Солун чүүл, Иегованың Херечилери чүгле кижилерге эвилең-ээлдек эвес, а мээң ыттарымга база аттыг болганнар. Бир катап Элейн дээр уруг оларга печенье берген. Ынчаар ол мээң ыттарымны аайынче киирип алган! Ол кезектерге агаарлап чораан санывыста-ла, ыттарым мени «печеньелиг стендиже» сөөртүр апарган.

Элээн каш айлар дургузунда ынчап келген бис. Стенди чанынга баргаш-ла, ыттарым чаагай печенье чиир, а мен Херечилер-биле каш сөс солчур турдум. Ындыг турбуже, бодумну олардан хоорук туттунуп турган мен. 70 харның артын ашкан кижи-дир мен, ынчалза-даа Иегованың Херечилериниң чүү чүвеге бүзүреп турарын тода билбес чораан мен. Протестант церковьтан алыс шынны тып алыр дээн оралдажыышкыннарым чүге-даа чедирбээн. Ынчангаш Библияны бодум хууда өөренир деп шиитпирлеп алган мен.

Ол үеде хоорайның өске-даа кезектеринде стендилери-биле турар Иегованың Херечилерин эскерип эгелээн мен. Олар база дыка эки улус болду. Кандыг-даа айтырыг салырыңга, Библияның дузазы-биле харыылап бээр. Оларның оозун сонуургап, оон-даа артык хүндүлеп эгелээн мен.

Бир катап Элейн меңээ: «Дириг амытаннар — Бургандан белек-тир деп чөпшээрежир боор силер» — дээн. «Ынчанмайн канчаар, ол 100 хуу шын» — деп харыылаан мен. Оон ол Исайя 11:6—9-та шүлүктерни номчуп берген. Ынчан журналды албаан-даа болзумза, иштимде аажок сонуургаан мен.

Ол үеден бээр Элейн база ооң өөнүң ээзи Брент мээң-биле элээн каш катап чугаалашкан. Ол чугааларывыс кыска-даа бол, меңээ чугула турган. Ёзулуг христиан кижиниң кандыг болурун билип алыры-биле Буянныг медээ номнарын болгаш Ажыл-чорудулганы номчуурун олар меңээ сүмелээн. Мен шак ынчаар кылган мен. Удатпаанда, 2016 чылдың чайын, Брент биле Элейн меңээ Библияны өөредип эгелээн.

Неделя санында Библияны өөренип, Хурал залынче баар үени, бичии оол дег, четтикпейн манап турган мен. Библия херек кырында чүү чүвеге өөредип турарын билип алыры меңээ дыка улуг аас-кежик болгаш Бургандан белек-тир. Бир чыл ажыг болганда, сугга суктуруп алгаш, Иегованың Херечизи апарган мен. 79 харлыымда чуртталганың шын оруун ам-на тып алган мен. Бердинген бараалгакчыларындан тургустунган өг-бүлезиниң кежигүнү боор алдар-хүндүнү Иегова меңээ көргүскен».