1. Иегова бистен чүнү манап турар?

 ИЕГОВА бердинген ынакшылды чараш деп санап турар (Ос. 6:6). Ол Михей медээчини таварыштыр бисти база бердинген ынакшылга ынак болзун деп күзеп турар (Мих. 6:8). Ол чараш шынарны канчаар илередирин билип алыр дизе, баштай ооң дугайында тода сайгарыптаалыңар.

2. Бердинген ынакшыл дээрге чүл ол?

² «Чаа делегей» очулгазында «бердинген ынакшыл» деп сөс каттыжыышкыны 230 хире катап таваржып турар. Ынчалза-даа чамдык Библияның очулгаларында ол сөстү «энерел» кылдыр дамчыткан. Бо болгаш дараазында статьяга «энерел» деп сөс таваржыр болза, ону «бердинген ынакшыл» кылдыр билип алыр болза эки. «Чаа делегей» очулгазында библейжи сөстерни тайылбырлаан словарьда бердинген ынакшылдың дугайында мынча дээн: «Ол ынакшыл харыысалгага, сеткилинден сонуургалга, бердинген чорукка болгаш ханы хандыкшылга үндезилеттинген. Бердинген ынакшылды Бурган колдуунда кижилерге илередип турар. Ындыг-даа болза, кижилер база ол ынакшылды бот-боттарынга илередип шыдаар». Иегова ышкаш бердинген ынакшылды кым-даа илередип шыдавас. Ол ону кымга илередип турар база канчаар? Ону бо статьяга сайгарар бис. А дараазында статьяга бердинген ынакшылды илередиринге хамаарыштыр Иегованы канчаар өттүнүп болурувусту база бот-боттарывыска ону канчаар илередирин көөр бис.

3. Иегова Моисейге Бодунуң дугайында чүнү чугаалаан?

³ Иегова израильчилерни Египеттен үндүрген соонда, Моисейге Бодунуң дугайында чугула чүүлдү чугаалаан: «Дээрги-Чаяакчы  мен — килеңнээчел эвес, кээргээчел, ээ көрнүүчел, өндүр улуг энерелдиг болгаш бүзүрелдиг Бурган мен! Мен Бодумнуң энерелимни муң-даа дугаар салгалга көргүзүп, улустуң кем-буруузун, кемниг херектерин, бачыттарын өршээп турар мен» (Хост. 34:6, 7). Иегова шак мындыг шынарларлыг боорга, аянныг эвес-тир бе? Солун чүүл, Иегова ол сөстерни чугаалап тургаш, бердинген ынакшылының бир онзагай талазын ажыткан. Кандыг?

4, 5. а) Иегова бердинген ынакшылының кандыг талазын ажытканыл? б) Кандыг айтырыгларны сайгарар бис?

⁴ Эскерип көрүңер, Иегова Бодун элбек, өндүр улуг энерелдиг, азы бердинген ынакшылдыг, Мен дээн. Иегованың ол шынарының дугайында Библияда өске-даа шүлүктерден көрүп болур (Сан. 14:17—18; Неем. 9:17; Ыд. ыр. 85:15; 102:8; Иоил 2:13; Иона 4:2) *. Өндүр улуг бердинген ынакшылды Библияда чүгле Иеговага хамаарыштыр ажыглап турар. Иегова бисти ол онзагай шынарының талазын билип алзын деп күзеп чоруур. Давид хаан мынча деп ырлап турган: «Дээрги-Чаяакчы, Сээң энерелиң дээрге чедип турар... Бурганым, Сээң энерелиңниң улуг үнелиин аа, кижи төрелгетен Сээң чалгыннарың адаанга хоргадаар чер тып аар» (Ыд. ыр. 35:6, 8). Давид ышкаш, Иегованың бердинген ынакшылы дээш өөрүп четтирип турар бис бе?

⁵ Бурган бердинген ынакшылын канчаар илередип турарын билип аар дизивиссе, ийи айтырыгны сайгарыптаалыңар: Иегова бердинген ынакшылын кымга илередип турар база Иегованың бердинген ынакшылын миннип турар улус кандыг йөрээлдерни ап турар?

6. Иегова бердинген ынакшылды кымга илередип турар?

⁶ Кижи хөй-ле чүүлге ынак бооп болур. Чижээ, Библияда кижини чер ажылынга, кызыл арагага, үске, чагыг-сургаалга, билигге, мерген угаанга дээш оон-даа өске чүүлдерге ынак дээн (2 Чыл. 26:10; У. ч. 12:1; 21:17; 29:3). Ынчалза-даа бердинген ынакшылды дириг эвес чүүлдерге илередири болдунмас. Ынчаарга Иегова бердинген ынакшылды шупту улуска илередип турар бе? Чок, чүгле Бодунуң эштеринге. Ол оларга кайгамчык келир үени аазаан база олардан кажан-даа хая көрүнмес.

