E ERE teie mau irava no roto mai i te Bibilia. Ua faaohipahia râ te reira tau senekele ei otoheraa no te hiˈo ino i te vahine. I teie atoa mahana, te faahiti nei vetahi mau taata manaˈo etaeta i te mau papai faaroo no te faatia i te haavîraa i te vahine ma te parau e o ratou te tumu o te mauiui o te huitaata. Ua hinaaro iho â anei te Atua ia faahaehaa e ia hamani ino te tane i te vahine? Eaha ta te Bibilia e parau ra? E hiˈo anaˈe.

O te vahine anei tei faainohia e te Atua?

Aita. O te “ophi tahito [râ], o tei parauhia o te diabolo ra,” tei ‘faainohia’ e te Atua. (Apokalupo 12:9; Genese 3:14) I to te Atua parauraa e ei “fatu” Adamu no ta ˈna vahine, aita o ˈna i faaite e te farii ra o ˈna e ia haavî te tane i te vahine. (Genese 3:16) Te faaite atea noa nei oia i te mau faahopearaa peapea mau o te hara o na taata matamua.

Te rave-ino-raa i te vahine, o te faahopearaa ïa o te huru taata hara, eiaha o te hinaaro o te Atua. Aita te Bibilia e turu ra i te manaˈo e e haavî te tane i te vahine no te faaore i te hara matamua.—Roma 5:12.

No te Atua, mea faufaa aˈe anei te tane i te vahine?

Aita. Te na ô ra te Genese 1:27: “Hamani ihora hoi te Atua i te taata ma to ˈna ihora huru, i hamani oia ia ˈna ma te hohoˈa o te Atua ra; i hamani oia ia raua, o te tane e te vahine.” Ua poiete ïa te Atua i te taata, te tane e te vahine, e te neheneheraa e faaite i to ˈNa mau huru maitatai. Noa ˈtu e mea taa ê to raua huru i to tatou i te pae aau e i te pae tino, ua horoahia ia raua toopiti hoê â faaueraa e ua fanaˈo i te hoê â tiaraa i mua i to raua Atua Poiete.—Genese 1:28-31.

Hou a poiete ai ia Eva, ua parau te Atua: “E hamani au i te tahi tauturu au na ˈna [Adamu].” (Genese 2:18) Te horoa ra anei te taˈo “tauturu au” i te manaˈo e mea faufaa aˈe te tane i te vahine? Aita. Ia tâpûhia te hoê taata, mea faufaa roa ia ohipa amui te taote tâpû e te taote faataoto. E nehenehe anei hoê e ohipa o ˈna anaˈe? Mea fifi  roa! Na te taote tâpû e rave i te tâpûraa. Teie râ, o ˈna anei te mea faufaa aˈe? Mea fifi roa ia parau. Oia atoa, ua poiete te Atua i te tane e te vahine ia ohipa amui raua, eiaha no te ite o vai te mea faufaa aˈe.—Genese 2:24.

Na te aha e faaite ra e te tâuˈa ra te Atua i te vahine?

Ma te ite atea i ta te taata hara e rave, ua faaite oioi te Atua e e paruru oia i te vahine. No nia i te Ture a Mose, haamauhia i te matahiti 1513 hou te Mesia, ua papai Laure Aynard i roto i ta ˈna buka Te Bibilia ia au i te vahine (Farani): “I te rahiraa o te taime e faahiti ai te faufaa o te Ture i te vahine, no te parururaa ïa ia ˈna.”

Ei hiˈoraa, ua faaue te Ture ia faatura i te metua tane e i te metua vahine. (Exodo 20:12; 21:15, 17) Oia atoa ia haapao maitai i te vahine hapû. (Exodo 21:22) I teie â mahana, mea maitai aˈe teie mau ture a te Atua no nia i te parururaa i te mau vahine i ta e rave rahi fenua. Mea rahi atu â râ te tapao e faaite ra e te tâuˈa ra te Atua i te vahine.

