ЖУРНАЛДЫҢ ДАШТЫНДА ТЕМА
Үеге чагыртпаан
АЙЫЫЛ: Библияны хол-биле бижип, хоолгалап турар үелерде папирусту биле пергаментини ажыглап турган (2 Тимофейге 4:13) a. Кандыг айыыл тургустунуп болур турган?
Папирус дыка орлуучал база дораан карарып каар турган. Ричард Паркинсон биле Стивен Куирки дээр египтолог эртемденнер чугаалап турган: «Үе эртерге, папирустуң хендирлеринден бүткен өзээ болгаш доозуну артып каар. Папирустан кылган дүрүг-ном дүдүп азы шыктан дораан ирип каап болур. Ону күске-күжүген болгаш ылаңгыя ак кымыскаяктар хээп кааптып болур». Чамдык папирустарны тып алган соонда, хүннүң чырыынга болгаш шык черге шыгжаарга, дораан үрелип калган.
Пергамент, папируска көөрде, быжыг, ынчалза-даа ол база кам чок хамаарылгадан, изиг-сооктан, шыктан азы чырыктың салдарындан үрелип каар b. Курт-кымыскаяк база хээп каап болур. Бурунгу дүрүг-номнарга хамаарыштыр бир номга мындыг түңнелди үндүрген: «Олар душ бооп, үрелбээн» (Everyday Writing in the Graeco-Roman East). Бир эвес библейжи дүрүг-номнар чоорту тоглап, үрелген болза, Библияның медээзи оларның-биле катай чиде берип болур турган.
БИБЛИЯ КАНЧААР КАДАГАЛАТТЫНГАН? Иудей хоойлу-биле алырга, хаан бүрүзү ол «хоойлуну (азы Библияның бирги беш номун) бодунга чара бижидип» алыр харыысалгалыг турган (Ыдыктыг хоойлуну катаптааны 17:18). Оон артык, мергежилдиг бижээчилер Ыдыктыг Бижилгениң хоолгаларын хөйү-биле кылган болгаш, б. э. I векте оларны чүгле Израильде синагогалардан эвес, харын-даа ырак Македониядан безин тып ап болур турган! (Лука 4:16, 17; Ажыл-чорудулга 17:11). Ол бурунгу дүрүг-номнарның чамдыызы бистиң үеге чедир канчаар артып кааныл?
Өлүг далайның дүрүг-номнарын кургаг агаарлыг черге база куйларга дой саваларга чажырып шыгжап каанының ачызында үрелбээн
Чаа чагыг-керээниң специализи Филипп Камфорт мынчаар демдеглээн: «Ыдыктыг Бижилгениң дүрүг-номнарын кадагалап арттырар дээш, иудейлер кувшиннерге болгаш өске саваларга ону шыгжап турганнар». Христианнарның ол чаңчылды сагып турганы көскү. Ынчангаш чамдык баштайгы библейжи дүрүг-номнарны дой савалардан, караңгы өрээлдерден, куйлардан база агаары дыка кургаг девискээрлерден тып турган чылдагааны ол.
ТҮҢНЕЛИНДЕ: Библейжи дүрүг-номнарның муң-муң кезектериниң чамдыызын 2 000 чыл бурунгаар бижээн-даа болза, бистиң үеге чедир кадагалаттынган. Бистиң эрага четкен чаңгыс-даа өске бурунгу документ ынча хөй бурунгу бижиктер-биле бадыткаттынмаан.
