E te feia apî, e nafea i to outou oraraa?
E te feia apî, e nafea i to outou oraraa?
“Te moto nei au eiaha mai te mea e, e moto i te mataˈi.”—KOR. 1, 9:26.
1, 2. Eaha te titauhia no te manuïa a paari mai ai oe?
IA OPUA oe e haere i te hoê vahi matau ore, e rave paha oe i te hoê hohoˈa fenua e te hoê aveia. Maoti te hohoˈa fenua e ite ai oe teihea roa oe, a faanaho atu ai i to tere. E tauturu te aveia ia oe ia faaea noa i nia i te eˈa maitai. Aita râ e faufaa rahi to na mea e piti aita anaˈe oe i ite e te haere ra oe ihea, no te mea e ihu oe.
2 Hoê â huru ia paari mai oe. Te vai ra ia oe te hoê hohoˈa fenua papu e te hoê aveia. O te Bibilia te hohoˈa fenua o te tauturu ia oe ia maiti i te eˈa tano. (Mas. 3:5, 6) Ia haapii-maitai-hia, o to manaˈo haava te aveia o te tauturu mau ia oe ia faaea noa i nia i taua eˈa ra. (Roma 2:15) Ia manuïa râ to oraraa, ia ite atoa oe ihea oe e haere ai. Mea faufaa ia haamau oe i te mau fa papu.
3. Ia au i ta Paulo i faahiti i roto i te Korinetia 1, 9:26, eaha te mau maitai ia haamau i te mau fa?
3 Ua faataa poto te aposetolo Paulo i te mau maitai ia haamau i te mau fa e ia tutava ia raea te reira, i to ˈna papairaa: “Te horo nei au, eiaha mai te mea e aore i itea; te moto nei au eiaha mai te mea e, e moto i te mataˈi.” (Kor. 1, 9:26) E horo papu oe mai te peu e e fa ta oe. E rave iho â oe i te tahi mau faaotiraa faufaa no nia i te haamoriraa, te ohipa, te faaipoiporaa, te utuafare, e te vai ra ˈtu â. I te tahi taime, eita oe e taa faahou e nafea râ no te rau o te maitiraa. Ia faanaho atea râ oe i to tere, ma te niu i ta oe mau faaotiraa i nia i te pue parau mau e faaueraa tumu Bibilia, eita ïa oe e hahi ê.—Tim. 2, 4:4, 5.
4, 5. (a) Eaha te tupu ia ore oe e haamau i te mau fa? (b) No te aha e rave ai i te mau maitiraa no te faaoaoa i te Atua?
4 Ia ore oe e haamau i te mau fa, na to oe ïa mau hoa e orometua haapii e faahepo ia oe ia rave i ta ratou e manaˈo ra e mea maitai. Noa ˈtu e e fa papu ta oe, e faaite mai iho â vetahi i to ratou manaˈo. A faaroo ai oe ia ratou, a ui, ‘E tauturu anei ta ratou mau fa ia ˈu ia haamanaˈo i tei Hamani ia ˈu i to ˈu apîraa aore ra ia haamoe ia ˈna?’—A taio i te Koheleta 12:1.
5 No te aha e rave ai i te mau maitiraa i roto i te oraraa no te hinaaro e faaoaoa i te Atua? Ua horoa mai hoi Iehova i te mau mea maitatai atoa. (Iak. 1:17) Ia mauruuru ïa te taata atoa ia ˈna. (Apo. 4:11) Aita ˈtu e ravea maitai aˈe no te faaite i to mauruuru, maori râ te haamanaˈoraa ia Iehova ia haamau oe i te mau fa, e ere anei? E hiˈo mai tatou eaha te mau fa e hoona e eaha te rave ia raea te reira.
Eaha te mau fa e haamau?
6. Eaha te fa faufaa ta oe e haamau, e no te aha?
6 Ia au i to na mua ˈtu tumu parau, te hoê fa faufaa ta oe e haamau, o te hiˈopoaraa ïa e e parau mau anei ta te Bibilia. (Roma 12:2; Kor. 2, 13:5) Te tiaturi ra paha to oe mau hoa e e tauiui te mau mea ora aore ra i te mau haapiiraa hape rau a te haapaoraa, ua parauhia hoi e mea tano te reira. Eiaha oe e pee ia ratou. A haamanaˈo e te hinaaro ra Iehova ia tavini oe ia ˈna ma to manaˈo atoa. (A taio i te Mataio 22:36, 37.) Te hinaaro ra to tatou Metua i te raˈi ia niu oe i to faaroo i nia i te pue parau mau Bibilia.—Heb. 11:1.
