1. Келир үе чүнү эккээрин, канчап билип алырыл?

 ТЕЛЕВИЗОРГА медээлер көргеш, «бо делегей кайнаар бар чыдар?» деп, айтырыгны чаңгыс удаа эвес бодуңга салган боор сен. Бистиң чуртталгавыска хилинчек-човалаң болгаш озал-ондак болза-даа хенертен болу бээр, ынчангаш эртенги хүн кымга-даа чигзинчиг апаар (Иаковтуң 4:14). Ынчалзажок келир үеде чүү болурун Иегова билир (Исаия 46:10). Ол бодунуң Сөзүнде, Библияда, бистиң үениң чүгле коргунчуг болуушкуннарын болгаш хилинчектерин эвес, а чоокку келир үеде кижилерни манап турар кайгамчык йөрээлдерни база баш бурунгаар чугаалаан.

2, 3. Иисустуң өөреникчилери кандыг айтырыг салган, ынчангаш ол чүү деп харыылааныл?

² Каржыны узуткап кааптар болгаш черни дываажаң кылыптар Бурганның Чагыргазының дугайында Иисус Христос чугаалап турган (Луканың 4:43). Чагырга кажан чагырып эгелээрин кижилер билип алыксап турган. Бир катап Иисустуң өөреникчилери оон айтырган: «Силерниң катап кээриңерни болгаш бо делегейниң төнчүзүн кандыг демдек бадыткаарыл?» (Матфейниң 24:3). Бо тургузугнуң төнчүзү кажан кээрин чүгле Иегова Бурган ылап билир деп,  Иисус харыылаан (Матфейниң 24:36). Ынчалза-даа Иисус бисти чүнү-даа билбес кылдыр артырбаан. Чагырга ёзулуг тайбыңны тургузарының мурнунда черге чүү болурунуң дугайында ол чугаалаан. Ол өттүр билген медеглелдер бо хүннерде күүсеттинип турар.

³ Ол чүүлге шынзыгарының бетинде дээрге кандыг тулчуушкун болганын, сайгарып көрээлем. Ол тулчуушкунну кижилерниң аразындан кым-даа көрбээн-даа болза, ооң түңнели кижи бүрүзүнге хамаарылгалыг.

4, 5. а) Иисус Хаан апарган соонда, удаваанда дээрге чүү болганыл? б) Ажыдыышкын 12:12-биле алырга, дээрге тулчуушкун чүге чедирген-дир?

⁴ Иисус Христос 1914 чылда дээрге Хаан апарган деп эрткен эгеден билип алдывыс (Даниил 7:13, 14). Иисус хаан эргени алгаш, хөделип эгелээн. «Дээрге ооң соонда дайын эгеледи: Михаил [Иисус] база аңаа чагырткан дээрниң төлээлери улуга [Эрликке], а улу бодунуң төлээлери-биле оларга удур демисежип үндү» — деп Библияда чугаалаан a. Эрлик биле ооң каржы төлээлери аштыргаш, черже дүжүр октадыпканнар. Кажан дээр багай салдардан арыгланы бээрге, Бурганның шынчы, көзүлбес мага-боттуг оолдары кайы-хире өөрээн деп! Ынчалзажок ол чүүл кижилерге эки чүү-даа эккелбээн. Библияда чугаалаан: «А чер... ат болур... чүге дээрге эрлик силерже бадып келген-дир! Ол хөлчок килеңнээн, чүге дээрге ооң үези көңгүс эвээш артканын билир-дир» (Ажыдыышкын 12:7, 9, 12).

⁵ Ол тулчуушкун чүге чедиргенил, кичээнгейни салып көрем: Эрлик килеңнээш, черде чурттап турар шупту кижилерге ажыг-шүжүг чедирип эгелээн. Ол чүүл ылап-ла бистиң үевисте болуп турарын көрүп көөр бис. Ынчалза-даа хосталга чоок. «Үези көңгүс эвээш артканын» Эрлик боду безин билир. Библияда ол үени «сөөлгү хүннер» деп адаан (2 Тимофейге 3:1). Бурган удавас черни Эрликтиң  салдарындан хостаар деп билип алыры кайы-хире оожургалдыг-дыр! Бистиң үевисте кандыг библейжи өттүр билген медеглелдер күүсеттинип турарын, сайгарып көрээлем. Ол медеглелдер сөөлгү хүннерде чурттап турарывысты херечилеп турар. Ол ышкаш Иеговага ынак шупту кижилерге Бурганның Чагыргазы удавас төнчү чок йөрээлдерни бээр деп, олар бадыткап турар. А эгезинде Иисустуң чугаалап турган бистиң үевистиң дөрт онзагай демдээн сайгарып көрээлем.

