“E VARUA te Atua,” eita ïa to tatou mata e nehenehe e ite ia ˈna. (Ioane 4:24) Te faaite ra râ te Bibilia e ua hiˈo aore ra ite vetahi i te Atua. (Hebera 11:27) E nehenehe anei? E tia anei ia oe ia ite i “te Atua hiˈo-ore-hia”?—Kolosa 1:15.

E nehenehe e faaau i to tatou tupuraa i to te taata i matapo mai to ˈna fanauraahia. Te auraa râ anei e eita oia e taa i tei haaati ra ia ˈna? Eita, ma te ravea rau, e nehenehe ta ˈna e taa e e taata teie, e tauihaa tera e e ohipa te tupu ra. Ua parau te tahi taata matapo, “aita to ˈu mata e ite ra, to ˈu râ feruriraa, te taa râ ïa.”

Noa ˈtu e eita to oe mata e nehenehe e hiˈo i te Atua, e nehenehe ‘te mata o to aau’ e ite ia ˈna. (Ephesia 1:18) E hiˈopoa anaˈe e toru ravea.

E pinepine te taata matapo i te faaohipa ˈtu â i to ˈna tariˈa aore ra rima no te taa i ta ˈna e ore e ite. Mai ia ˈna, e nehenehe atoa oe e taa o vai te Atua poiete hiˈo-ore-hia na roto i te mau mea atoa e haaati ra ia oe. “Te mau mea hoi no ˈna e ore e tia ia hiˈo ra, te itea papuhia nei ïa i te mau mea i hamanihia nei, mai te hamaniraa mai â o teie nei ao.”—Roma 1:20.

A feruri na i te fenua nei tei riro ei nohoraa no tatou. Aita noa te reira i hamanihia ia parahi maoro te taata i nia iho, ia oaoa atoa râ i te oraraa. Ia puihau mai te mataˈi haumǎrû, ia mahanahana tatou i te mahana, ia amu i te maa au mau aore ra ia faaroo i te taˈi tamǎrû o te mau manu, e oaoa tatou! E ere anei te faaiteraa e e Atua poiete maitai, aroha e horoa noa to tatou?

Eaha te haapii mai i ta tatou e ite ra i roto i te ao nui? E faaite te mau raˈi i te puai o te Atua. Ia au i te tahi faaiteraa a te mau aivanaa, te parau ra ratou e te aano noa ˈtura te ao nui ma te vitiviti! A nânâ ˈi to mata i nia i te raˈi i te po, a feruri na: ‘No vai te puai e faaaano noa ˈtura i te ao nui ma te vitiviti?’ Te parau maira te Bibilia e e “puai rahi” to te Atua poiete. (Isaia 40:26) Te faaite ra te mau mea ta te Atua i poiete e o ˈna “te Puaihope” e e mana faito ore to ˈna.—Ioba 37:23.

Te na ô ra te tahi metua vahine e ua mohimohi te mata o ta ˈna na tamarii e piti: “O te paraparauraa te ravea maitai roa ˈˈe no te haapii ia ratou. E faataa oe ia ratou i te mau mea atoa ta oe e ite ra, e faaroo ra, [e] ia vai ineine noa oe i te faataa vitiviti ia ratou. O oe to ratou mata.” Noa ˈtu e “aore e taata i ite i te Atua,” o te Tamaiti a te Atua o Iesu “i nia i te ouma o te Metua ra, oia te faaite mai ia ˈna.” (Ioane 1:18) I te mea ua poietehia o ˈna na mua i te mau mea atoa e oia te Tamaiti fanau tahi a te Atua, ua riro Iesu ei “mata” no tatou no te hiˈo i to te raˈi. O ˈna anaˈe te faaite maitai roa ˈˈe o vai te Atua hiˈo-ore-hia.

Mea maoro roa Iesu i pihai iho i to ˈna Metua, a hiˈo na vetahi parau ta ˈna i faaite no te faataa o vai te Atua:

• Te ohipa ra te Atua ma te rohirohi ore. “Te ohipa noa nei â tau Metua.”—Ioane 5:17.

• Ua ite te Atua i to tatou mau hinaaro. “Ua ite hoi to outou Metua i te mau mea e au ia outou.”—Mataio 6:8.

