁴ Ia hiˈo tatou i ta Iehova i poiete, te haapii ra tatou i to ˈna here mau no tatou. (Roma 1:20) Ei hiˈoraa, ua poiete Iehova i te fenua ia nehenehe tatou e rave hau atu â i te ora-noa-raa i reira. Ua horoa mai oia i te mau mea atoa ia fanaˈo tatou i te ora. Mea titauhia ia tamaa tatou, e no te rau o te maa o ta Iehova e horoa mai, e riro ïa te tamaaraa ei taime au mau! (Koh. 9:7) Te oaoa nei te hoê tuahine, o Catherine te iˈoa, i ta ˈna e ite ra i roto i te poieteraa, i te tau uaaraa tiare iho â râ i Kanada. Te parau ra oia: “Mea faahiahia roa ia ite mea nafea vetahi mau mea atoa i ora mai ai. Mai te mau tiare o tei faanahohia ia uaa faahou mai oia e te mau manu o tei hoˈi mai i to ratou vahi faaearaa, te vai atoa ra teie manu nainai roa o te parauhia colibri e o te ite i to ˈna eˈa no te haere i te vahi maa a te mau manu, i rapae au mai i te haamaramarama o ta ˈu vahi tamaaraa. Mea papu, no to Iehova here ia tatou, i horoa mai ai oia i te reira ia fanaˈo tatou i teie mau mea faahiahia mau.” Mea here na to tatou Metua i ta ˈna i poiete e te hinaaro râ oia ia fanaˈo atoa tatou i te reira.—Ohi. 14:16, 17.

5. I to ˈna poieteraa i te taata, mea nafea Iehova i te faaiteraa i to ˈna here?

⁵ Ua poiete Iehova ia tatou e te aravihi ia rave i te ohipa faufaa e ia oaoa i te reira. (Koh. 2:24) Ua horoa oia i te hopoia i te taata ia faaî i te fenua, ia faaapu i te reira, ia haapao i te mau iˈa, te mau manu e te mau  mea atoa ta ˈna i poiete. (Gen. 1:26-28) Ua poiete atoa oia ia tatou e te mau huru maitatai faahiahia mau ia nehenehe tatou e pee i to ˈna hiˈoraa.—Eph. 5:1.

6. Ia feruri maite tatou i nia i te Parau a te Atua, e tauturu te reira ia tatou ia ite i te aha?

⁶ Ua horoa mai Iehova i te Bibilia no to ˈna here rahi no tatou. Te faaite mai ra te Bibilia i ta tatou e hinaaro ra e ite no nia ia Iehova e i to ˈna huru aau i nia i te taata. Ei hiˈoraa, te parau atoa mai ra te Bibilia eaha to Iehova huru i nia i te mau Iseraela o tei faaroo ore noa ia ˈna. Te parau ra te Salamo 78:38: “Oia râ, no te î i te aroha, ua faaore aˈera i ta ratou hara, e aore aˈera i rave pohe roa ia ratou; ua faahoˈi pinepine ra oia i te riri, e aore to ˈna riri i faahope-hua-hia.” Ma te feruri maite i nia i teie irava, e nehenehe te  reira e tauturu ia outou ia ite e te here ra e te haapao ra Iehova ia outou. Parau mau, te haapeapea mai ra Iehova ia tatou.—A taio i te Petero 1, 5:6, 7.

7. No te aha mea faufaa roa te Bibilia no tatou?

⁷ Mea faufaa roa te Bibilia no tatou. No te aha? No te mea te paraparau mai ra Iehova ia tatou maoti ta ˈna Parau. Ia aparau ohie noa te hoê metua e te hoê tamarii, e puai iho â to raua here e tiaturiraa te tahi i te tahi. O Iehova to tatou Metua î i te here. Noa ˈtu e aita tatou i ite mata roa ia ˈna aore ra i faaroo i to ˈna reo, mai te huru ra e te paraparau roa mai ra oia ia tatou maoti te Bibilia. Mea titauhia ia faaroo noa tatou ia ˈna! (Isa. 30:20, 21) A taio ai i te Parau a te Atua, e ite atu â tatou o vai o Iehova e e tiaturi tatou ia ˈna o te aratai ra e o te paruru ra ia tatou.—A taio i te Salamo 19:7-11; Maseli 1:33.

8, 9. Eaha ta Iehova e hinaaro ia ite tatou? A horoa i te hoê hiˈoraa no roto mai i te Bibilia.

