I te mea o te Atua ra o Iehova * tei poiete i te mau mea atoa e o ˈna te mana hope, e rave rahi te manaˈo nei e o ˈna te tumu o te mau ohipa na te ao nei, oia atoa te mea ino. A hiˈopoa na râ i ta te Bibilia e parau ra no te Atua mau:

•   “E parau-tia ta Iehova i tana atoa ra mau haerea.”—Salamo 145:17.

• “Tei au atoa to ˈna [to te Atua] ra mau haerea; e Atua parau mau, e te ino ore ra; e parau-tia ta ˈna e te titiaifaro.”—Deuteronomi 32:4.

• “Ua î te Fatu [o Iehova] i te aroha, e te hamani maitai rahi.”—Iakobo 5:11.

E ere te Atua te tumu o te mau ohipa iino. Te turai ra anei oia i te taata ia rave i te ohipa ino? Aita roa. Te na ô ra te Bibilia: “Eiaha roa ei taata haavarehia e parau e, Ua haavarehia vau e te Atua.” No te aha? No te mea “e ore roa hoi te Atua e vare i te ino, e ore roa hoi oia e haavare i te taata.” (Iakobo 1:13) Eita te Atua e haavare aore e tamata i te taata ma te turai atu ia rave i te ino. E ere te Atua te tumu o te mau ohipa iino e aita atoa o ˈna e turai i te taata ia rave i te reira. O vai aore ra eaha te tumu e tupu ai te ino?

Ua faaite te Bibilia i te tahi tumu e mauiui ai te taata ma te na ô: “Aore roa e taata i ite i ta ˈna e roohia mai: mai te iˈa i noaa i roto i te upeˈa ra, e te manu ia noaa i te marei ra, o to te taata ïa fifiraa i te anotau ino ra, ia uˈana noa mai te pohe i nia ia ratou.” (Koheleta 9:12) I roto i te mau tupuraa manaˈo-ore-hia aore ati purumu, te tumu rahi e mauiui ai te taata, no te mea ïa tei te vahi oia e tupu ai te reira. A 2 000 matahiti aˈenei, ua faatia Iesu e ua pohe 18 taata a parari ai te tahi fare rahi. (Luka 13:1-5) Aita ratou i pohe no te ohipa ta ratou i rave i roto i te oraraa, no te mea râ tei raro aˈe ratou i te reira a parari ai. Aita i maoro aˈenei, i Tenuare 2010, ua tupu te tahi aueueraa fenua puai mau i Haïti. Ua parau te faatereraa o tera fenua e ua hau atu 300 000 taata tei pohe. Aita ïa e hiˈoraa o vai ratou. Noa ˈtu eaha te taime, e nehenehe te taata atoa e roohia i te maˈi.

E na ô paha vetahi: ‘Eita anei te Atua e nehenehe e haa ia ore tera mau ati ino mau ia tupu? Eita anei e nehenehe ia ˈna e paruru i te taata maitai i te ati?’ Ia na reira te Atua, e tia ia ˈna ia ite hou te reira a tupu ai. E nehenehe te Atua e ite atea i te tupu, mea faufaa râ ia hiˈopoa e ua faaoti anei te Atua i te faaohipa i to ˈna mana rahi no te ite i tera mau ohipa.—Isaia 42:9.

Ua parau te Bibilia: “Tei te raˈi ra to matou Atua, i te raveraa i ta ˈna i hinaaro ra.” (Salamo  115:3) E haa Iehova ia au i ta ˈna i faaoti i te rave, e ere râ, e rave oia i te mau mea atoa ta ˈna e nehenehe e rave. Hoê â atoa ïa no ta ˈna e faaoti ra i te ite. Ei hiˈoraa, a rahi roa ˈi te ino i roto i na oire tahito o Sodoma e Gomora, ua na ô te Atua i te patereareha Aberahama: “E haere na vau i raro e hio, ia ite au e ua rave mau anei ratou mai te au i te aue i tae mai iaˈu nei, e aore ra aita anei.” (Genese 18:20, 21, Te Bibilia Moˈa V.C.J.S., 1976) Na mua ˈˈe, ua faaoti Iehova eiaha ia hiˈo aore ra ia ite i te rahi o te ino i roto i na oire. E nehenehe ïa ta Iehova e faaoti eiaha e ite i te mau mea atoa. (Genese 22:12) E ere râ te auraa e mea paruparu oia. Mea “tia roa ta ˈna ohipa,” e faatano ïa te Atua i ta ˈna e faaoti i te ite ia au i ta ˈna opuaraa. Eita roa oia e faahepo i te taata ia rave i te tahi ohipa. * (Deuteronomi 32:4) Eaha ïa te haapii mai? Na te Atua e faaoti e faaohipa anei oia i to ˈna mana no te ite i te tupu e no te hiˈo i ta vetahi taata e rave.

