Ua paari au i Rmaysh, piri atu i te otia e faataa ê ia Iseraela ia Lebanona. E tamaˈi to tera ra tau, te haamanaˈo noa ra vau i te mau ofai paaina e te mau taata hapa ore i ere i te mau mero o to ratou tino. E mea fifi roa te oraraa e ua rahi roa te taparahiraa e hamani-ino-raa taata.

Tei roto to matou utuafare i te Etaretia Maronite, hoê o te mau Etaretia Katolika i Hitia o te râ. O papa te ohipa noa ia nehenehe na melo 12 o to ˈna utuafare ia tamaa. O mama râ, e haapao ïa o ˈna ia haere te toea i te fare pureraa. Ua haamata ˈtura vau i te manaˈo e aita te haapaoraa e te taata atoa i nehenehe e tauturu i te feia paruparu.

I to ˈu taurearearaa, ua hinaaro roa vau e haapii i te taputô Tinito parauhia kung fu. E tera iho â ta ˈu i rave e ua riro vau ei taata aravihi i te faaohipa i te rima, te avae e e rave rau mauhaa o tera taputô. No ˈu, ‘eita ta ˈu e nehenehe e faaore i te tamaˈi, te feia râ e hamani ino ia vetahi ê, oia ïa.’ Ia ite au e piti taata ia taputô, oioi noa vau i te tapea ia raua. Ua riro vau ei taata e riri taue noa. Ua riaria te feia atoa o te pae Apatoa o Lebanona ia ˈu no te mea ua faatupu vau i ta ˈu iho aroraa i te parau-tia ore e te ino.

Ua apiti au i te tahi pǔpǔ taputô Tinito i Beyrouth i 1980. Ma te mau mauhaa rau, e topita-noa-hia tera vahi, ua tamau râ vau i te haere i reira no te haapii i te taputô. Aita ˈtu â ohipa i roto i to ˈu oraraa, tamaa, taoto e e ora mai ia Bruce Lee, te tahi taata hauti teata i Taina e Marite e aito atoa hoi no te taputô Tinito. Ua tâpû vau i to ˈu rouru mai to ˈna, ua haere mai ia ˈna e ua pee atoa i to ˈna hiˈoraa a taputô ai, aita roa vau e ata noa ˈˈe.

Ua hinaaro vau e riro ei taata aravihi roa no te taputô Tinito i Taina. I te tahi po, te faaineine ra vau ia ˈu no te haere i Taina a patotohia ˈi i te opani. O to ˈu ïa hoa e e piti Ite no Iehova. E ahu ereere to nia iho ia ˈu e ua î roa to ˈu tino i te hou, ua parau atu  vau, ‘Aita vau i ite noa ˈˈe i te hoê mea no nia i te Bibilia.’ Aita roa vau i manaˈo noa ˈˈe e e taui to ˈu oraraa i tera taime.

Ua faaite mai na Ite no te aha eita ˈi te taata e nehenehe e faaore roa i te parau-tia ore e te ino. Ua faataa mai e o te Diabolo ra o Satani te tumu o tera mau fifi. (Apokalupo 12:12) Ua maere roa vau i te hau e te tiaturi o na Ite e ua putapû atoa a haapii mai ai e iˈoa to te Atua. (Salamo 83:18) Ua faaite atoa mai raua i te Timoteo 1, 4:8 e na ô ra: “O te haamataro hoi i ta te tino nei, e faufaa iti haihai to te reira: area te paieti ra, e faufaa ïa to te reira i te mau mea atoa nei, e maitai tei faaitehia mai no te reira i teie nei ao e te ao a muri atu.” Ua taui roa to ˈu oraraa i tera mau parau.

Ma te peapea, aita vau i farerei faahou i te mau Ite, ua parau atu hoi to ˈu utuafare eiaha e hoˈi mai. Noa ˈtu râ, ua haavî au i to ˈu feruriraa no te faaea i te taputô Tinito e no te haapii i te Bibilia. Noa ˈtu e aita to ˈu mau taeae i au i tera manaˈo, ua faaoti papu vau i te farerei faahou i te mau Ite no Iehova no te haapii i te Bibilia e o ratou.

Ua tamau vau i te imi i te mau Ite, aita râ i farerei noa ˈˈe i te hoê. I roto i taua area taime ra, ua oto roa vau no te pohe-taue-raa to ˈu metua tane e no te tahi atu mau ati o to ˈu utuafare. Ua haamata vau i te rave i te ohipa i roto i te hoê taiete paturaa. I te tahi mahana, ua ani mai to ˈu hoa rave ohipa o Adel te iˈoa eaha te haapeapea ra ia ˈu. Ua haamata oia i te tauaparau no nia i ta te Bibilia tiaturiraa, te tia-faahou-raa. I muri aˈe, ua haapii mai tera Ite î i te here e te faaoromai i te Bibilia e iva avaˈe.

I te roaraa o te haapiiraa, ua taa ia ˈu e e titauhia ia taui roa vau i to ˈu huru. Mea fifi roa râ, e riri hanoa hoi au e mea ohie atoa ia faatihaehae mai. Maoti te Bibilia, ua haapii au e nafea ia haavî ia ˈu e ia ore e riri taue noa. Ei hiˈoraa, teie te aˈoraa a Iesu i roto i te Mataio 5:44: “E aroha ˈtu i to outou mau enemi . . . e pure hoi [no] te feia i parau ino mai e tei hamani ino mai ia outou.” Te faaara atoa ra te Roma 12:19: “Eiaha outou e tahoo . . . ua papaihia hoi e, Te parau maira Iehova, Ei ia ˈu te riri, na ˈu ïa e tahoo atu.” Ua noaa ia ˈu te hau maoti tera e te tahi atu mau irava Bibilia.

I muri aˈe, ua faatura to ˈu utuafare i te mau Ite no Iehova noa ˈtu e i te haamataraa ua patoi ratou i ta ˈu faaotiraa e haapii. Ua tahoê mai hoi hoê o to ˈu mau taeae no te haamori ia Iehova e ua turu mama i to mâua faaroo i mua ia vetahi ê e tae roa i to ˈna poheraa.

Ua haamaitai-atoa-hia vau na roto ia Anita ta ˈu vahine taiva ore e te nehenehe tei riro ei apiti here i roto i te pororaa taime taatoa. Mai 2000 ra, te ora nei mâua i Eskilstuna i Tuete e te haapii ra i te Bibilia i te feia e paraparau ra i te reo o te mau Arabia.

Te peapea noa ra to ˈu aau no te feia e mauiui ra no te hamani-ino-raa. Te ite ra râ vau i te oaoa e te hau no te mea ua taa ia ˈu te tumu o te reira, oia atoa i ta te Atua e fatata roa i te rave no te faaore i te ino.—Salamo 37:29.