⁸ Te hinaaro ra Iehova ia ite tatou e te here mai ra oia ia tatou. Ua ite oia hau atu i to tatou huru taata tia ore, no te mea te hiˈo ra oia i te maitai i roto ia tatou. (Par. 2, 16:9) A hiˈo na mea nafea Iehova i te iteraa i te maitai o te arii Iehosaphata no Iuda. Ua rave Iehosaphata i te hoê faaotiraa ino ma te apiti atu i te arii Ahaba no Iseraela e ma te aro atu i to Arama i Ramota-gileada. Noa ˈtu e ua parau na 400 peropheta haavare i teie taata ino o Ahaba e e upootia mai oia, ua parau râ te peropheta mau a Iehova o Mikaia e ia aro Iehosaphata e Ahaba, e pau iho â raua. E tera iho â tei tupu. Ua pohe Ahaba i roto i te tamaˈi e ua fatata Iehosaphata i te pohe. I muri aˈe i te tamaˈi, ua faaohipa Iehova ia Iehu no te aˈo ia Iehosaphata no ta ˈna hape. Ua parau atoa Iehu ia ˈna: ‘Te vai râ te ohipa maitatai i roto ia oe na.’—Par. 2, 16:9; 18:4, 5, 18-22, 33, 34; 19:1-3.

⁹ I te mau matahiti i na mua ˈtu, ua parau Iehosaphata i te mau hui arii, te mau ati Levi e te mau tahuˈa ia haere i roto i te mau oire atoa no Iuda no te haapii atu i te taata i te Ture a Iehova. No te mea ua manuïa maitai ta ratou ohipa, ua haapii atoa te tahi atu mau nunaa no nia ia Iehova. (Par. 2, 17:3-10) No reira, noa ˈtu e ua rave Iehosaphata i te hoê faaotiraa ino i muri aˈe, aita Iehova i haamoe i te mau ohipa maitai ta ˈna i rave na i roto i to ˈna oraraa. E hiˈoraa tamahanahana mau â teie no tatou, no te mea i te tahi mau taime, e hape iho â tatou. Ia tutava râ tatou i te tavini ia Iehova, e tamau oia i te here ia tatou e eita oia e haamoe i te mau ohipa maitai ta tatou i rave.

10, 11. (a) No te aha e ô taa ê te pure no ǒ mai ia Iehova ra? (b) Eaha te huru aau e titauhia ia tatou a pure ai ia Iehova? (A hiˈo i te hohoˈa matamua.)

¹⁰ E rave te hoê metua î i te here i te taime no te faaroo i ta ˈna mau tamarii ia hinaaro ratou e paraparau ia ˈna. E hinaaro oia e ite i to ratou huru aau no to ˈna haapeapea rahi ia ratou. E na reira atoa to tatou Metua î i te here ra o Iehova. E faaroo oia ia tatou a pure ai ia ˈna. E fanaˈoraa taa ê faufaa mau ia paraparau atu i to tatou Metua!

¹¹ E nehenehe tatou e pure ia Iehova i te mau taime atoa. O ˈna to tatou Hoa e ua ineine noa oia i te faaroo i ta tatou mau pure. Te parau ra o Taylene i faahitihia i nia ˈtu, “E nehenehe oe e paraparau noa ia ˈna no nia i te mau mea atoa i te mau vahi atoa.” Ia faaite tatou ia Iehova i to tatou mau manaˈo hohonu,  e pahono mai oia ia tatou maoti te hoê irava, te hoê tumu parau o ta tatou mau papai aore ra te faaitoitoraa a te hoê taeae aore ra te hoê tuahine. E faaroo Iehova i ta tatou mau aniraa haavare ore e e taa atoa ia ˈna ia tatou, noa ˈtu aita vetahi e taa ia tatou. Te haapapu mai ra ta ˈna mau pahonoraa o ta tatou mau pure i to ˈna here tamau ia tatou.

12. No te aha mea faufaa ia haapii tatou i te mau pure e vai ra i roto i te Bibilia? A faataa.

¹² E nehenehe tatou e huti mai i te mau haapiiraa faufaa i te mau pure e vai ra i roto i te Bibilia. I te tahi mau taime, mea faufaa ia haapii i te tahi o teie mau pure i te arui haamoriraa utuafare. E maitai mai ta tatou mau pure ia feruri maite tatou i nia i te mau pure haavare ore a te mau tavini a Iehova i tahito ra. Ei hiˈoraa, a haapii i te pure haehaa a Iona o ta ˈna i faahiti mai mai roto mai i te opu o te iˈa rahi. (Iona 1:17–2:10) A haamanaˈo na i te pure haavare ore a Solomona ia Iehova a avarihia ˈi te hiero. (Arii 1, 8:22-53) E a feruri maite i nia i te pure tuiroo a Iesu. (Mat. 6:9-13) Te mea faufaa roa ˈtu â, e ‘faaite hua i to outou iho â râ hinaaro i te mau mea atoa nei i te Atua.’ Ia na reira outou, “na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo.” E rahi mai ïa to tatou mauruuru i to Iehova here tamau ia tatou.—Phil. 4:6, 7.

