UA PARAU mai to ˈu mama: “No te aha aita oe e haamori i to oe mau tupuna? Aita oe i taa e maoti ratou i ora mai ai oe? Aita anei oe e hinaaro e faaite i to oe mauruuru ia ratou? No te aha oe e haapae ai i te mau peu tumu i horoahia e te mau uˈi i mairi. Ma te ore e faahanahana i to tatou mau tupuna, te auraa ïa e e mea maamaa ta tatou haamoriraa.” I muri aˈe a parau ai i te reira, ua haamata mama i te taˈi.

Tau avaˈe noa na mua ˈˈe i te reira, ua ani te mau Ite no Iehova i to ˈu mama ia haapii i te Bibilia. Aita oia i hinaaro e haapii. Ma te faatura râ, ua faanaho oia ia haapii ratou ia ˈu. E i muri iho, ua riri roa oia ia ˈu, e ere i tei matauhia e au, no te mea ua auraro noa vau ia ˈna. No to ˈu râ hinaaro e faaoaoa ia Iehova, i tera taime, aita vau i faaroo ia ˈna. E ere i te mea ohie, ua horoa mai râ Iehova i te itoito.

E feia haamori to ˈu utuafare ia Bouddha, mai te rahiraa o te taata i Tapone. E piti râ avaˈe i muri iho i ta ˈu haapiiraa Bibilia e te mau Ite no Iehova, ua papu ia ˈu e e mea mau iho â ta te Bibilia e parau ra. I to ˈu haapiiraa e e Metua to ˈu i te raˈi, ua hinaaro iho â vau e ite o vai mau â oia. I te taime matamua, ua oaoa roa mâua mama i te paraparau no nia i ta ˈu i haapii. Ua haamata vau i te haere i te mau putuputuraa o te Piha a te Basileia i te Tapati. A haere noa ˈi ta ˈu haapiiraa i mua, ua ani au ia mama e te hinaaro nei au e faaea i te haere i te mau oroa e ravehia ra no Bouddha. Taui oioi atura to ˈna haerea. Ua parau oia: “Mea haama, ia ore hoê o te utuafare e here i to tatou mau tupuna.” Ua parau oia ia ˈu ia faaea i te haapii i te Bibilia e i te haere i te mau putuputuraa. Aita roa ˈtu vau i manaˈo e e na ô mai mama i te parau! E au ra e e taata ê roa oia.

Ua farii papa i to mama manaˈo. Ua haapii au i roto i te Ephesia pene 6 e te hinaaro ra Iehova ia auraro vau i to ˈu na metua. Ua hinaaro vau ia ite faahou to ˈu utuafare i te hau e ua manaˈo vau e ia faaroo vau ia raua, e faaroo atoa mai raua i to ˈu manaˈo. I tera taime, mea titauhia ia faaineine au i ta ˈu hiˈopoaraa haapiiraa, e no na avaˈe e toru, ua farii au i ta to ˈu na metua i parau mai. Tera râ, ua euhe au ia Iehova e e apiti faahou vau i te mau putuputuraa ia oti na avaˈe e toru.

E ere râ ta ˈu faaotiraa i te mea tano. Teie na tumu e piti. A tahi, ua manaˈo vau e ia oti na avaˈe e toru, te vai noa ra te hinaaro puai e tavini ia  Iehova. Aita râ, ua haamata to ˈu taairaa e o ˈna i te iti oioi mai. Te piti, ua tutava noa mama raua papa ia faaea iho â vau i te tavini ia Iehova.

I te Piha a te Basileia, ua farerei au e rave rahi Ite no Iehova o tei patoihia e to ratou utuafare. Ua haapapu mai ratou e e faaitoito mai Iehova ia ˈu. (Mat. 10:34-37) Ua faataa mai ratou ia ˈu e ia vai taiva ore au ia Iehova, e nehenehe to ˈu utuafare e haapii no nia ia ˈNa. Ua hinaaro vau e tiaturi ia Iehova, e ua haamata vau i te pure ma te uˈana.