7. Иегова бүгү улуска ынакшылды канчаар көргүзүп турар?

⁷ Иегова ынакшылды бүгү улуска көргүзүп турар. Иисус Никодимге мынча дээн: «Аңаа бүзүрээн кижи бүрүзү өлбезин, харын мөңге амыдыралдыг болзун дээш, Бурган Бодунуң  эр чаңгыс Оглун берипкен» (Ин. 3:1, 16; Мф. 5:44, 45).

8, 9. а) Иегова бердинген ынакшылын чүге бараалгакчыларынга илередип турар? б) Улаштыр чүнү сайгарар бис?

⁸ Иегова бердинген ынакшылын Ооң-биле тускай хамаарылгалыг улуска, Бодунуң бараалгакчыларынга, илередип турар. Бо чүүл Библияда Давид хаан биле Даниил медээчиниң сөстеринден көскү. Чижээ, Давид: «Сени билир улуска — энерелиңни... ам-даа хайырла»; «Дээрги-Чаяакчының энерели Оон коргар улуска үе-дүптен эгелээш, кезээ мөңгеде артып каар» — дээн (Ыд. ыр. 35:11; 102:17). А Даниил медээчи мынча деп бижээн: «Дээрги, өндүр улуг болгаш сүртенчиг Бурганым! Сеңээ ынак болгаш Сээң айтыышкыннарың сагып чоруур улус-биле Сен Бодуңнуң керээңни сагып чоруур болгай сен» (Дан. 9:4). Бо сөстерден алырга, Иегова бердинген ынакшылын бараалгакчыларынга илередип турар. Чүге дизе олар Ону билир, Оон коргар, Аңаа ынак база Ооң айтыышкыннарын сагып чоруур. Ынчап кээрге, Иегованың бердинген ынакшылын чүгле Ооң бараалгакчылары миннип турар!

⁹ Иеговага бараалгавайн турган үевисте Ол биске, шупту улуска дег, ынакшылды көргүзүп турган (Ыд. ыр. 103:14). А Ооң бараалгакчызы апаргаш, Ооң бердинген ынакшылын көрүп эгелээн бис. Иегова Бодунуң бараалгакчы бүрүзүнге мындыг чылыг-чымчак сөстерни чугаалаан: «Мээң энерелим кажан-даа сенден адырылбас» (Иса. 54:10). Бис, Давид ышкаш, Иегова «Аңаа бердинген кижини аңгылап алганын» билир бис (Ыд. ыр. 4:4). Иегова биске тускай чылыг-чымчак сагыш човаашкынны илередип турар. Ону көргеш, чүнү миннир бис? Ыр күүседикчизи мынча дээн: «Мерген угаанныг кижи бо чүүлдү чүрээнге кадагалап алзын, Дээрги-Чаяакчының энерелин бодап чорзун» (Ыд. ыр. 106:43). Бо сөстерни кичээнгейге ап тургаш, Иегованың бараалгакчыларынга илередип турар бердинген ынакшылының үш талазын сайгарыптаалыңар.

10. Иегованың бердинген ынакшылы кезээ шагда үстүп төнмес деп сактыры чүге чугула? (Ырлар 30:8).

¹⁰ Бурганның бердинген ынакшылы кезээ шагда үстүп төнмес. Ооң дугайында Ырлар  135-те 26 катап бижээн. Бир дугаар шүлүк мынчаар эгелээн: «Дээрги-Чаяакчыга өөрүп четтириңер; Ол ачылыг-дыр. Ооң энерели кезээ шагда үстүп төнмес-тир» (Ыд. ыр. 135:1). 2-ден 26-га чедир шүлүктерде «Ооң энерели кезээ шагда үстүп төнмес-тир» деп домак катаптап-ла турар. Ол ырны номчуп тургаш, Иегованың бердинген ынакшылының талаларының кайы хире хөйүн база өскерилбезин кижи кайгап ханмас. «Ооң энерели кезээ шагда үстүп төнмес-тир» деп домак Иегова чонунга кезээде ынак боор деп бисти бүзүредип турар. Бистиң четпестеривис бар-даа болза, Бурган бисти төлеп чок деп санавайн турар база бистен хая көрүнмес. Харын-даа Ол биске берге үелерде шынчы өңнүк бооп, кезээде чанывыска чоруур. Ону билири дыка аянныг эвес-тир бе? Биске ол чүзү-биле ажыктыг? Иегованың эрге-чассыг ынакшылы чуртталгавыста бергелерни ажып эртеринге херек күштү болгаш өөрүшкүнү биске берип, Аңаа улаштыр шынчы бараалгаарынга дузалап турар. (Номчуптуңар: Ырлар 30:8.)