13. Eaha ta tatou e fanaˈo maoti te hoo?

¹³ Ua horoa mai Iehova i te ô o te hoo “ia ora tatou.” (Ioa. 1, 4:9) A faahiti ai i teie faaiteraa faahiahia mau o to te Atua here, ua papai te aposetolo Paulo: “I pohe ai te Mesia i te tau mau ra, no te feia paieti ore ra. E ore hoi te hoê e haapohe no te tahi taata parau-tia, e faaoromai râ paha te hoê taata ˈtu i te pohe no te taata maitai. Ua faarahi râ te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei.” (Roma 5:6-8) O te hoo te hiˈoraa rahi mau o te here o te Atua, ua horoa te reira i te ravea ia nehenehe te taata e fanaˈo i te hoê taairaa piri roa e o ˈna.

14, 15. Eaha te auraa o te hoo no (a) te mau Kerisetiano faatavaihia? (b) te feia e tiaturi ra e ora i te fenua nei?

¹⁴ Ua ite te hoê pǔpǔ Kerisetiano iti i to Iehova here tamau ma te hoê ravea taa ê mau. (Ioa. 1:12, 13; 3:5-7) Ua faatavai Iehova i teie feia maoti te varua moˈa e ma te na reira, e riro ïa ratou ei tamarii na ˈna i teie nei. (Roma 8:15, 16) I te mea ra e te ora faahou ra vetahi o ratou i te fenua nei, no te aha Paulo i parau ai e ‘ua haaparahihia ratou i nia i te raˈi e hoê e Iesu Mesia’? (Eph. 2:6) No te mea, ua horoa Iehova ia ratou i te tiaturiraa e ora e a muri noa ˈtu i te raˈi.—Eph. 1:13, 14; Kol. 1:5.

¹⁵ E nehenehe te feia aita i faatavaihia e riro mai ei hoa o te Atua ia faaite ratou i te faaroo i te hoo. E nehenehe atoa ratou e riro mai ei tamarii a te Atua e e ora e a muri noa  ˈtu i roto i te paradaiso i te fenua nei. Te haapapu ra te hoo i to Iehova here no te taata atoa. (Ioa. 3:16) Mea faahiahia ia ite e ia tavini tatou i te Atua ma te taiva ore, e horoa mai oia i te hoê oraraa maitai i roto i te ao apî! E faaite anaˈe ïa e te haafaufaa ra tatou i te hoo, oia hoi te haapapuraa rahi mau o to te Atua here tamau no tatou.

16. Eaha ta tatou e rave i muri aˈe i te feruri-maite-raa i nia i to te Atua here?

¹⁶ Eita e nehenehe e taio i te ravea e rave rahi i faaite ai Iehova i to ˈna here ia tatou. Ua himene te arii Davida: “O te maitai o to mau manaˈo ia ˈu nei, e te Atua e! e te rahi-roa-raa o to mau manaˈo ia taiohia e! Ia taiohia e au ra, e rahi ïa te reira i te one tahatai.” (Sal. 139:17, 18) E turai mai te feruri-maite-raa i te ravea e rave rahi ia faaite atoa i to tatou here ia ˈna e ia horoa ˈtu i te mea maitai roa ˈˈe na ˈna.

17, 18. Eaha te tahi mau ravea e faaite ai tatou i to tatou here i te Atua?

¹⁷ E rave rahi ravea e faaite ai tatou ia Iehova e te here ra tatou ia ˈna. Ei hiˈoraa, e nehenehe tatou e faaite i to tatou here ia Iehova ma te paraparau ia vetahi ê no nia i te parau apî oaoa o te Basileia ma te itoito rahi. (Mat. 24:14; 28:19, 20) E nehenehe atoa tatou e faaite i te here i te Atua ma te tapea i te taiva ore a faaoromai ai i te mau fifi o te tamata ra i to tatou faaroo. (A taio i te Salamo 84:11; Iakobo 1:2-5.) Noa ˈtu mea uˈana mau to tatou mau fifi, ia papu ia tatou e te ite mai ra Iehova i to tatou mauiui e e tauturu mai iho â oia, no te mea mea faufaa tatou no ˈna.—Sal. 56:8.

¹⁸ E turai mai to tatou here ia Iehova ia feruri maite i te mau ohipa faahiahia atoa ta ˈna i poiete. Te faaite ra tatou ia Iehova e te here ra tatou ia ˈna e te haafaufaa ra tatou i ta ˈna Parau ma te riro mai ei taata haapii Bibilia maitai. E pure tamau tatou ia Iehova no to tatou here ia ˈna e te hinaaro ra tatou e haapuai i to tatou taairaa e o ˈna. E ia feruri maite tatou i nia i teie ô faufaa mau o te hoo, e rahi mai atu â ïa to tatou here. (Ioa. 1, 2:1, 2) Teie te tahi noa o te ravea e rave rahi e faaite ai tatou ia Iehova e te haafaufaa ra tatou i to ˈna here tamau ia tatou.