1. Иисустан кандыг белектер алган бис?

 ЧАҢГЫС-ДАА кижи Иисус ышкаш кижи төрелгетени дээш хөйнү кылбаан. Ол черге чорааш, кижилерге дузалажып, күжүн харам чокка ажыглаан (Лк. 9:12—17). Ооң өндүр улуг белектериниң бирээзи — бис дээш амы-тынын бергени-дир (Ин. 15:13). Иисус дирилген соонда-даа беримчелиг арткан. Ол, аазааны дег, бисти өөредир, аргалаар ыдыктыг сүлдени Адазындан дилеп берген (Ин. 14:16, 17; 16:13). Өөреникчилер белеткээринге херек бүгү чүүлдү чыыштарга Иисустан ап турар бис (Мф. 28:18—20).

2. Эфесчилерге 4:7, 8-те белектер кымнарыл?

² Иисустуң бир белээн көрээлиңер. Ол дээрден «белектер болган кижилерни берген» деп, Павел элчин бижээн. (Номчуптуңар: Эфесчилерге 4:7, 8, ЧД.) Ол белектер — чыыш дээш сагыш човап турар эр улус (Эф. 1:22, 23; 4:11—13). Хуралдың дузалакчылары, удуртукчулары, кожуун хайгааракчылары ол белектерге хамааржыр a. Олар тергиин эвес болгаш, чазып болур (Иак. 3:2). Дээргивис Иисус ол белектер таварыштыр биске дузалажып турар.

3. Чыышты быжыктырарынга акыларга бис шупту канчаар дузалажып болур бис? Чижекти чугаалаңар.

³ Чыышты быжыктырар ажылды Иисус эр улуска дааскан (Эф. 4:12). Ол чугула ажылга шупту дузалап болур бис. Ону Хурал залының тудуунга деңнептээли. Бир кижи бетон кудар азы кирпич салыр. А өскези тудугга аъш-чем кылыр азы материалдар эккээр дээн ышкаш  ажылдарга дузалажыр. Шак-ла ынчаар чыышты быжыктырар кол ажылды хуралдың дузалакчылары, удуртукчулары, кожуун хайгааракчылары чорудуп турар. Амы-хууда чугаавыс, херектеривис-биле оларга дузалап болур бис. Акыларның кандыг чугула ажыл кылып турарын, оларга база Иисуска белектери дээш, өөрүп четтиргенивисти канчаар илередип болурун сайгарып көрээлиңер.

ХУРАЛДЫҢ ДУЗАЛАКЧЫЛАРЫ «АЧЫ-ДУЗА ЧЕДИРЕР»

4. Бирги векте хуралдың дузалакчылары кандыг дуза кадып турган?

⁴ Бирги векте чамдык акылар хуралдың дузалакчылары турган (1 Тим. 3:8). «Ачы-дуза чедирер» улус дээни-биле, Павел хуралдың дузалакчыларын чугаалаан боор (1 Кор. 12:28). Удуртукчулар чыыш өөредиринге болгаш кадарчы ажылче кол кичээнгейни салзын дээш, чамдык ажылдарны дузалакчылар кылып турган. Олар Ыдыктыг Бижилгени дүжүрүп бижиир азы аңаа ажыглаар херекселдерни садар турган чадавас.

5. Хуралдың дузалакчылары акы-угбалар дээш чүнү кылып турар?

⁵ А бөгүн хуралдың дузалакчылары кандыг ажыктыг ажыл кылып турар? Дыка хөй даалгалар күүседир (1 Пет. 4:10). Олар чыыштың сан-чурагайын, суртаалдаар девискээрин харыылаар, ном-дептер чагыдар, аудио, видео херекселдерин ажылдадыр, чурум тудар, Хурал залын ажаап-карактаар. Түңнелинде чыыштар болгаш суртаал ажылы ужур-чурумнуг эртип турар (1 Кор. 14:40). Чамдык дузалакчылар ажыл хүнүнде чыышка пунктулар эрттирер, илеткелдерни база чугаалаар. Хөй кезиинде оларны суртаалдаар бөлүктүң удуртукчузунга дузалаштырар. Удуртукчулар кадарчы ажылын кылырда, дузалакчыларны эдертип ап болур.

6. Ажылгыр дузалакчыларны чүү дээш үнелээриңерни чугаалап көрүңер.

