Саксонияда бичежек суурга төрүттүнген мен. Ынчан ол Герман Демократтыг Республиканың (ГДР) девискээринге хамааржыр турган. Өг-бүлевиске чылыг-чымчак, найыралдыг байдал турган. Ада-ием мени бедик мөзү-шынарлыг боор кылдыр өөредип турган. ГДР коммунистиг чурт турган болгаш, бистиң черивисте кижилер шажын чүдүлгени шоолуг херекке албас турган. Мен амы-хууда бодум Бурганга бүзүревес чораан мен. 18 харлыымга чедир Бурганга бүзүревес чорук болгаш коммунистиг идеологияларның салдарынга өзүп келген мен.

Коммунистер шупту улус дең эргелиг деп идеяны тарадып турган. Ол чүүлдү мен база сонуургаар турган мен. Эт-хөреңгини кижи бүрүзүнге деңге үлептер болза, бай-ядыы чоруктуң аразында ылгал чиде бээр деп санап чораан мен. Ынчангаш аныяктарның коммунистиг организациязынче кирип алган мен. 14 харлыымда долгандыр турар бойдусту камгалаар болгаш эрги саазыннар болбаазырадыр проектиге киржип турган мен. Безин Ауэ деп хоорайның тус чериниң чагырыкчылары меңээ «хүндүлүг хамааты» деп атты тывыскан. Аныяк-чалыы турган-даа болзумза, ГДР-ниң чамдык билдингир политиктери-биле эки таныш турган мен. Мээң чуртталгамда сорулгаларым шын, а келир үем эки деп чигзинмес чораан мен.

Хеп-хенертен мээң ол «делегейим» буурап дүшкен. Удатпаанда, 1989 чылда Берлинниң ханазы дүжүп каарга, Чөөн Европаның коммунистиг чурттарының бөлүү база буураан. Ол аар согуушкун соонда база бир чүүл болган. ГДР-де чөптүг-шынныг чорук чок деп билип каан мен. Чижээ, коммунистиг тургузугну деткивес улуска ийи дугаар сорттуң улузунга дег хамаарылганы көргүзер турган. Ындыг чүүл канчап турар чүвел? Бис, коммунистер, шупту улус дең эргелиг деп бүзүреп турган болгай бис. Шынап-ла коммунизм хоозун меге чүүл бе? Сактырымга, будум адаанда чер ойлуп кээп дүшкен ышкаш болган.

Сорулгаларымны өскерткеш, музыка биле уран-чүүлге чуртталгамны бараалгадыр деп шиитпирлеп алган мен. Музыка училищезин дооскан соомда, меңээ университетче кирер шупту аргалар ажыттынып келген. Мен музыкант болгаш чурукчу болурун күзеп турган мен. Ада-иемниң өөредип кааны эки мөзү-шынарны чоорту уттуп эгелээн мен. Бүгү-ле хостуг үемни оюн-тоглааже үндүреринге өйлежип каан мен. Чижээ, мен хары угда элээн каш уруглар-биле таныжып турган мен. Ынчалза-даа музыка, уран-чүүл болгаш хөглүг чуртталга мээң сагыш-сеткилимде тыптып келген хоозуралды долдурбаан. Безин чураан чуруктарым ишти-хөңнүмде дүвүрелдеримни болгаш коргуштарымны көргүзүп турган. «Келир үеде чүү болурул? Чүү дээш чурттап чоруур мен?» деп айтырыглар мээң бажымга болганчок-ла кирип кээр турган.

Удатпаанда айтырыгларымга харыыларны тып алган мен. Бир катап кежээ, училищеге кичээлдер соонда, студентилер чыглып алгаш, келир үе дугайында чугаалажып эгелээн бис. Студентилерниң бирээзи, Манди, * Иегованың Херечизи турган. Ол меңээ дыка эки сүме берген. «Андреас, айтырыгларыңга харыыны тып аар деп бодаар болзуңза, Библияны номчуп көр даан» — деп, ол чугаалаан.

