Pahonoraa i na uiraa e maha no nia i te hopea

UA TOHU Iesu Mesia i te mahana ‘i reira te hopea’ e tae mai ai. Teie ta ˈna i parau no taua taime ra: “E ati rahi . . . tei te reira tau, aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu.”—Mataio 24:14, 21.

No ta Iesu mau parau e te tahi atu mau irava Bibilia no nia i te hopea, e hiti mai te tahi mau uiraa faufaa. No te aha e ore ai e rave i ta oe Bibilia e e taio i te mau pahonoraa ta te reira e horoa ra?

1 Te hopea o te aha?

Aita te Bibilia e haapii ra e e haamouhia te fenua iho. “Na [te Atua] i haamau i te tumu o te fenua, ia ore roa ia aueue,” ta te fatu salamo i papai. (Salamo 104:5) Aita atoa e haapii ra e na te auahi rahi e haamou i te ora atoa i te fenua nei. (Isaia 45:18) Ua faaite Iesu e e ora ˈtu vetahi i te hopea. (Mataio 24:21, 22) Te hopea o te aha ïa?

Te hopea o te faatereraa taata. Ua aratai te Atua i te peropheta Daniela ia papai: “E faatupu . . . te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.”—Daniela 2:44.

Te hopea o te tamaˈi e te haaviiviiraa. No te faataa i ta te Atua e rave, te na ô ra te Salamo 46:9: “Ua faaore oia i te tamaˈi e tae roa aˈenei i te hopea fenua! ua ofati oia i te fana, e ua tâpûpû i te mahae, e ua tahuhia te mau pereoo tamaˈi ra i te auahi.” Te haapii atoa ra te Bibilia e e “haamou [te Atua] i te feia tei haaviivii i to te ao nei.”—Apokalupo 11:18, V.C.J.S., huriraa Katolika reo Tahiti (1976).

 Te hopea o te taparahiraa taata e te parau-tia ore. Te fafau ra te Parau a te Atua: “Na te feia piˈo ore . . . e parahi i te fenua, e te feia parau-tia te haapapuhia i reira; e tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.”—Maseli 2:21, 22.

2 Te hopea, afea?

Ua faataa te Atua ra o Iehova i te “tau” e haamou ai oia i te ino e e faatere ai to ˈna Basileia i te fenua atoa. (Mareko 13:33) Te faaite maitai maira râ te Bibilia e eita tatou e nehenehe e ite i tera taio mahana. Ua parau Iesu: “Area te reira mahana e te reira hora, e ore roa te hoê e ite, e ore hoi te mau melahi o te raˈi; maori râ o tau Metua anaˈe ra.” (Mataio 24:36) Ua tohu râ Iesu e ta ˈna mau pǐpǐ i te mau huru tupuraa i te fenua nei hou te Atua e haamou ai. Ia tupu teie mau mea atoa i te hoê â taime e na te ao atoa nei, o te hopea ihora i reira.

Tauiraa rahi i ore i itehia aˈenei i te pae o te poritita, heipuni, e totiare. No nia i te hopea, ua pahono Iesu i ta ˈna mau pǐpǐ: “E tia mai . . . te tahi fenua e aro mai i te tahi fenua, e te tahi basileia e aro mai i te tahi basileia; e e aueue te fenua, i tera vahi, i tera vahi, e te oˈe, e te tiarepu: o te matamehai ïa o te ati.” (Mareko 13:8) Ua papai te aposetolo Paulo: “E tupu te ati rahi i taua anotau hopea nei . . . E riro te taata nei ei miimii, e nounou moni, e faaahaaha, e teoteo, e faaino, e faaroo ore i te metua, e mauruuru ore, e te viivii, e aroha ore, e tahemo parau au, e pari haavare noa, e haapao ore, e iria, e te au ore i te taata maitatai ra, e haavare, e mârô, e faateitei, e te hinaaro i te mau mea e navenave ai ra aore hinaaro i te Atua.”—Timoteo 2, 3:1-5.

Pororaa na roto i te reo rau e ati aˈe te ao. Ua parau Iesu: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.”—Mataio 24:14.