⁶ Чыыштың дузалакчыларынга акы-угбаларның хамаарылгазын билип алыылы. «Оларга улуу-биле четтирдивис! Ужуражылгалар кандыг-даа бергедээшкин чок эртип турар. Мен илеткелдер дыңнап, харыылап, ырлап, чуруктар база видео көрүп болур мен. Ол бүгү акыларның ачызында — деп, Боливиядан Бе́берли b чугаалаан. — Айыыл чок байдалды тургузуп, видеоконференцияга коштунуп болур кылдыр дузалакчылар сагыш човаар. Программа соонда өргүлдерни санап, ном-дептерни үлеп, ашталгага дузалакчылар идепкейлиг киржип турар. Оларга канчап ынак болбазыл?» Колумбиядан удуртукчунуң өөнүң ишти Ле́сли мынчаар үлешкен: «Чыышта ажылдар дыка хөй. Чамдыызын харын-даа дузалакчылар кылып турар. Оон башка өөм ээзин бажыңга шуут көрбес ийик мен. Оларның чүткүлү база кезээде дузалажырынга белени дээш, дыка-ла өөрүүр-дүр мен!» Ол сөстерге долузу-биле каттыжар боор силер (1 Тим. 3:13).

7. Хуралдың дузалакчыларынга өөрүп четтиргенивисти канчаар көргүзүп болур бис? (Чурукту база көрүңер.)

⁷ «Өөрүп четтириңер!» — деп, Библия бисти кыйгырган (Кол. 3:15). Хуралдың дузалакчыларынга өөрүп четтиргенин минниринден аңгыда, ону чугаалаары чугула. Финляндияда бараалгап турар Кши́штоф деп удуртукчу акывыс мынчаар үлешкен: «Мен оларга кылган ажылы азы сорук киирген бодалы дээш четтиргенимни илередип, открыткага азы СМС-ке тааржыр  библейжи шүлүктү бижиирин кызар чордум». Чаа Каледониядан Паска́ль биле Жаэ́ль мынчаар кылып турар: «Сөөлгү үеде дузалакчылар дээш хөй мөргүп, Иеговага четтиргенивисти илередип, оларга дузалаарын дилеп турар бис». Иегова ындыг дилеглерге харыылаарга, чыышка дыка эки салдарлыг (2 Кор. 1:11).

УДУРТУКЧУЛАР «АРАҢАРДА КЫЗЫМАК АЖЫЛДАП ТУРАР»

8. Бирги векте удуртукчулар кандыг ажылды күүседип турган? (1 Фессалоникчилерге 5:12, 13).

⁸ Бирги векте удуртукчулар акы-угбалар дээш сагыш човап, кызымак ажылдап турган (номчуптуңар: 1 Фессалоникчилерге 5:12, 13; 1 Тим. 5:17). Бүдүн чыышка хамаарышкан шиитпирлерни олар кады хүлээр турган. Олар чыыштарны эрттирип, Бурган-биле харылзаага хоралыг чүүлдерден камгалаар дээш, акы-угбаларны ынакшылдыы-биле сургаар чораан (1 Фес. 2:11, 12; 2 Тим. 4:2). Ол эр улус боттарының өг-бүлелерин база утпаан. Чоок улузунуң Иегова-биле быжыг хамаарылгазын кадагалаарынга дузалап, акша-көпеек-биле база олар хандырып турган (1 Тим. 3:2, 4; Тит. 1:6—9).

9. Удуртукчуларның чамдык харыысалгаларын чугаалаңар.

⁹ Амгы үеде удуртукчуларның ажылы эвээш эвес. Олар өөрүшкүлүг медээниң суртаалчылары (2 Тим. 4:5). Чыыштың девискээринге суртаалды организастап, өөреникчилер белеткээр ажылга өөредип, боттары база суртаалга чүткүлдүг. Удуртукчулар — энерелдиг, улус ылгавас шииткекчилер. Христиан кижи аар бачыт кылыптарга, Иегова-биле хамаарылгазын катап тургузарынга олар дузалажыр. Чыыш арыг артсын дээш, база сагыш човап турар (1 Кор. 5:12, 13; Гал. 6:1). Чүнү-даа мурнай, удуртукчулар — кадарчылар (1 Пет. 5:1—3). Олар библейжи илеткелдерни чугаалап, чыышта кижи бүрүзүн эки билип алырын кызып, акы-угбаларга ужурашкаш сорук киирер. Чамдыктары Хурал залдарын тудуп, ону ажаап-карактап, шуулганнар эрттиреринге дузалап, эмнелгелер-биле харылзажыр комитеттерде база аарыг улус-биле ужуражыр бөлүктерде бараалгап турар. Удуртукчулар бис дээш могаг-шылаг чок бараалгап турар!