6, 7. Дайыннар болгаш аш-чут дугайында Иисустуң сөстери бөгүн канчаар күүсеттинип турар?

⁶ «Чонче чон, күрүнеже күрүне халдай бээр» (Матфейниң 24:7). Сөөлгү чүс чыл дургузунда дайыннарга миллион-миллион кижилер өлген. Бир британ төөгүчү демдеглээн: «ХХ век кижи төрелгетенниң төөгүзүнде эң-не хан төгүүшкүннүг болган. [...] Ол век ында-хаая чүгле түр када соксап турган, төнчү чок дайыннарның үези турган». А «Уорлдуотч» институттуң отчёдунда мынча деп чугаалаан: «Чүгле чаңгыс ХХ векте дайыннарның уржуунда, бистиң эраның эрткен шупту чүс-чүс чылдарынга бодаарга, үш катап хөй кижи өлген». 1914 чылдан эгелээш, дайын маргыштарынга 100 миллион ажыг кижи өлген. Дайын үезинде чоок кижилеривистиң кайы-бирээзин чидирген-даа болзувусса, миллион-миллион кижилерниң  өлүмүнүң эккелген бүгү аарышкызын болгаш качыгдалын төнчүзүнге чедир билип ап шыдавас бис.

⁷ «Чер болганга аш-чут... болур» (Матфейниң 24:7). Сөөлгү 30 чылдарда аъш-чем бүдүрүлгези аажок өскен деп, шинчилелдер көргүзүп турар. Ол хирезинде кижилер аштап турар хевээр, чүге дизе оларның ногаа-аймаа өстүрер чери азы аъш-чем садып алыр акшазы чок. Ядыы чурттарда миллиард ажыг кижилер бир хүнде-ле чаңгыс азы оон-даа эвээш доллар-биле чурттаар ужурга таваржып турар. Ол кижилерниң хөй кезии үргүлчү чедир чемненмейн турар. Делегей чергелиг кадык камгалал организациязының түңнели-биле алырга, чылдың-на беш миллион ажыг уруглар колдуу-ла чедир чемненмейн турарындан өлүп турар.

8, 9. Иисустуң өттүр билген медеглелдери бистиң хүннеривисте күүсеттинип турар деп, чүүден көскү?

⁸ «Күштүг чер шимчээшкиннери... болгулаар» (Луканың 21:11). Американың Каттышкан Штаттарының Геологтуг албан чериниң медээлери-биле алырга, чүгле 1990 чылдан эгелеп, ортумаа-биле чылдың-на бажыңнар үрээр база черниң картын чарып турар 17 улуг чер шимчээшкиннери болуп турар апарган. А өске үндезин-биле алырга, «сөөлгү 100 чыл дургузунда чер шимчээшкиннери чүс-чүс муң кижилерниң амы-тынын үскен, ынчангаш амгы үениң технологиялары качыгдаан кижилерниң санын шоолуг эвээжетпээн».

 ⁹ «Аарыг-аржык... болгулаар» (Луканың 21:11). Медицина чедиишкиннери хөй апарган-даа болза, делегейде чаа аарыглар тыптып, эрги аарыглар кедеревишаан хевээр. Бир отчёт-биле алырга, сөөлгү он чылда туберкулёз, малярия болгаш холера деп, 20 эки билдингир аарыглар аажок нептерээн. Оларның чамдыызы-биле безин эмнер дузазы-биле демисежири нарыыдаан. Эвээш дизе 30 хире чаа аарыглар тывылган. Оларның хөй кезии эмнеттинмес болгаш безин өлүмге чедирип турар.

10. 2 Тимофейге 3:1—5-те баш бурунгаар медеглээни дег, бөгүн кижилерниң мөзү-шынары кандыг апарганил?