3 Te hopea e eaha ˈtu ai?

Aita te Bibilia e haapii ra e e ravehia ˈtu te feia maitatai atoa no te ora e a muri noa ˈtu i nia i te raˈi. Ua haapii râ Iesu e e tupu iho â te opuaraa matamua a te Atua no te huitaata, a na ô ai oia: “E ao to tei mǎrû; e riro hoi ia ratou te fenua.” (Mataio 5:5; 6:9, 10) No te feia tei pohe hou te hopea, ua fafau te Bibilia i te hoê faatia-faahou-raa. (Ioba 14:14, 15; Ioane 5:28, 29) Eaha ïa to muri mai i te hopea?

Ei Arii o te Basileia o te Atua, e faatere mai Iesu mai te raˈi mai. Ua papai te peropheta Daniela: “Hiˈo ihora vau i taua orama i te rui ra, e inaha, te hoê mai te Tamaiti a te taata ra [Iesu tei faatiahia] i te haerea mai na roto i te mau ata o te raˈi ra; e ua haafatata ˈtura oia i To te mau mahana tahito ra [te Atua ra o Iehova], e tuuhia ihora i pihai iho ia ˈna. E ua horoahia maira te mana, e te hinuhinu, e te basileia no ˈna [Iesu], ia auraro mai te taata atoa, e te mau fenua atoa, e te reo atoa ia ˈna; to ˈna mana, e mana mure ore ïa, e ore ïa e mou, e to ˈna basileia, e ore ïa e pau.”—Daniela 7:13, 14; Luka 1:31, 32; Ioane 3:13-16.

E oraraa maitai roa, panoonoo ore, e mure ore to te feia e auraro i te Basileia o te Atua. Ua papai te peropheta Isaia: “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu.” (Isaia 65:21-23) No taua tau ra, ua papai te aposetolo Ioane: “Inaha tei ǒ te taata ra te sekene o te Atua, e e parahi oia i roto ia ratou  ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.

4 Ia aha oe no te ora ˈtu i te hopea?

Ua faaite te aposetolo Petero e e tâhitohito vetahi o te feia e ora i te anotau hopea ma te parau e eita roa ˈtu te Atua e faaô ia ˈna i roto i te mau ohipa a te taata e e faaore i te ino i te fenua nei. (Petero 2, 3:3, 4) No reira Petero e faaitoito ai ia tatou i teie mahana ia pee i te mau faaueraa i muri nei.

A haapii na roto i te tuatapaparaa. Aita te Atua “i faaherehere i to te ao nei i tahito ra, faaora ihora râ ia Noa i te taata i aˈo i te parau-tia ra, o te toovau ïa i te feia i faaorahia ra, a hopoi mai ai oia i te diluvi i teie nei ao paieti ore,” ta Petero i papai. (Petero 2, 2:5) No nia i te feia tâhitohito, ua na ô oia: “Te tia ra . . . ia ratou te haamoe i teie, e na te parau a te Atua i hamani i te raˈi i tahito ra, e te fenua i vai i raro i te miti, e tei araa i nia i te miti: i pohe ai te reira fenua i te  ninaraahia e te miti: area te raˈi e te fenua * e vai nei, te tapeahia nei ïa e taua parau ra no te auahi ia tae i te mahana haavaraa, i te poheraa o te feia paieti ore ra.”—Petero 2, 3:5-7.

A ora ia au i te mau ture aveia morare a te Atua. Te na ô ra Petero e e faaite te feia e hinaaro ra e ora ˈtu i te hopea i te hoê ‘huru taata haapao maitai e te paieti.’ (Petero 2, 3:11) Te auraa ïa, e titau hau atu â te reira i te parau-noa-raa e e faaroo to tatou aore ra i te tutavaraa i te faatupu i te taairaa e te Atua i te taime hopea roa no te ora-noa-raa ˈtu.

Eaha te huru taata ta te Atua e au? No te aha e ore ai e faaau i ta oe i ite e ta te Bibilia e haapii ra no nia i te reira? E oaoa te mau Ite no Iehova i te tauturu ia oe. A ani ia ratou ia faaite mai i roto i ta oe Bibilia i ta ratou mau pahonoraa. Ia na reira oe, e hiˈo oe i te ananahi ma te itoito e te tiaturi noa ˈtu te mau ohipa riaria e haaati nei ia tatou.

[Nota i raro i te api]

[Parau iti faaôhia i te api 7]

Eita te fenua e mou, oia râ te feia e tuino ra ia ˈna