10. Ажылгыр удуртукчуларыңарны чүү дээш үнелээриңерни үлежип көрүңер.

¹⁰ Хойлары сагыш човангыр кадарчыларның ачызында «коргуп-сүрээдевес» деп, Иегова өттүр сөглээн (Иер. 23:4). Финляндиядан Йоха́нна ол чүүлдү бодунга көрген. Авазы аарый бээрге, мындыг болган: «Сеткилимни өске улус-биле үлежиринге ынак эвес мен. Бир хүн чугаалажырынга белен турумда, эки билбезим удуртукчу мени кичээнгейлиг дыңнаан. Кады мөргээш, Иегова меңээ ынак деп ол бүзүреткен. Чүнү чугаалаанын сагынмас-даа болзумза, сеткилим чиигей берген. Дыка херек өйде дузалажыр акыйны Иегова чорудупканынга бүзүрээр мен». А силерге чыыжыңарда удуртукчулар канчаар дузалашкан?

11. Удуртукчуларга өөрүп четтиргенин канчаар илередип болур? (Чурукту база көрүңер.)

¹¹ Бүгү «кылып турар ажыл-херээ дээш» удуртукчуларга четтиргенивисти илередирин Иегова күзээр (1 Фес. 5:12, 13). Финляндиядан Хенрие́тта мынчаар үлешкен: «Удуртукчулар дузалаарынга кезээде белен. Ынчалза-даа оларның өске улуска бодаарга, үези, күжү хөй азы бергелери чок эвес. Чамдыкта: „Дыка эки удуртукчу сен!“» — деп акымны мактаар мен. Турциядан Сера́ мынча дээн: «Удуртукчуларга  улаштыр бараалгаарынга күш киирер деткимче дыка херек. Ынчангаш открытка бижип, дүштеки чемче чалап азы кады суртаалдап болур». Ажылы дээш ылаңгыя четтиргениң илередиксээриң удуртукчу бар бе? Ооң дугайында аңаа чугаала азы ону үнелээриңни бир-ле арга-биле көргүс (1 Кор. 16:18).

КОЖУУН ХАЙГААРАКЧЫЛАРЫ ЧЫЫШТАРНЫ БЫЖЫКТЫРЫП ТУРАР

12. Иисус бирги векте кымны таварыштыр чыыштарны быжыктырып турган? (1 Фессалоникчилерге 2:7, 8).

¹² Иисус чыышка кожуун хайгааракчыларын база берген. Чүге? Сорулгазы — чыыштарны быжыктырары (Аж.-ч. 15:40, 41). Иисустуң башкарылгазы-биле Иерусалимде удуртукчулар Павелди, Варнаваны болгаш өске-даа эр улусту аңгы-аңгы чыыштарны кезиир кылдыр чорудуп турган (Аж.-ч. 11:22). Ол эргий кезиир бараалгакчылар акы-угбалары дээш эки чуртталгазын каггаш, амы-тынын безин харамнанмас болган. (Номчуптуңар: 1 Фессалоникчилерге 2:7, 8.)

13. Кожуун хайгааракчыларының ажылы кандыг?

¹³ Кожуун хайгааракчыларының анаа олурар чайы чок. Оларның чамдыызы чыыштарже баарда, чүс-чүс километрлер эртер. Неделя санында илеткелдерни чугаалап, акы-угбаларны деткип, эгелекчилер биле удуртукчуларга ужуражып, суртаалдаар ужуражылгаларны эрттирип турар. Кожуун база регион шуулганнарын организастаар, аңаа илеткелдерни ол чугаалаар. Эгелекчилер школазынга кожуун хайгааракчызы башкылаар, девискээриниң эгелекчилери-биле тускай ужуражылганы эрттирер, салбырның далаштыг-даа даалгаларын база күүседип турар.

14. Ажылгыр кожуун хайгааракчыларын чүү дээш үнелээриңерни үлежип көрүңер.