Ua patoi mai to ˈu utuafare ma te mau ravea rau. Ua taparuparu mama ia faaea vau i te haapii i te Bibilia a tamata ˈi i te haaferuri ia ˈu. I te rahiraa o te taime, ua mamû noa vau. Ia faaite au i to ˈu manaˈo, e pinepine mâua i te tatamaˈi no te mea e tamata mâua i te haapapu to vai manaˈo te mea tano. I teie nei, ua taa ia ˈu e ahani au i faatura ˈtu â i to mama mau huru aau e manaˈo, e mǎrû mai atu â ïa te tupuraa. Ua horoa rahi mai to ˈu na metua i te ohipa ia faaea vau i te fare. I te tahi mau taime, ua tamau raua i te opani ia faaea vau i rapae i te fare aore ra aita raua i vaiiho mai i te maa.

Ua ani mama ia vetahi no te faataui i to ˈu manaˈo. Ua paraparau oia i ta ˈu orometua, aita râ te reira i tupu. Ua afai mama ia ˈu i ta ˈna paoti ohipa no te turai ia ˈu ia tiaturi e mea faufaa ore te mau haapaoraa atoa. Ua taniuniu atoa mama i to matou mau fetii a taˈi noa ˈi oia no te taparu i ta ratou tauturu. Ua riri roa vau. Teie râ, i te mau putuputuraa, ua haamanaˈo mai te mau matahiapo ia ˈu e i to mama paraparauraa ia vetahi ê i to matou tupuraa, te poro atoa ra oia ma te ite ore.

 Ua hinaaro to ˈu na metua ia haere au i te haapiiraa teitei ia nehenehe au e imi i te hoê ohipa. No te mea, ua riri matou pauroa, eita e nehenehe e tauaparau no nia i te reira na roto i te mǎrû. Ua papai ïa vau e rave rahi rata na raua no te faataa ˈtu i ta ˈu mau opuaraa. Ua hae roa papa a parau atu ai: “Mai te peu e e manaˈo oe e e noaa iho â ia oe i te hoê ohipa, a haere e imi ananahi aore ra e faarue oe i teie fare.” Ua ani au i ta Iehova tauturu na roto i te pure. I te mahana i muri iho, a poro ai au, ua ani mai e piti tuahine ia haapii au i ta raua mau tamarii. Aita to ˈu papa i au i te reira. Ua faaea ïa papa i te paraparau ia ˈu e ua haamata oia i te ore e tâuˈa ia ˈu. Ua parau mai mama e mea au aˈe na ˈna ia riro vau ei taata ohipa ino, eiaha râ ei Ite no Iehova.

I te tahi mau taime, aita vau i papu e ua hinaaro anei Iehova ia patoi vau i to ˈu na metua mai tera. No reira vau i pure ai ia Iehova e i feruri maite ai i nia i ta te Bibilia e parau ra no nia i to ˈna here. Ua tauturu te reira ia ˈu ia maitai atu â to ˈu manaˈo e ia taa e i patoi ai to ˈu na metua, no to raua ïa hepohepo no ˈu. Ua tauturu mai Iehova ia ˈu ia faaafaro i to ˈu huru feruriraa e ia ite eaha te rave. Oia atoa, hau atu â vau i te haere e poro, rahi atu â vau i te au i te reira. E, ua hinaaro iho â vau e riro ei pionie.

A faaroo ai te tahi mau tuahine e ua hinaaro vau e riro mai ei pionie, ua parau mai ratou ia ˈu e mea titauhia ia tiai au ia mǎrû mai to ˈu na metua. Ua pure au no te fanaˈo i te paari, ua rave au i te mau maimiraa, ua feruri au i te mau tumu i hinaaro ai au e riro ei pionie, e ua tauaparau vau i te mau taeae e tuahine aravihi. Ua faaoti ïa vau e faaoaoa ia Iehova. Ua taa atoa ia ˈu, noa ˈtu e tiai au tau taime hou a riro mai ai ei pionie, e nehenehe to ˈu na metua e patoi mai ia ˈu.

Ua haamata vau i te rave i te taviniraa pionie i te taime hopea o ta ˈu haapiiraa tuarua. I muri aˈe a riro mai ai ei pionie, ua opua vau e haere i roto i te tahi vahi e hinaaro-rahi-hia ra te tauturu. Aita râ papa raua mama i hinaaro ia faarue au i te fare. Ua tiai ïa vau i te 20raa o to ˈu matahiti. Ua ani au i te amaa ia haere au e poro i te pae Apatoa piri noa ˈtu i to ˈu mau fetii, ia ore mama e haapeapea rahi.