¹⁰ Библияда сөөлгү хүннерде болур болуушкуннардан аңгыда, кижи ниитилели канчаар өскерли бээрин база бижээн. Павел элчин кижилерниң угаан-хөөнүн көргүскен. 2 Тимофейге 3:1—5-те ол чугаалаан: «Сөөлгү хүннерде аар-берге үе чедип кээрин билип ал». Кижилерниң мөзү-шынары кандыг болурун Павел баш бурунгаар медеглээн:

• чүгле боттарын бодаар,

• алыксак-чиксек,

• ада-иезин дыңнавас,

• өскерликчи,

• кээргээр сеткили чок,

• бодун туттунуп билбес,

•   каржы,

• боттарының күзээшкиннерин хандырарынга Бургандан артык ынак улус болу бээр,

• улус Бурганны хүндүлээриниң чүгле даштыкы хевиринден туттунар, а Ооң ылаптыг күжүнден ойталаар.

11. Каржы кижилер-биле чүү болурун Ырлар 91:8 канчаар көргүзүп турар?

¹¹ Сээң чаныңда чурттап турар улустуң шак ындыг аажы-чаңын эскерер-дир сен бе? Ындыг боор оң. Делегей ам ындыг кижилер-биле долган болгай. Ол чүүл удавас Бурган хөделип эгелей бээрин көргүзүп турар. Ооң дугайында Библияда мынчаар чугаалаан: «Бузуттуг улус оът-сиген дег өзүп үнүп, бачыт үүлгедикчилери чечектелип турар-даа болза, кезээ мөңгеде узуткаттырар» (Ырлар 91:8).

12, 13. «Алыс шын билиг» үениң төнчүзүнде канчаар көвүдээнил?

¹² Библияда баш бурунгаар чугаалааны дег, сөөлгү хүннер хөй муңгарал эккеп турар. Ынчалзажок безин бо дүвүрээзинниг делегейде Иеговага ынак улустуң өөрүүр чылдагааннары бар.

¹³ «Алыс шын билиг көвүдээр» — деп Библияда, Даниил номунда, баш удур чугаалаан. Ол сөстер кажан күүсеттинер ужурлуг турган? «Үениң төнчүзүнде» (Даниил 12:4). 1914 чылдан эгелээш, Иегова биче сеткилдиг улуска Библияны билип алырынга мергежиир  кылдыр, тускай дузалажып эгелээн. Оларга Бурганның адының, ооң күзел-соруунуң, Иисус Христостуң хосталга бээр өргүлүнүң, өлген кижилерниң байдалының болгаш диргизиишкинниң дугайында үнелиг алыс шын ажыттынып келген. Оон артык, чуртталга ёзулуг аас-кежиктиг болуп, Бурганны алдаржыдар кылдыр, чүнү кылырын Иегованың бараалгакчылары билип алган. Чагырга Бурганның күзел-соруун чер кырынга канчаар күүседирин база ол кандыг черни ээлеп турарын олар эки билип эгелээн. Ол билиглер оларны чүүже оттурганыл? Ол айтырыг бо сөөлгү хүннерде күүсеттинип турар өске өттүр билген медеглел-биле сырый харылзаалыг.

14. Чагырга дугайында буянныг медээ кайы-хире нептергей тараттынып турар база ол медээни кым медеглеп турар?

¹⁴ Иисус Христос «бо делегейниң төнчүзүнүң» дугайында бодунуң өттүр билген медеглелинде чугаалаан: «Дээрниң Чагыргазының дугайында бо Буянныг Медээни бүгү делегейге, хамык чоннарга медеглээн турар» (Матфейниң 24:3, 14). Бөгүн Чагырга дугайында буянныг медээ — ол чүү деп Чагырга чүвел, ол чүнү кылырыл база кандыг йөрээлдер эккээрил, — 230 ажыг чурттарда болгаш девискээрлерде, 400 хире дылда, бүгү чер кырынга дыңналып турар. Ол өөрүшкүлүг медээни «сөөк-язы, аймак, чон база дыл бүрүзүнден» миллион-миллион Иегованың Херечилери медеглеп турар (Ажыдыышкын 7:9). Бурганның Сөзү херек кырында чүге өөредип турарын билип алыксаар миллион-миллион кижилер-биле бажыңнарынга төлевир чок библейжи кичээлдерни олар эрттирип турар. Ылаңгыя, алыс шын христианнарны «бүгү улус... көөр хөңнү чок апаар» деп Иисустуң сөстерин сактып кээр болза, ол өттүр билген медеглелдиң күүсеттингени — ёзулуг кайгамчык чүүл бооп турар (Луканың 21:17).

15. а) Сөөлгү хүннерде чурттап турар бис деп, бүзүрээр-дир сен бе? Тайылбырлап көрем. б) Иеговага удурланып турар улуска «төнчү» чүнү эккээр база Бурганның Чагыргазынга чагыртып турар кижилер-биле чүү болурул?