11. Ырлар 85:5-тен алырга, Иегованы өршээринче чүү оттуруп турар?

¹¹ Бердинген ынакшыл Бурганны өршээринче оттуруп турар. Бачыт үүлгеткен кижи шын эвес оруун каапкаш, буруузун миннирге, Иегова бердинген ынакшылдыг болгаш, ону өршээп турар. Ооң дугайында Давид мынча дээн: «Ол биске кем-буруувус ёзугаар хамаарылга көргүспеди, бисти бачыттарывыс ёзугаар кезетпеди» (Ыд. ыр. 102:8—11). Арын-нүүр аарыырга, кайы хире берге болурун Давид бодунга көрген. Оон ыңай ол Иегова «үзүк-соксаал чок буруудатпас» деп база шынзыккан. Ырлар 85:5-те Иегованы өршээринче чүү оттуруп турарын ол бижээн (номчуптуңар). Ол мөргүлдүң сөстеринден алырга, Иегова буруузун миннип турар улусту өршээп чоруур, чүге дизе «Ооң энерели... өндүр бедик» (Ыд. ыр. 102:11).

12, 13. Эрткен частырыгларывыс дээш эмин эрттир буруузунуп турар болзувусса, биске чүү дузалаар?

¹² Бир эвес кижи бодунуң кылган бачыды дээш хараадаар болза, ооң бодунга эки боор. Ынчаар ол буруузун миннип, өскерлип алыр. Ынчалза-даа Бурганның чамдык бараалгакчылары ооң мурнунда кылган частырыглары дээш боттарын хөлүн эрттир буруудадып турар. Олар чеже-даа сеткилиниң ханызындан буруузун миннээн болза, чүрээ дөмей-ле  Иегова оларны кажан-даа өршээвес деп шүгүмчүлеп, буруудадып чоруур. Силер база шак ындыг минниишкиннерлиг болзуңарза, оон адырлып алырынга чүү дузалаар? Бурган силерге бердинген ынакшылын илередип чоруур деп боданыңар. Ол чылыг-чымчаа-биле силерни бердинген ынакшылынга бүзүредип турар.

¹³ Биске ол чүзү-биле ажыктыг? «Иисустуң төккен ханы бисти кандыг-даа бачыттан арыглаар» (1 Ин. 1:7). Четпес талаларывыс бар-даа болза, арыг арын-нүүрлүг бооп, Иеговага өөрүшкүлүг бараалгап болур бис. Бир эвес эрткен бачыттарывыс дээш буруувусту миннингеш-даа, дөмей-ле муңгарап чоруур болзувусса, Иегова бисти өршээринге белен, харын-даа Ол ону күзеп турар деп бодуңарга сагындырыңар. Ырлар 102-де Давид Иегованың бердинген ынакшылы биле өршээчели сырый харылзаалыг дээн: «Дээрниң черден бедии дег, Ооң энерели Оон коргар улуска өндүр бедик; чөөн чүктүң барыын чүктен ырак турары дег, бузуттарывысты Ол бистен ырадып каапты» (Ыд. ыр. 102:11, 12). Ийе, Иегованың өршээчели элбек (Иса. 55:7).

14. Бурганның бердинген ынакшылының ачызында камгалалды Давид чүнүң-биле дөмейлээн?

¹⁴ Иегованың бердинген ынакшылы бисти камгалап турар. Давид Иеговага: «Сен — мээң чаштыр черим сен: мени айыыл-халаптан адырар сен; камгалалың өөрүшкүзү-биле бүргээр сен... Дээрги-Чаяакчыга идегээн кижини Ооң энерели бүргээр» — деп ырлап турган (Ыд. ыр. 31:7, 10). Шаанда хоорайны долгандыр быжыг ханалар ооң чурттакчыларын камгалап турган. Ооң-биле дөмей, Иегованың бердинген ынакшылы бисти шынчы чоруувусту үрептер айыылдардан камгалап турар. Оон аңгыда, Иегованың бердинген ынакшылының ачызында Ооң-биле быжыг найыралывыс биске камгалал бооп турар (Иер. 31:3).

15. Иегованың бердинген ынакшылы хоргадал биле шивээге чүзү-биле дөмей?