7, 8. (a) E haamau i teihea mau fa e raea oioi e puai atu â ˈi to faaroo? (b) Eaha ta oe e ite ia tupu vetahi o ta oe mau fa e raea oioi?
7 Ia puai atu â to faaroo, no te aha e ore ai e haamau i te mau fa e raea oioi? A tahi, e pure i te mahana taitahi. A feruri aore ra a papai roa ˈtu i te mau tupuraa taa ê o te mahana, no te tauturu ia oe ia ore e tahana ia pure oe. Eiaha e faahiti noa i to oe mau fifi, i te mau mea atoa râ ta oe i fanaˈo. (Phil. 4:6) Te piti, e taio i te Bibilia i te mahana hoê. Ua ite anei oe e ia taio oe e maha api i te mahana, e hope roa ïa te Bibilia taatoa i roto hoê noa matahiti? a Te na ô ra te Salamo 1:1, 2: ‘E ao to te taata tei hinaaro i te ture a Iehova; e tei ta ˈna ture to ˈna manaˈoraa i te rui e te ao.’
8 Te toru, e faaineine i te hoê pahonoraa no te mau putuputuraa atoa o te amuiraa. E taio paha oe i te pahonoraa aore ra i te hoê irava na mua. I muri aˈe, e nehenehe oe e pahono na roto i ta oe mau parau. I te mau taime atoa e na reira ˈi oe, te pûpû ra ïa oe i te tusia ia Iehova. (Heb. 13:15) Ia raea ia oe vetahi o teie mau fa, e tiaturi atu â oe i ta oe e nehenehe e rave e e mauruuru atu â oe ia Iehova, a haamau atu ai i te mau fa no a muri aˈe.
9. Eaha te mau fa no a muri aˈe e haamau mai te peu e aitâ oe i poro atura?
9 Eaha te mau fa no a muri aˈe ta oe e haamau? E riro paha ïa ei taata poro i te Basileia mai te peu e aitâ oe i poro atura i te evanelia i te taata. Ia raea ia oe teie fa maitai, e hinaaro oe e poro tamau ma te aravihi i te mau avaˈe atoa. E haapii atoa ïa oe i te faaohipa i te Bibilia i roto i te taviniraa. E ite ïa oe e mea au roa ˈtu â te pororaa. E poro maoro atu â oe na te mau fare aore ra e faaitoito oe i te faatere i te hoê haapiiraa Bibilia. Aita ˈtu e fa maitai aˈe maori râ te faaîraa i te mau titauraa no te bapetizoraa a riro ai ei Ite pûpûhia e bapetizohia no te Atua ra o Iehova, e ere anei?
10, 11. Eaha te mau fa no a muri aˈe ta te feia apî bapetizohia e haamau?
10 E tavini bapetizohia oe na Iehova i teie nei, teie ïa te tahi mau fa no a muri aˈe no oe. E hinaaro paha oe i te tahi taime e poro i te mau tuhaa fenua mea varavara i te ravehia no te tauturu i te mau amuiraa. E faaoti atoa paha oe e faaohipa i to puai i roto i te taviniraa pionie tauturu aore ra tamau. E faaite atu e rave rahi pionie oaoa roa e e ravea hoona te taviniraa taime taatoa no te haamanaˈo i tei Hamani ia oe i to apîraa. E raea ia oe teie mau fa a faaea ˈi oe i ǒ to metua. E faufaa-atoa-hia ta oe amuiraa.
11 E faufaahia te tahi atu mau amuiraa i te mau fa ta oe i haamau. Ei hiˈoraa, e opua paha oe e tavini i te tahi atu motu aore ra fenua e hinaaro-rahi-hia te tauturu. Aore ra e apiti i te paturaa i te mau Piha a te Basileia aore ra amaa na te ara. Aore ra e tavini i te Betela aore ra ei mitionare. O te bapetizoraa râ te taahiraa matamua e raea ˈi te rahiraa o teie mau fa no a muri aˈe. Mai te peu e aitâ oe i bapetizo atura, a feruri i tei taaihia i teie taahiraa faufaa o to oe oraraa.