¹⁵ Сөөлгү хүннерде чурттап турар бис деп бо библейжи өттүр  билген медеглелдерниң күүсеттинип турары сени бүзүредир-дир бе? Кажан Иегова буянныг медээни медеглээрин соксадып болур деп шиитпирлептерге, «төнчү» кээр (Матфейниң 24:14). «Төнчү» деп сөс Бурган черни каржыдан арыглаар болгаш аңаа кара өжегерээн удурланып турар кижилерни узуткап кааптар дээн уткалыг. Иегова ону кылырын Иисуска болгаш ооң дээрде күчү-күштүг төлээлеринге дагзып каан (2 Фессалоникажыларга 1:6—9). Эрлик болгаш ооң буктары моон соңгаар чоннарны будалдырбас. Ынчан Бурганның Чагыргазы ооң чөптүг башкарылгазынга чагыртып турар кижилерниң шуптузунга йөрээлдерни бээр (Ажыдыышкын 20:1—3; 21:3—5).

16. Бо сөөлгү хүннерде чүнү канчаары мерген угаанныг болур?

¹⁶ Эрликтиң тургузуу удавас узуткаттынар болганда, «чүнү канчаар бис?» деп боданыры чугула. Иегованың болгаш ооң негелделериниң дугайында билип алырын уламчылаары эргежок чугула (Иоанның 17:3). Библияны кичээнгейлиг өөренирин кызыт. Иегованың күзел-соруун күүседирин күзеп турар кижилер-биле хөй аралаш (Еврейлерге 10:24, 25). Иегованың ажыдып турар чугула алыс шын билиглерин ханы билип ап, бодуңнуң чуртталгаңны ооң негелделеринге дүүштүр эдип, аңаа таарымчалыг болурун кызыт (Иаковтуң 4:8).

17. Бо тургузугнуң төнчүзү хөй кижилерни чүге хеп-хенертен таварып кээр?

¹⁷ Кижилерниң хөй кезии сөөлгү хүннерниң дугайында өттүр билген медеглелди кичээнгейге албас деп, Иисус баш бурунгаар чугаалаан. Каржы кижилерниң узуткаашкыны хенертен болур. Төнчү хөй кижилерни хеп-хенертен таварып кээр — ол «дүне када оор дег», кээр (1 Фессалоникажыларга 5:2). Иисус сагындырган: «Өгбе Нойнуң үезинде болуп турганы дег, Кижи амытан Оглунуң чедип кээр хүнүнде база ындыг боор. Ол хүннерде, суг халавының мурнуу чарыында, Нойнуң бажың-хемезинге олурупканы хүнге чедир, улус-чон ижип-чип, кадай ап база ашакка барып келген болгай. Суг халап келгеш, оларның шуптузун узуткап каггыжеге, олар чүнү-даа угаап бодавааннар. Кижи амытан  Оглу чедип кээрге, база шак ындыг боор» (Матфейниң 24:37—39).

18. Иисустуң кандыг кичээндириинге бүрүнү-биле шыңгыы хамаарылгалыг болуру чугула?

¹⁸ Иисус бодунуң дыңнакчыларын баш бурунгаар кичээндирерин күзеп, чугаалаан: «Силерниң чүректериңер үен-балай хөглээшкинге, арагалаашкынга болгаш амыдыралдың сагышсыралдарынга алзыптып, дашталбазын дээш база ол хүн хенертен, какпа дег, кырыңарга келбезин дээш, оваарымчалыг болуңар. Чүге дээрге ол хүн чер кырын ээлей чурттаан бүгү улуска чедип кээр. Ынчангаш бо бүгү кел чыдар айыыл-халаптардан чайлай бээр харыктыг болур дээш база Кижи амытан Оглунуң мурнунга [таарымчалыг] бараалгаар дээш, үргүлчү белен болуңар, а ол ышкаш мөргүңер» (Луканың 21:34—36). Иисустуң сөстеринге бүрүнү-биле шыңгыы хамаарылгалыг болуру эргежок чугула. Чүге? Чүге дизе Иегова Бурганга болгаш «Кижи амытан Оглу» — Иисус Христоска таарымчалыг кижилер Эрликтиң тургузуунуң узуткаашкынын ажып эртип шыдаар база чаа кайгамчык делегейге мөңге чурттаар. Ол үе кажангызындан-даа артык чоок! (Иоанның 3:16; 2 Пётрнуң 3:13).