Maoti te Ture ta te Atua ra o Iehova i horoa i te nunaa Iseraela i fanaˈo ai te tane e te vahine i te mau haamaitairaa rahi i te pae tino e i te pae morare e i te taairaa piri e o Iehova. Ia faaroo e ia auraro ratou i te Ture, ‘e faateitei-rahi-noa-hia’ te nunaa “i te mau fenua atoa o te ao nei.” (Deuteronomi 28:1, 2) Eaha te tiaraa o te vahine i raro aˈe i te Ture? A hiˈo na:

1. Te tiamâraa. Taa ê atu i te mau vahine o te tahi atu mau nunaa i tahito ra, i fanaˈo na te mau vahine Iseraela i te tiamâraa rahi. Noa ˈtu e o te tane te upoo o te utuafare, e tiaturi o ˈna i ta ˈna vahine no te ‘manaˈo e no te hoo mai i te hoê aua’ e no te “tanu i te ô vine.” Mea aravihi anaˈe o ˈna no te nino e te raraa i te ahu, e nehenehe ta ˈna e haapao i ta ˈna iho ohipa tapihoo. (Maseli 31:11, 16-19) I raro aˈe i te Ture a Mose, e tiaraa iho â to te vahine, e ere o ˈna i te tahi noa taoˈa a te tane.

I Iseraela i tahito, e tiamâraa atoa to te  vahine no te faatupu i te taairaa piri e te Atua. Te faahiti ra te Bibilia ia Hana tei pure i te Atua no nia i ta ˈna mau haapeapearaa e tei euhe i roto i to ˈna aau. (Samuela 1, 1:11, 24-28) Ua matau te hoê vahine no te oire no Sunema i te haere e hiˈo i te peropheta Elisaia i te mahana Sabati. (Te mau arii 2, 4:22-25) Ua faaohipa te Atua i te mau vahine mai ia Debora e o Hulada ei tia no ˈna. E te mea anaanatae, ua ineine te mau tane tiaraa teitei e te mau tahuˈa i te imi i te aˈoraa ia raua ra.—Te mau tavana 4:4-8; Te mau arii 2, 22:14-16, 20.

2. Te haapiiraa. I te mea e tei raro aˈe atoa te vahine i te Ture, e nehenehe ratou e faaroo e e haapii mai i te taioraa o te Ture. (Deuteronomi 31:12; Nehemia 8:2, 8) E faaineine-atoa-hia ratou no te apiti i te tahi mau tuhaa o te haamoriraa no te taatoaraa. Ei hiˈoraa, i “haaputuputu” na te tahi mau vahine i te sekene a apiti ai vetahi atu i te hoê pǔpǔ himene tane e vahine.—Exodo 38:8; Paraleipomeno 1, 25:5, 6.

Ua ite e rave rahi vahine i te faatere i te hoê ohipa tapihoo hoona mau e e mea aravihi ratou. (Maseli 31:24) I roto i te tahi atu mau nunaa o tera ra tau, o te papa anaˈe te haapii i ta ˈna mau tamaiti. Area i Iseraela, e apiti atoa te mau metua vahine i te haapiiraa o ta ratou mau tamaroa a paari roa mai ai ratou. (Maseli 31:1) E ere roa ˈtu te mau vahine no Iseraela i tahito i te mea ite ore.

3. Mea faaturahia. Ua faahiti maitai te Ture Ahuru: “E faatura ˈtu i to metua tane, e to metua vahine.” (Exodo 20:12) Te taiohia nei i roto i te maseli a te arii paari ra o Solomona: “E faaroo mai, e tau tamaiti, i te aˈo a to metua tane, e eiaha e faarue i te faaitoito a to metua vahine ra.”—Maseli 1:8.

E faatureraa rii atoa to roto i te Ture no nia i te haerea te titauhia ia faaite i nia i te taata mero ê no te faatura i te mau vahine. (Levitiko 18:6, 9; Deuteronomi 22:25, 26) E mea tia ia haapao te tane faaipoipo maitai i te mau taotiaraa pae tino o ta ˈna vahine a tupu atoa ˈi to ˈna maˈi avaˈe.—Levitiko 18:19.