 ¹⁴ Кожуун хайгааракчылары чыыштарга кандыг салдар чедирип турар? Турциядан акывыс: «Ооң келгениниң соонда, акы-угбаларга оон-даа хөй дузалажыксаар чордум. Биске аңгы-аңгы кожуун хайгааракчылары кээп турган, оларның ажылы хөй азы мээң-биле чугаалажыр үези чок деп кажан-даа бодаваан мен» — деп үлешкен. Билиривис Йоханна бир катап акывыс-биле суртаалдап турганын чугаалаан. Бажыңнар кезээш кымга-даа ужурашпааннар, ынчалза-даа ол бараалгалды дыка эки сактып алганын Йоханна үлешкен: «Ол хүннү кажан-даа утпас мен. Ийи угбам өске черже көже бээрге, оларны дыка сактып турган мен. Акывыс мени чылыг-чымчак деткип, чарлыышкын — түр када, а чаа делегейге эш-өөрүм-биле эрттирер үем хөй болур деп тайылбырлап берген». Кожуун хайгааракчызының оларга канчаар дузалашканы дег, солун таварылгаларны хөй кезиивис база сактып болур (Аж.-ч. 20:37—21:1).

15. а) Кожуун хайгааракчыларынга оларның ажылын үнелээривисти канчаар көргүзүп болур бис? (3 Иоанн 5—8). (Чурукту база көрүңер.) б) Хуралдың дузалакчыларының болгаш удуртукчуларының кадайларын чүү дээш үнелээр бис, оларга өөрүп четтиргенивисти канчаар илередип болур бис? ( «Оларның өөнүң иштин утпаңар» деп көзенекти көрүңер.)

¹⁵ Иоанн элчин эргий кезиир бараалгакчыларны моон-даа соңгаар хүндүлээрин Гайга чагааш: «Оларның чорук-херээн уламчылаарынга дузалажыр болзуңза, ол чорууң Бурганның мурнунга төлептиг болур» — дээн. (Номчуптуңар: 3 Иоанн 5—8.) Шак ындыг хүндүткелди канчаар илередип болур бис? Бир аргазы — шайлаарынче чалаары азы суртаалдаар ужуражылгаларже баары. 6-гы абзацтан Лесли ооң-биле кызыгаарланмас. «Оларның херек чүүлүн бээрин Иеговадан дилеп мөргүүр  чордум. Өөм ээзи-биле чагаага азы сөс кырынга бис дээш кылып турар чүүлүн кайы хире үнелээривисти илередир бис» — дээн. Ол акылар бис ышкаш деп утпаңар. Олар аарып, бир-ле чүүл дээш дүвүреп, безин ундарап болур. Силерниң чылыг-чымчак сөстериңер азы бичии белекчигежиңер оларның мөргүлдериниң харыызы болур чадавас! (У. ч. 12:25).

ДУЗАЛАКЧЫЛАР, УДУРТУКЧУЛАР БИСКЕ ДЫКА ХЕРЕК

16. Чугаалар 3:27-ге дүүштүр акылар сеңээ кандыг айтырыглар салып болур?

¹⁶ Бүгү делегейде акы-угбаларга чыыш дээш сагыш човаар эр улус дыка херек. Сугга суктурган акый болзуңза, дуза кадып болур сен бе? (Номчуптуңар: Чугаалар 3:27.) Хуралдың дузалакчызы болур сорулгалыг сен бе? А дузалакчы кылдыр бараалгап турар болзуңза, удуртукчу болурунче чүткүп турар сен бе? c Чагырганың медээчилер школазынга өөредилге эртер дээш, чуртталгаңда бир-ле чүүлдү өскертип болур сен бе? Ындыг өөредилге сени Иисустуң даалгаларынга улам белеткеп каар. Бодуңга чигзинер болзуңза, Иеговага мөргү. Кандыг-даа ажылды кылып шыдаар кылдыр ыдыктыг сүлдеден оон дилеп көр (Лк. 11:13; Аж.-ч. 20:28).

17. Иисус — сагыш човангыр Хаан деп чүден көскү?

¹⁷ Бо делегейниң төнчүзү келбээн шаанда, Иисус өөреникчилери-биле кады болурун аазаан (Мф. 28:20). Ол сөзүнге шынчы. «Ооң белектери» — хуралдың дузалакчылары биле удуртукчулар маргыш чок бадыткал. Ынакшылдыг, беримчелиг болгаш бодап билир Хаанывыска өөрүп четтиргенивисти илередир бис, чүге дизе ол бис дээш сагыш човаар акыларны берген! Боттарын хайыралавайн кылып чоруур ажылы дээш үнелээривисти, олар билип алырын күзээр бис. Ынчангаш ону чугаалап азы өске-даа арга-биле четтиргенивисти илередиилиңер. «Шупту буянныг болгаш тергиин белектерни» берген Иегова Бурганывысты алгап-мактаарын утпаалыңар (Иак. 1:17, ЧД).