Te fa o te bapetizoraa
12. Eaha te tumu e bapetizo ai vetahi, e no te aha e ore ai e tano?
12 Eaha te tumu o te bapetizoraa no oe? Te manaˈo ra vetahi feia apî e e paruru te reira ia ratou ia ore ia hara. Area te tahi atu, e bapetizo ïa no te mea ua na reira to ratou mau hoa aore ra no te faaoaoa i to ratou na metua. Eita râ te bapetizoraa e tapea ia oe ia ore e rave i te mau mea ino ta oe e hiaai omoe. Eiaha atoa e bapetizo ia faahepo vetahi ê ia oe, no te mea râ ua taa maitai ia oe tei taaihia i te riroraa ei Ite no Iehova e ua papu ia oe e ua ineine oe i te amo i teie hopoia.—Koh. 5:4, 5.
13. No te aha oe e bapetizo ai ia oe?
13 Te tumu e bapetizo ai, oia hoi ua faaue Iesu i ta ˈna mau pǐpǐ ia “faariro i te mau fenua atoa ei pǐpǐ, a bapetizo atu ai ia ratou.” Ua horoa mai oia i te hiˈoraa ma te bapetizo ia ˈna. (A taio i te Mataio 28:19, 20; Mareko 1:9.) E taahiraa faufaa atoa te bapetizoraa no te feia e hinaaro ra i te ora. Ua faahiti te aposetolo Petero i to Noa hamaniraa i te araka ia ora oia e to ˈna utuafare i te diluvi e ua parau: “Tei au i te reira ra, o te bapetizo ïa, e ora ˈi tatou atoa i teie nei, . . . i te tia-faahou-raa o Iesu Mesia.” (Pet. 1, 3:20, 21) E ere râ i te auraa e e bapetizo noa oe ia paruruhia oe. Tera râ, no to here ia Iehova e hinaaro e tavini ia ˈna ma to aau, ora, manaˈo e puai atoa.—Mar. 12:29, 30.
14. No te aha vetahi e haamarirau ai i te bapetizo ia ratou, e nehenehe râ oe e tiaturi i te aha?
14 E haamarirau paha vetahi i te bapetizo no to ratou taiâ e tiavaruhia ratou i muri aˈe. O oe atoa anei? Mai te peu e e, mea maitai ïa. E tapao faaite ïa e te taa ra ia oe te hopoia rahi te riroraa ei Ite no Iehova. Te vai ra anei te tahi atu tumu? Peneiaˈe aitâ i papu roa ˈtura ia oe e o te peeraa i te mau ture aveia a te Atua te huru oraraa maitai roa ˈˈe. A feruri ïa eaha te tupu ra i nia i te feia aita e haapao ra i te mau ture aveia Bibilia, a rave atu ai i te faaotiraa. Peneiaˈe atoa mea au na oe te mau ture aveia a te Atua, aita râ oe e tiaturi ra e e maraa ia oe ia haapao. Mea maitai te reira, te itehia ra ïa to haehaa. Te na ô ra hoi te Bibilia e e haavare rahi te aau o te taata hara atoa. (Ier. 17:9) E manuïa râ oe ia ‘faaau noa oe i to haerea i ta te Atua ra parau.’ (A taio i te Salamo 119:9.) Noa ˈtu eaha te mau tumu e haamarirau ai oe i te bapetizo, eiaha e taiâ faahou.
15, 16. E nafea oe e ite ai e ua ineine oe no te bapetizoraa?
15 E nafea râ oe e ite ai e ua ineine oe no te bapetizoraa? A uiui: ‘E nehenehe anei au e faataa i te mau haapiiraa Bibilia tumu ia vetahi ê? Te apiti ra anei au i te taviniraa i te mau mahana eita to ˈu na metua e poro? Te faaitoito ra anei au i te haere i te mau putuputuraa Kerisetiano atoa? Te haamanaˈo ra anei au i te mau taime taa maitai i patoi ai au i te faaheporaa a te hoa? E tamau anei au i te tavini ia Iehova noa ˈtu e aita to ˈu na metua e hoa e na reira faahou ra? Ua pure anei au no nia i to ˈu taairaa e te Atua? E ua pûpû taatoa anei au ia ˈu ia Iehova i roto i te pure?’