4. Ua paruruhia. I roto i ta ˈna Parau, ua faataa Iehova ia ˈna mai “te metua o te mau otare, e te haava o te mau ivi.” Te auraa ïa e e Paruru oia no te feia aita e papa aore ra e  tane faahou no te paruru i to ratou mau tiaraa. (Salamo 68:5; Deuteronomi 10:17, 18) No reira, a haa ˈi te hoê taata titau tarahu ma te tia ore i nia i te vahine ivi a te hoê peropheta, ua faatupu Iehova i te hoê semeio ia nehenehe oia e ora mai e ia faatura-noa-hia oia.—Te mau arii 2, 4:1-7.

Hou te mau Iseraela a tomo ai i te Fenua tǎpǔhia, ua pohe Zelophehada, te hoê upoo utuafare, aore aˈe tamaroa. Ani atura ïa ta ˈna na tamahine e pae ia Mose i te hoê “tufaa” i te Fenua tǎpǔhia. Parau aˈera Iehova ia Mose e ia faaitehia iho â te hamani maitai i nia i tera mau vahine. Ua na ô te Atua: “E hopoi â oe i te tahi tufaa no ratou i roto i te mau taeae o to ratou ra metua tane; e ruri oe i te tufaa o to ratou ra metua tane no ratou.” Mai reira mai to te mau vahine Iseraela neheneheraa e fanaˈo i te hoê tufaa no ǒ mai i to ratou papa ra e e horoa ˈtu no to ratou huaai.—Numera 27:1-8.

I raro aˈe i te Ture a Mose, e faaturahia te mau vahine e to ratou mau tiaraa. Mai te senekele maha râ i muri aˈe i te Mesia, ua haamata te taˈere Heleni, tei faahaehaa noa na i te vahine, i te ohipa i nia i te haapaoraa ati Iuda.—A hiˈo i te tumu parau tarenihia “Te hiˈo-ino-raa i te vahine i roto i te mau papai tahito.”

Ei hiˈoraa, ua faahoˈi te rohipehe Heleni ra o Hésiode (senekele vau hou te Mesia) i te hape o te mau mauiui atoa o te huitaata i nia i te vahine. Ua parare roa teie manaˈo i roto i te haapaoraa ati Iuda i te omuaraa o te senekele piti hou te Mesia. Te horoa nei te Talmud, te hoê buka tatararaa ati Iuda o tei haaputuhia mai te senekele piti i muri aˈe i te Mesia, i teie faaararaa i te mau tane: “Eiaha e paraparau rahi roa i te vahine aˈunei outou e topa ˈi i roto i te haerea viivii.”

I te roaraa o te mau senekele, ua ohipa puai teie manaˈo ino i nia i te tiaraa o te vahine i roto i te totaiete ati Iuda. I te tau o Iesu, ua taotia-ê-na-hia ratou i roto i te Aua o te mau vahine e aita ratou i faatiahia ia haere i roto i te tahi atu mau tuhaa o te hiero. No te mau tane anaˈe te mau haapiiraa faaroo e i faataa-ê-hia na paha te tane e te vahine i te sunago. Ua faahiti te Talmud i te hoê orometua ati Iuda tei parau e mea ino mau no te hoê taata ia haapii i te ture ati Iuda i ta ˈna tamahine. Ma te faataa hape i te manaˈo o te Atua, ua haapii atu te mau tia faaroo ati Iuda i te tane ia vahavaha i te vahine.

I te fenua, ua ite Iesu i tera mau manaˈo oti noa tei aˈa maitai i roto i te mau peu tutuu. (Mataio 15:6, 9; 26:7-11) Ua ohipa anei tera mau haapiiraa i nia i ta ˈna mau haaraa e te vahine? Eaha ta tatou e haapii mai i to ˈna haerea e huru? Ua hopoi mai anei te Kerisetianoraa mau i te tamǎrûraa i te mau vahine? O ta te tumu parau i muri nei ïa e pahono.