Ta te Parau a te Atua e haapii maira
Eaha te tupu i te Mahana Haavaraa?
I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.
1. Eaha te Mahana Haavaraa?
Mai ta te hohoˈa i te pae atau e faaite ra, mea rahi te taata e manaˈo ra e i te Mahana Haavaraa e tia ˈtu te taata i mua i te terono o te Atua ia haavahia ratou ia au i ta ratou i rave na. E fanaˈo vetahi i te ora i nia i te raˈi, area vetahi atu e haamauiuihia ïa i roto i te po auahi. Te faaite nei râ te Bibilia e te fa o te Mahana Haavaraa, o te faaoraraa ïa i te taata i te parau-tia ore. (Salamo 96:13) Ua maiti te Atua ia Iesu ei Haava o te haamau faahou i te parau-tia i te fenua.—A taio i te Isaia 11:1-5; Ohipa 17:31.
2. E nafea te Mahana Haavaraa e haamau faahou ai i te parau-tia?
I to te taata matamua ra o Adamu maitiraa i te orure hau i te Atua, ite atura to ˈna huaai taatoa i te hara, te mauiui e te pohe. (Roma 5:12) No te faaafaro i taua ohipa tia ore ra, e faahoˈi mai Iesu i te ora e miria taata tei pohe. Te faaite ra te buka o te Apokalupo e e tupu te reira i te faatereraa tausani matahiti a te Mesia ra o Iesu.—A taio i te Apokalupo 20:4, 11, 12.
E haavahia te feia e faatiahia mai eiaha i nia i ta ratou i rave hou a pohe ai, i nia râ i ta ratou e rave ia faaitehia te mau parau o te mau “otaro” faahitihia e te Apokalupo pene 20. (Roma 6:7) Ia au i te aposetolo Paulo, e faahoˈi-atoa-hia mai “te feia parau-tia e te feia parau-tia ore” i te ora ia nehenehe ratou e haapii no nia i te Atua.—A taio i te Ohipa 24:15.
3. Eaha ta te Mahana Haavaraa e faatupu?
E nehenehe te feia tei pohe ma te ore e ite o vai ra te Atua ra o Iehova e e tavini ia ˈna e taui e e rave i te mea maitai. Ia na reira ratou, e riro ïa to ratou tia-faahou-raa ei haamaitairaa no te ‘rave ïa i te ora.’ Eita râ vetahi feia faatia-faahou-hia e hinaaro e haapii i to Iehova mau eˈa. E riro ïa to ratou tia-faahou-raa ei haavaraa e e haamouhia ratou.—A taio i te Ioane 5:28, 29; Isaia 26:10; 65:20.
Ia hope na tausani matahiti Mahana Haavaraa, ua faahoˈi atura ïa Iehova i te huitaata faaroo i to ratou tia-roa-raa mai i te omuaraa. (Korinetia 1, 15:24-28) Auê ïa tiaturiraa faahiahia no te feia faaroo atoa! I te tamataraa hopea, e tuu faahou te Atua ia Satani te Diabolo, tei tapeahia hoê tausani matahiti i roto i te abuso. E tamata faahou Satani i te haafariu ê i te taata ia Iehova. O te feia râ o te patoi ia Satani te fanaˈo i te ora mure ore i nia i te fenua.—A taio i te Isaia 25:8; Apokalupo 20:7-9.
4. Eaha te tahi atu mahana haavaraa ta te huitaata e fanaˈo?
Te faaohipa atoa ra te Bibilia i te parau “mahana haavaraa” no te faataa i te tupuraa i reira e haamouhia ˈi teie nei ao. Mai te diluvi i te tau o Noa, e tae taue mai tera mahana haavaraa no te haamou i te ui ino atoa. Maoti te haamouraa o te “feia paieti ore” e fatata roa maira e itehia ˈi te hoê totaiete apî i nia i te fenua i reira e ‘vai mau ai te parau-tia.’—A taio i te Petero 2, 3:6, 7, 13.
E au atoa outou . . .
TE PAHONO RA TE BIBILIA
Eaha te tia-faahou-raa?
E maere roa outou a ite ai i te feia e faahoˈihia mai i te ora i roto i te paradaiso.
HAAPIIRAA TUMU
Eaha te Basileia o te Atua?
O te Basileia o te Atua te tumu parau faufaa roa ˈˈe ta Iesu i haapii. E rave rahi matahiti ua pure ta ˈna mau pǐpǐ ia tae mai taua Basileia ra.
TE PAHONO RA TE BIBILIA
E nafea ia fanaˈo i te ora mure ore?
Te fafau ra te Bibilia e nehenehe te feia o te rave i te hinaaro o te Atua e ora e a muri noa ˈtu. Teie e toru tuhaa ta ˈna e titau mai ra.
HAAPIIRAA TUMU
No te aha te Atua i poiete ai i te fenua?
Nehenehe mau te fenua, tano maitai to ˈna atearaa i te mahana, tano maitai atoa to ˈna ohuraa. No te aha te Atua i na reira ˈi i to ˈna poieteraa i te fenua?
NO NIA IA MATOU
A ani i te hoê farereiraa
Aparauraa no nia i te Bibilia aore ra no te ite atu â no nia i te mau Ite no Iehova.