• Ta te Atua e horoa noa maira. “To outou Metua i te ao ra; te faahiti nei oia hoi i to ˈna mahana i nia i te ino e te maitai, e te haamairi mai nei  oia i te ûa i nia i te parau-tia e te parau-tia ore.”—Mataio 5:45.

• E mea faufaa te taata taitahi no te Atua. “E ere anei taipiti manu rii ia hoo i te moni veo hoê nei? e ore râ te hoê o taua na manu rii ra e moe i to outou Metua ia mairi i raro i te repo. Eaha ˈtu â ïa, ua hope atoa ra te rouru o to outou upoo na i te taiohia. Eiaha maori outou e mǎtaˈu, e maitai rahi hoi to outou i to te manu e ia rahi noa ˈtu.”—Mataio 10:29-31.

E pinepine, mea ê roa te ravea e taa ˈi te matapo i te tahi mea ia faaauhia i te feia e nehenehe to ratou mata e ite. E taa te matapo e e vahi marumaru tera, eita râ e ite i te poiri, no ˈna e vahi haumǎrû te reira e paruruhia ˈi te taata i te mahana. Mai te matapo o te ore e ite i te poiri aore ra i te maramarama o te mahana, ia ore tatou e tauturuhia, eita tatou e ite o vai Iehova. Ua tono mai ïa Iehova i te tahi taata o te faaite ma te tia roa i to ˈna mau huru maitatai e o vai o ˈna.

O Iesu tera taata. (Philipi 2:7) Aita noa Iesu i paraparau no nia i to ˈna Metua, ua faaite atoa râ i to ˈna huru. Ua ani Philipa, e pǐpǐ na Iesu: “E te Fatu, e faaite mai ia matou i te Metua.” Ua pahono Iesu: “O tei hiˈo mai ia ˈu ra, ua hiˈo ïa i te Metua.” (Ioane 14:8, 9) Eaha ta tatou e “hiˈo” no nia i te Metua na roto i ta Iesu mau haaraa?

E taata maitai Iesu e te haehaa e ohie ia haafatata. (Mataio 11:28-30) No to ˈna huru au mau, aita te taata i taiâ i te tapiri atu. Ua taa atoa Iesu i te oto o vetahi ê e ua oaoa a oaoa ˈi ratou. (Luka 10:17, 21; Ioane 11:32-35) A taio aore ra a faaroo ai i te aamu o Iesu, a faaohipa i to oe feruriraa e mai te mea e to reira oe i tera taime. Ia feruriruri oe i to Iesu huru i nia i te taata, e ite atu â oe i te huru maitai o te Atua e e haafatata ˈtu â oe ia ˈna.

Teie ta te tahi taata papai buka i parau no te matapo: “Ma te mau ravea rau (ma te fafa, hauˈa, faaroo e te vai ra atu â), e mea tatuhaahia te mau haamaramaramaraa e tae atu ia ˈna, i muri aˈe, e amui oia i te mau tuhaa atoa no te taa.” Mea rahi te mau mea ta oe e ite a mataitai ai i ta te Atua i poiete, a taio ai i ta Iesu i parau no to ˈna Metua e a hiˈopoa ˈi i ta ˈna i rave no te faaite i te mau huru maitatai o te Atua. Mai te matapo, ia amui oe i tera mau haamaramaramaraa atoa, e ite oe i te huru nehenehe mau o Iehova e e tiaturi atu â oe ia ˈna.

Ua na reira Ioba tei ora mea maoro i teie nei. Ua paraparau oia “i tei ore i itea” e ana. (Ioba 42:3) A hiˈopoa maite ai râ oia i te mau ohipa faahiahia ta te Atua i poiete, ua na ô Ioba i muri aˈe: “Ite aˈenei au ia oe i te ite tariˈa nei, teie nei râ, te hiˈo nei tau mata ia oe.”—Ioba 42:5.

E nehenehe atoa oe e na reira. “Ia imi oe [ia Iehova] ra, e itea ˈtu oia e oe.” (Paraleipomeno 1, 28:9) E oaoa roa te mau Ite no Iehova i te tauturu ia oe ia imi e ia ite i te Atua hiˈo-ore-hia.