UA ITE Iesu eaha te tiai ra ia ˈna. Ua taa maitai ia ˈna e eita o ˈna e ora hau noa, e pohe oioi râ a raea ˈi e 30 tiahapa matahiti. Ua ineine roa oia i te faaruru i te pohe.

Te haafaufaa rahi ra te Bibilia i to Iesu pohe. Ia au i te hoê buka, fatata 175 taime te faahiti-roa-raahia te reira i roto i te mau Papai Heleni Kerisetiano, aore ra Faufaa Apî. No te aha hoi Iesu i mauiui ai a pohe atu ai? E mea tia ia ite tatou, no te mea e ohipa puai te pohe o Iesu i nia i to tatou oraraa.

I te matahiti hopea o to ˈna oraraa, ua faaara pinepine Iesu i ta ˈna mau pǐpǐ e e haamauiuihia e e haapohehia oia. A haere ai i Ierusalema no ta ˈna Pasa hopea, ua na ô oia i ta ˈna na aposetolo 12: “E tuuhia te Tamaiti a te taata nei i te mau tahuˈa rarahi ra, e te mau papai parau, e e faahapa mai ratou ia ˈna ia pohe, e e pûpû atu hoi ia ˈna i te Etene ra: e tâhitohito mai ratou ia ˈna, e e papai mai, e tufa mai hoi i te huare i nia ia ˈna, e e taparahi pohe roa mai hoi.” a (Mareko 10:33, 34) No te aha oia i papu ai e tera te tiai ra ia ˈna?

Ua ite maitai Iesu i te parau tohu e rave rahi o te mau Papai Hebera e faaite ra e nafea oia e pohe ai. (Luka 18:31-33) Teie te tahi mau parau tohu e irava Bibilia e faataa ra i to ratou tupuraa.

E riro te Mesia i te . . .

• Hoohia no e 30 moni ario.—ZEKARIA 11:12; MATAIO 26:14-16.

• Tairihia e tufahia i te huare.—ISAIA 50:6; MATAIO 26:67; 27:26, 30.

• Patǐtǐhia i nia i te raau.—SALAMO 22:16; OHIPA 5:30.

• Haapohehia e aita hoê aˈe o to ˈna ivi i ofatihia.—SALAMO 34:20; IOANE 19:33, 36.

• Hunahia e te taata taoˈa.—ISAIA 53:9; MATAIO 27:57-60.

Ua faatupu Iesu i teie mau parau tohu e vetahi atu â. Eita e tia ia ˈna na nia i to ˈna iho puai. Te faaite ra te tupuraa o teie mau parau tohu atoa i nia ia Iesu e na te Atua i tono mai ia ˈna. b

No te aha ïa e mea titauhia ˈi ia mauiui e ia pohe Iesu?

Ua ite maitai Iesu i te mau tumu parau faufaa no te ao atoa faahitihia i te ô i Edene. Turaihia e te hoê varua orure hau, ua maiti Adamu raua Eva e faaroo ore i te Atua. I to raua orure-hau-raa e hararaa, ua mârôhia ˈtura te tia-mau-raa o to te Atua mana arii, aore ra ta ˈna huru faatereraa, e aita e taata e vai taiva ore i te Atua i mua i te tamataraa.—Genese 3:1-6; Ioba 2:1-5.

 Ma te papu roa, ua pahono Iesu i na tumu parau e piti, oia hoi to Iehova mana arii e te taiva ore o te taata. Ma te auraro i te Atua ma te tia roa ‘e tae roa ˈtu i te pohe,’ ua turu Iesu i to ˈNa mana arii. (Philipi 2:8) Ua faaite atoa oia e e nehenehe te hoê taata tia roa e tapea i to ˈna taiva ore ia Iehova i mua i te tamataraa fifi mau.

Ua tohu te peropheta Isaia e e riro te mauiui e te pohe o te Mesia fafauhia ei taraehara no te hara a te taata. (Isaia 53:5, 10) Ua taa maitai Iesu i te reira e ua ineine oia i te horoa “i to ˈna ora ei hoo no te taata e rave rahi.” (Mataio 20:28) Maoti to ˈna pohe ei tusia e nehenehe ai te taata tia ore e faatupu i te taairaa maitai e o Iehova e e tiamâ i te hara e te pohe. Oia atoa, e fanaˈo faahou tatou i ta Adamu raua Eva i ere: te ora mure ore ma te tia roa i nia i te fenua. c—Apokalupo 21:3, 4.

I roto i teie anairaa, ua ite ihora tatou i ta te Bibilia e parau ra no nia ia Iesu: nohea mai oia, eaha to ˈna huru oraraa, e no te aha oia i pohe ai. E faaore te iteraa i te parau mau no nia ia Iesu i te mau manaˈo hape no nia ia ˈna e e haamaitai-atoa-hia tatou ia ohipa ia au i te reira, te hoê oraraa maitai aˈe i teie mahana e te ora mure ore a muri aˈe. Te faaite maira te Bibilia ia aha tatou no te fanaˈo i te reira.

• A haapii hau atu â no nia ia Iesu Mesia e to ˈna tiaraa i roto i te opuaraa a Iehova.—IOANE 17:3.

• A faatupu i te faaroo ia Iesu ma te faaite i roto i to oe oraraa e te farii ra oe ia ˈna mai to oe Faaora.—IOANE 3:36; OHIPA 5:31.

E oaoa te mau Ite no Iehova i te tauturu ia oe ia ite hau atu â no nia ia Iesu Mesia, ta te Atua “Tamaiti fanau tahi,” maoti hoi o ˈna e fanaˈo ai tatou i te ô o te “ora mure ore.”—Ioane 3:16.