Мээң бодалдарым саарзыкталып, бирде — Библияны сонуургап, бирде — аңаа бүзүрексевейн турган мен. Ынчалза-даа дөмей-ле сонуургалым күштүг болган. Манди меңээ Даниил номунуң 2 дугаар эгезинде өттүр билген медеглелди көргүскен. Мен шуут-ла кайгап каан мен. Ында чүс-чүс чылдар иштинде бистиң үевиске чедир солчуп турган делегей чергелиг күрүнелерниң дугайында бижээн болган. Оон Манди кижи төрелгеттенниң келир үезиниң дугайында өттүр билген медеглелди база көргүскен. Ам-на айтырыгларымга харыыларны кайыын дилээрин билип каан мен! Ынчалза-даа келир үеде чүү болурун кым алыс шынныы-биле өттүр билип медеглээнил? Шынап-ла Бурган бар чүве бе?

Манди мени Иегованың Херечилери боор Хорст биле Ангелика дээр өг-бүле-биле таныштырып каан. Олар-биле Библияны өөренип эгелээн мен. Бурганның адын Иегова деп адап, ону улуска чугаалап турар дың чаңгыс шажын организациязы — Иегованың Херечилери деп удатпаанда көрүп каан мен (Ырлар 82:19; Матфей 6:9). Иегова Бурган улуска келир үеде черге дываажаңга мөңге чуртталганы аазап турар деп билип алган мен. Ырлар 36:9-та мынча дээн: «Дээрги-Чаяакчыга ынаныр улус чер-чуртту салгап алыр». Бурганның хоойлу-дүрүмү-биле чурттаар деп шиитпирлеп алган кижи бүрүзү мөңге чурттаар деп билип кааш, аажок-ла өөрээн мен.

Ынчалза-даа чуртталгамны чурумчудары берге болган. Музыка болгаш уран-чүүлге чедиишкиннерим ужундан чүрээмге өрү көрдүнер чорук сайзырай берген. Ынчангаш бодумну томаарыыр чорукка катап өөредир апарган мен. Мөзү-шынар чок оруктан адырлыры база меңээ берге турган. Библейжи хоойлу-дүрүмнер-биле чурттаарын кызып чоруур улуска Иегованың шыдамыын, кээргээчелин болгаш бодап билирин көргеш, Аңаа улуу-биле өөрүп четтирер-дир мен!

18 харга чедир мен коммунизмниң идеалдарынга алзып, Бурган чок деп санап чораан мен. Ооң соонда чуртталгамны Библия удуртур кылдыр шиитпирлеп алган мен. Келир үеден кортпайн барган мен база чуртталгамның шын оруун тып алган мен. 1993 чылда сугга суктуруп алгаш, 2000 чылда Иегованың Херечизи, чүткүлдүг бараалгакчы Табита-биле өгленип алган мен. Бис улусту Иегова-биле таныштырар дээш, хөй үени үндүрүп турар бис. Суртаал үезинде мен ышкаш коммунизмниң идеалдарынга база Бурганга бүзүревес чорукка кижизиттинген улустарга бо-ла таваржыр бис. Оларга Иегованың дугайында чугаалаары — меңээ улуг өөрүшкү-дүр.

Иегованың Херечилери-биле Библия өөрени бээримге, ада-ием аажок корга бергеннер. Ынчалза-даа ол чүүл чуртталгамче кайы хире эки салдар чедирип турарын олар эскерип кааннар. Ам оларның Библияны номчуп, Иегованың Херечилериниң чыыштарынче барып турарынга аажок өөрүүр-дүр мен.

Бистиң өг-бүлевис аас-кежиктиг, чүге дизе бис Табита-биле Библияда сүмелерни чуртталгавыска ажыглаарын кызып чоруур бис. Чижээ, «бот-боттарыңарга шынчы болуңар» дээн сүме биске бот-боттарывыска бүзүрелдиг болурунга дузалап турар (Еврейлерге 13:4).

Ам келир үеже бүзүрелдиг көрүп турар мен. Мен эп-найыралдыг, амыр-тайбың болгаш чаңгыс аай, демниг делегей чергелиг ха-дуңманы тып алган мен. Бурган-биле сырый харылзаалыг бо өг-бүледе, кижи бүрүзү дең эргелиг. Шак ол чүүлдү мээң чүрээм аажок күзеп чораан. Ол мээң черле дилеп чораан чүүлүм-дүр.