16 E ere te bapetizoraa i te ohipa hauti, e taahiraa râ o te taui i to oraraa. Ua paari maitai anei to feruriraa no te manaˈo maite i teie taahiraa? E ere te feruriraa paari i te nehenehe-noa-raa e horoa i te mau tumu parau na mua mai aore ra i te mau pahonoraa maitatai i te putuputuraa. Ua taaihia râ i te neheneheraa e rave i te mau faaotiraa niuhia i nia i te iteraa i te mau faaueraa tumu Bibilia. (A taio i te Hebera 5:14.) Ia na reira oe, e fanaˈoraa taa ê roa ïa te tiai maira, te taviniraa ia Iehova ma te aau atoa e te oraraa ma te faaite e ua pûpû iho â oe ia oe ia ˈna.
17. Eaha te tauturu ia oe ia faaruru i te mau tamataraa e tupu mai i muri aˈe i te bapetizoraa?
17 I muri rii aˈe i te bapetizoraa, e tavini oe i te Atua ma te aau tae rahi. Eita râ e maoro e tamatahia to faaroo e aueue ore. (Tim. 2, 3:12) Eiaha e manaˈo e ia faaruru oe anaˈe i te reira. A ani i te aˈoraa a to oe na metua. A imi i te tauturu a te mau melo paari o te amuiraa. A faahoa noa ˈtu i te feia e turu ia oe. Eiaha roa e haamoe e te tiai ra Iehova ia oe, e na ˈna e horoa ˈtu i te puai no te faaruru i te mau tupuraa atoa.—Pet. 1, 5:6, 7.
E nafea e raea ˈi ta oe mau fa?
18, 19. Eaha te maitai ia hiˈopoa i ta oe mau ohipa matamua?
18 Noa ˈtu ta oe mau opuaraa maitai roa ˈˈe, e au ra paha e aita e navai ra te taime no te rave i ta oe e hinaaro e i te mea faufaa mau. A hiˈopoa ïa i ta oe mau ohipa matamua. Teie te hoê faahohoˈaraa: A rave i te hoê patete e a tuu na mua i te ofai i roto e te one i muri iho. Ua î ïa ta oe patete i te ofai e te one. I teie nei, a manii pauroa i rapae. Ia oti, a tuu na mua i te one e te ofai i muri iho. Eita te ofai e ô pauroa. No te aha? No te mea o te one ta oe i tuu na mua i roto i te patete.
19 Hoê â huru ia faanaho oe i to taime. Ia tuu oe i te faaanaanataeraa ei hiˈoraa i te parahiraa matamua, eita ïa e navai te taime no te mau mea faufaa aˈe, tei taaihia i te taviniraa i te Atua. Ia pee râ oe i te faaueraa Bibilia ia ‘ite papu i te mau mea i hau i te maitai,’ e taime ïa to oe no te tavini i te Atua e no te faaanaanataeraa.—Phil. 1:10, V.C.J.S., huriraa Katolika reo Tahiti, neneiraa 1976.
20. Ia hepohepo e ia feaa oe a tutava ˈi oe ia raea te mau fa, e nafea ïa?
20 A tutava ˈi oe ia raea ta oe mau fa, te bapetizoraa atoa, e hepohepo e e feaa paha oe i te tahi taime. ‘A tuu ïa i ta oe hopoia ia Iehova, e na ˈna oe e tauturu.’ (Sal. 55:22) I teie nei, e nehenehe oe e apiti i te ohipa faufaa e te oaoa roa ˈˈe o te tuatapaparaa o te taata, te ohipa pororaa e haapiiraa na te ao nei. (Ohi. 1:8) Na oe e maiti, e mataitai anei ia vera ma ia rave i teie ohipa aore ra e apiti roa ˈtu. A faaohipa i ta oe mau ravea no te tavini i te Atua e no te turu i to ˈna Basileia. Eita roa oe e tatarahapa i te tavini i “tei Hamani ia oe i to apîraa.”—Koh. 12:1.
[Nota i raro i te api]
a A hiˈo i Te Pare Tiairaa o te 1 no Me 1995, api 16-17.
Eaha ta outou e pahono?
• No te aha e haamau ai i te mau fa?
• Eaha te tahi mau fa e hoona?
• Eaha tei taaihia i te fa o te bapetizoraa?
• E nafea e raea ˈi ta oe mau fa ia hiˈopoa oe i ta oe mau ohipa matamua?
[Uiraa haapiiraa]
[Hohoˈa i te api 21]
Te taio ra anei oe i te Bibilia i te mahana hoê ei fa na oe?
[Hohoˈa i te api 23]
Eaha te tauturu ia oe ia raea te fa o te bapetizoraa?
[Hohoˈa i te api 24]
Eaha te haapiiraa o teie faahohoˈaraa?