¹⁵ Бурганның чонунда бар камгалалдың дугайында бижип тургаш, Давид чараш деңнелгени ажыглаан: «Сени алгап, ырлап көрейн. Шивээм болур Бурганым сен, энерелдиг Бурганым сен!» А өске ырда ол Иегованың дугайында мынча дээн: «Ол меңээ шынчы, Ол — мээң шивээм, хоргадалым, камгалакчым, дозуг-камгалалым; Оон хоргадал алыр мен» (Ыд. ыр. 58:18; 143:2). Давид Иегованың бердинген ынакшылын чүге шивээ биле хоргадалга дөмейлээн? Бурган бисти Ооң-биле быжыг хамаарылгалыг болзун дээш, кезээде камгалап, карактаар. Аңаа кайда чурттап турарывыс хамаанчок. Эң-не кол чүүл — бистиң Бурганга шынчы бараалгап чоруурувус. Аңаа дөмей бодал 90-гы Ырда бар, ону Моисей бижээн чадавас: «Бурганым, Сен мээң хоргадалым сен, быжыг шивээм сен» (Ыд. ыр. 90:1—3, 9, 14). Моисей Иегованы Ырлар 89-та хоргадалым деп адаан (Ыд. ыр. 89:2). А чок апаарының бетинде ол: «Үе-дүптен бээр турган Бурган — хоргадалың-дыр, Ооң мөңге холдары сени тудуп турар» — деп сеткилди чылдып кээр бодалды немээн (Ы. х. к. 33:27). «Ооң мөңге холдары сени тудуп турар» дээн сөстер Иегованың ынакшылының база бир талазын ажыдып турар. Кандыг?

16. Иегова биске канчаар дузалап чоруур? (Ырлар 135:23).

¹⁶ Иегова бистиң хоргадалывыс болза, чүүден-даа кортпас бис. Ынчалза-даа ундаралга алзыптар, чүнү-даа кылыр күжүвүс чок каар хүннер база турар. Ындыг үелерде Иегова чүнү кылып турар? (Номчуптуңар: Ырлар 135:23.) Ол бисти деткиир дээш холун сунуп, бисти чылыг-чымчаа-биле көдүрүп, бут кырынга тургузуп турар (Ыд. ыр. 27:9; 93:18). Биске ол чүзү-биле ажыктыг? Бурганның деткимчезинге кезээде идегеп болур  бис. Бирээде, каяа-даа чорувуста, быжыг хоргадалывыс бар. Ийиде, дээрде ынакшылдыг Адавыс бис дээш эрге-чассыг сагыш човап чоруур.

17. Бурганның бердинген ынакшылы бисти чүге бүзүредип турар? (Ырлар 32:18—22).

¹⁷ Бо статьяга сайгарганывыс дег, кандыг-даа шенелделерде Иегова бистиң-биле кады база биске шынчы артарынга дузалаар (2 Кор. 4:7—9). Иеремия медээчи: «Дээрги-Чаяакчы, энерелиң кызыгаар чок, өршээлиң-даа үстүп төнмес» — деп бижээн (Ыы. 3:22). Иегованың биске бердинген ынакшылы кажан-даа төнмес деп бүзүрээр бис. Чүге дизе ыр күүседикчизи: «Дээрги-Чаяакчыдан коргар, Ооң энерелинге идегээр улусту Ол карактап-кадагалаар» — дээн. (Номчуптуңар: Ырлар 32:18—22.)

18, 19. а) Чүнүң дугайында сактыр ужурлуг бис? б) Дараазында статьяга чүнү сайгарар бис?

¹⁸ Чүнү сактыр ужурлуг бис? Иегова шупту кижилерге ынак. Алыс шынны билип алырының мурнунда ол ынакшылды бодувуска көрүп чораан бис. А Иегованың бараалгакчызы апаргаш, Ооң бердинген ынакшылын миннип эгелээн бис. Ынчангаш Ол бисти кажан-даа кагбас. Дээрде ынакшылдыг Адавыс бисти куспактап, камгалап, биске берген аазаашкыннарының шуптузун күүседиптер. Ол бистиң кезээ-мөңгеде Өңнүүвүс болуксап турар (Ыд. ыр. 45:2, 3, 8). Ынчангаш кандыг-даа шенелделерге Ол биске бердинген бооп артарынга күштү бээр!

¹⁹ Иегова бараалгакчыларынга бердинген ынакшылын канчаар көргүзүп турарын көрдүвүс. Оон аңгыда, Ол бисти бот-боттарывыска бердинген ынакшылды илередиривисти күзеп турар. Ону канчаар кылып болурун дараазында статьяга сайгарар бис.