O te taata atoa te tahi tumu o te ino. A hiˈo mea nafea te Bibilia e faataa ˈi i te turai ia rave i te ohipa ino. “Ua haavarehia râ te taata ia faahahau-ê-hia, e ia riro noa ˈtu i to ˈna iho hinaaro tia ore. E ua tô anaˈe taua hinaaro tia ore ra, fanau maira ta ˈna, o te hara; e ia rave-faahope-hia te hara ra, fanau maira ta ˈna, o te pohe.” (Iakobo 1:14, 15) Ia faatupu te taata i to ratou mau hinaaro tia ore, e mauiui mau ratou i muri aˈe. (Roma 7:21-23) Mea maoro teie nei to te taata raveraa i te ohipa riaria mau tei haamauiui roa. Hau atu â, e turai-atoa-hia vetahi e te feia iino ia na reira noa.—Maseli 1:10-16.

E mea tia anei ia haa te Atua ia ore te feia e rave i te ohipa ino? A feruri na, ua faaite te Bibilia e ua poiete te Atua i te taata ma to ˈna ra huru. E nehenehe ïa te taata e faaite i to ˈNa mau huru maitatai. (Genese 1:26) Ma te tiamâraa i horoahia ˈtu, e nehenehe te taata e maiti e here i te Atua e e tapea i te taiva ore ma te rave i te mea tia i to ˈna aro. (Deuteronomi 30:19, 20) Ahiri te Atua i faahepo atu ia rave i te tahi ohipa, aita anei oia i haafaufaa ore i to ratou tiamâraa? E ere te taata mai te matini e rave noa i te faauehia ˈtu! A parau atoa ˈi e ua faataa-ê-na-hia te oraraa o te taata e te mau mea atoa ta ˈna e rave, aita anei ratou e parau ra e ua riro tatou mai te matini ra te huru? Auê tatou i te mauruuru e te faatura ra te Atua ia tatou ma te vaiiho mai ia maiti i te rave! E ere râ te auraa e e vai noa te mauiui ta te taata i faatupu e a muri noa ˈtu.

Ia ui oe i te tahi taata haamori i te mau atua Initia aore ra i tei pee ra ia Bouddha i te uiraa o te api matamua o teie vea, e pahono atu paha ratou mai teie: “E ati te taata maitai no te ture o te Karma. Te ooti ra ratou i ta ratou i ueue i roto i te tahi atu oraraa na mua ˈˈe.” *

Mea maitai ia hiˈo i ta te Bibilia e parau ra no nia i te pohe no te ite e mea tano anei te haapiiraa o te Karma. I te ô i Edene, te nohoraa o te huitaata i tahito ra, ua parau te Atua poiete i te taata matamua ra o Adamu: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (Genese 2:16, 17) Ahiri Adamu i faaroo i te Atua, eita oia e hara, e ora râ e a muri noa ˈtu. Ua riro te pohe ei faautuaraa i te faaroo ore i ta te Atua faaueraa. I muri iho, a fanau ai i te tamarii, “ua taea-atoa-hia te taata atoa e te pohe.” (Roma 5:12) I muri aˈe, te parauhia ra e “e utua te pohe no te hara.” (Roma 6:23) Te faataa atoa ra te Bibilia e “o te taata hoi i pohe ra, ua matara ïa oia i te ino [“hara,” Te Faufaa Api] nei.” (Roma 6:7) Ia pohe te taata, aita faahou ïa ta ˈna e utua no te mau hara ta ˈna i rave i roto i to ˈna oraraa.

E mirioni taata e parau nei e o te Karma te tumu o te mau mauiui. E farii te taata i tiaturi i te reira i to ˈna e to vetahi ê mau ati ma te ore râ e haapeapea ia tupu te reira. Ma te farii râ i tera tiaturiraa, te parau ra ïa ratou e eita e nehenehe e faaore i te ino. No ratou, e taui te tupuraa ia faaite te taata i te haerea maitai e ia noaa ia ˈna te ite taa ê a tiamâ atu ai i te faautuaraa o te fa-faahou-raa i roto i te tino ê. Mea taa ê roa râ teie mau manaˈo i ta te Bibilia e parau ra. *

E ere râ te taata te tumu matamua o te ino. Hou a riro ai te Diabolo ra o Satani, e melahi taiva ore oia na te Atua. Tera râ, “aore oia i haapao i te parau mau” e ua turai i te taata ia hara. (Ioane 8:44) Ua faatupu oia i te tahi orureraa hau i te ô i Edene. (Genese 3:1-5) Ua pii Iesu Mesia ia ˈna mai “te ino” e “te arii o teie nei ao.” (Mataio 6:13; Ioane 14:30) Te pee nei te rahiraa ia Satani e te faatia ra i to ˈna hinaaro ma te ore e haapaohia i ta Iehova mau aratairaa maitai. (Ioane 1, 2:15, 16) Te na ô ra te Ioane 1, 5:19: “Te vai noa nei to te ao atoa i raro aˈe i taua varua ino ra.” Te vai ra ˈtu â tei riro ei melahi ino e tei pee ia Satani. Te faaite ra te Bibilia e te haa nei Satani e ta ˈna mau demoni no te “haavare i to te ao atoa nei” e te “ati ra hoi to te fenua.” (Apokalupo 12:9, 12) O Satani te Diabolo ïa te tumu matamua o te ino.

Mea papu maitai e e ere te Atua te tumu o te ati o te taata, e ere atoa o ˈna te haamauiui ra ia ratou. Ua fafau râ oia i te faaore i te ino mai ta te tumu parau i muri nei e faaite.