I te roaraa o ta ˈu taviniraa, ua oaoa roa vau i te ite e rave rahi o ta ˈu mau piahi Bibilia tei bapetizohia. Ua haamata vau i te haapii i te reo Beretane no te mea ua hinaaro vau e horoa rahi atu â i roto i ta ˈu taviniraa. I muri iho, i to ˈu iteraa i te itoito o na pionie taa ê e piti i roto i ta ˈu amuiraa e e mea nafea raua i te tautururaa ia vetahi ê, ua faaoti au e riro mai ei pionie taa ê. I te roaraa o tera taime, e piti taime a maˈihia mama i te hoê maˈi ino mau. E ia taimehia, e hoˈi au i te fare no te tauturu ia ˈna e ua maere roa oia. E ua maitai atu â to ˈu mama i nia ia ˈu.

E hitu matahiti i muri aˈe, ua hapono mai Atsushi, hoê o na pionie taa ê o ta ˈu i faahiti na, i te hoê rata. Ua anaanatae oia i te faaipoipo e ua ani mai oia eaha to ˈu manaˈo no nia ia ˈna. Aita roa ˈtu to ˈu e manaˈo faahinaaro no Atsushi, e aita atoa vau i ite eaha to ˈna manaˈo no nia ia ˈu. Hoê avaˈe i muri aˈe, ua pahono atu vau ia ˈna e ua hinaaro vau e ite maitai atu â no nia ia ˈna. Ua taa ia mâua e ua tuea ta mâua mau fa. Ua hinaaro mâua e tamau i te tavini ei pionie taime taatoa e ua ineine mâua i te farii i te hopoia atoa. E ua faaipoipo mâua. Ua oaoa roa vau e ua haere mai mama, papa e te tahi atu mau fetii i to mâua faaipoiporaa.

Tau taime i muri aˈe, a tavini ai mâua ei pionie tamau, ua maitihia o Atsushi ei mono tiaau haaati. I muri aˈe, ua titauhia ia mâua ia riro ei pionie  taa ê e i muri iho ia rave i te taviniraa haaati ma te tamau. A oti ai te mau amuiraa atoa i te farereihia i roto i ta mâua tuhaa haaati no te taime matamua, ua taniuniu mai te amaa ia mâua. Ua ani mai ratou e ua ineine anei mâua i te haere i te fenua Népal a faaea noa ˈi mâua i roto i te tuhaa haaati.

Ua haapeapea roa vau i te manaˈo o to ˈu na metua ia haere atea vau. I to ˈu taniuniuraa ia raua, ua pahono mai to ˈu papa: “E haere orua i te hoê vahi nehenehe mau.” Hoê hebedoma na mua ˈtu, ua horoa hoê o to ˈna hoa i te hoê buka no nia ia Népal e ua manaˈo papa e e vahi nehenehe tera no te haere e mataitai.

Ua oaoa roa mâua i rotopu i te mau hoa no Népal. I muri aˈe, ua tuu-atoa-hia mai te fenua Bangladesh i roto i ta mâua tuhaa haaati. Noa ˈtu mea piri roa ia Népal, mea taa ê roa râ i ǒ. Ua ite mâua e rave rau huru taviniraa. I muri aˈe e pae matahiti, ua tonohia mâua i te fenua Tapone, e te oaoa nei mâua i roto i teie tuhaa haaati.

Ua haapii rahi au no nia ia Iehova a tavini ai i Tapone, Népal e i Bangladesh. Mea taa ê te taˈere e te mau peu tumu a te feia o tera fenua. Mea taa ê roa te tahi taata i te tahi taata. Ua ite au mea nafea Iehova i te aupururaa i te taata taitahi, i te fariiraa, i te tautururaa e i te haamaitairaa ia ratou.

E rave rahi tumu e haamauruuru ai au ia Iehova. Ua farii oia ia ite au o vai o ˈna e ia rave i ta ˈna ohipa. Ua horoa mai oia i te hoê tane Kerisetiano maitai. Ua tauturu mai Iehova ia ˈu ia rave i te mau faaotiraa maitai. E i teie nei, e taairaa maitai to ˈu e o ˈna e e to ˈu utuafare. Mauruuru ia Iehova, ua riro faahou mâua mama ei hoa maitai. Te haamauruuru nei au e ua ite au i te hau e te Atua e e to ˈu mama.