1, 2. а) Белек сеңээ кажан эргим болур? б) Чүге төлевир — эң-не үнелиг белек-тир?

 КАНДЫГ белек эң-не үнелиг деп, бодаар сен? Ол албан аар өртектиг болбас деп, чөпшээрежир боор сен. Белектиң ёзулуг үнезин ыяап-ла акша-биле тодаратпас. Бир эвес белек сеңээ өөрүшкү эккээр азы ылаңгыя хереглеп турган чүүлүң боор болза, ынчан ол сеңээ эргим болур.

² Ынчалза-даа чүнүң-биле-даа деңнеп четпес белек бар. Ону кижилерге Бурган сөңнээн. Иегова биске дыка хөй белек берген, ынчалза-даа оларның эң-не өндүр улуу — ооң Оглунуң, Иисус Христостуң, төлевир өргүлү (Матфейниң 20:28). Бо эгеде, төлевир — эң-не үнелиг белек деп, сайгарып көөр бис. Ол биске илередип четпес өөрүшкү эккээр база чүүден-даа артык херек чүүлдү бээр. Төлевир — Иегованың сеңээ өндүр улуг ынакшылының илередии.

3. Төлевир деп чүл база ооң үнезин угаап-билип алыр дизе, чүнү билип алыры чугула?

³ Бөдүүнү-биле чугаалаарга, төлевир — кижи төрелгетенин  бачыт биле өлүмден камгалаар, азы хостаар, арга-дыр (Ефесчилерге 1:7). Ол библейжи өөредигни билип алырынга Эдем сесерлиинге болган болуушкуннар дузалаар. Адам бачыт кылгаш, чүнү чидиргенин билип алыр болзувусса, чүгле ынчан төлевирниң үнезин угаап-билип алыр бис.

4. Адамга тергиин чуртталга кайы-хире өөрүнчүг турган-дыр?

⁴ Бир дугаар кижини чаяагаш, Иегова аңаа үнелиг белекти — тергиин чуртталганы берген. Адамга ол кайы-хире өөрүнчүг турган-дыр, чүгле бодап көр даан! Тергиин мага-боттуг база тергиин угаан-сарыылдыг болгаш, ол кезээде аныяк, каң-кадык база кажан-даа өлбес турган. Тергиин тургаш, ол Иегова-биле сырый харылзажып болур турган. Адам Бурганның оглу турган деп Библияда чугаалаан (Луканың 3:23, 38). Оларны кайы-хире быжыг харылзаа каттыштырып турган-дыр! Иегова Адамның ынакшылдыг Адазы турган. Бурган ооң-биле чугаалажып, аңаа солун ажылдар берип, оон чүнү манап турарын тайылбырлавышаан, ону сургап чораан (Эге дөс 1:28—30; 2:16, 17).

5. Адам Бурганның овур-хевири-биле чаяаттынган дээн чүүлдүң утказы кандыгыл?

⁵ Адам Бурганның овур-хевири-биле чаяаттынган (Эге дөс 1:27). Ол Бурганга дүрзү-хевири-биле дөмей турган дивээни ол. Иегова — көзүлбес сүлде деп, бирги эгеден билип алган бис (Иоанның 4:24). Ынчаарга ооң көстүр мага-боду чок. Адам Бурганның овур-хевири-биле чаяаттынган дээн чүүлдүң утказы, Бурганда бар шынарларны: ынакшылды, мерген угаанны, чөптүг чорукту база күштү ол илередип шыдаар турган. Оон ыңай Адам Адазы ышкаш, хостуг эргелиг турган. Ол кызыгаарлыг программа-биле башкартыр робот эвес турган. Ол эки биле бактың аразындан шилип, боду шиитпир үндүрүп болур турган. Бир эвес ол шын орукту шилип алгаш, Бурганга дыңнангыр артып калган болза, ол чер кырынга дываажаңга мөңге чурттаар турган.

6. Адам Бурганга удурлангаш, чүнү чидиргенил база ол чүүл ооң салгалынга кандыг салдарлыг болганыл?

 ⁶ Адам Бурганга удурлангаш, өлүмге шииттирген. Бодунуң дыңнангыр эвези дээш, ол аар өртек төлээн. Бачыттың ужурунда тергиин чуртталга база ооң-биле холбаалыг бүгү йөрээлдер читкен (Эге дөс 3:17—19). Хомуданчыг чүүл, тергиин чуртталганың белээн чүгле Адам эвес, а ооң шупту салгалы чидирген. «Бачыт бо делегейже чаңгыс кижи [Адамны] дамчып кирип келген, а бачыт-биле кады — өлүм база; а өлүм бүгү улустуң салым-хуузу апарган, чүге дээрге шупту улус бачыт үүлгеткен» — деп Бурганның Сөзүнде чугаалаан (Римчилерге 5:12). Ийе, бис шупту Адамдан бачытты салгап алган бис. Ол бодун база бодунуң салгалын бачыт болгаш өлүмге кул кылдыр «саттырыпкан» деп Библияда чугаалаан (Римчилерге 7:14). Адам биле Ева Бурганны биле тура-ла дыңнавайн баргаш, келир үеже идегелин кезээ-мөңгеде чидирген. Ынчалза-даа оларның салгалының база бис ийиниң дугайында, чүнү чугаалап болурул?

7, 8. Төлевирниң ийи чугула талазының утказы кандыгыл?

⁷ Иегова кижилерни камгалаар дээш, сагыш човап, төлевир берген. Төлевир деп чүл? Ооң утказы ийи чугула талалыг. Бирээде, ол кандыг-бир кижини хостаар дээш, азы орнунга арттырган чүүлдү эгидер дээш, төлээр өртек-тир. Шак ындыг төлевирни туттурган кижилерни хостаар кылдыр төлээн өртек-биле деңнеп болур. Ийиде, төлевир — дээрге орнун тургузары, азы чидирген чүүлдүң орнунга дең өртек бээри, чижээ, когаралдың азы каражаның орнун тургузары. Бир эвес бир кижи орукка озал-ондакка буруулуг апарган болза, чедирген когаралга ол долузу-биле дүгжүп турар өртекти орнунга тургузар апаар.

⁸ Адамның кижи төрелгетенинге чедирген улуг каражазын дуглаары болдунар бе? Бисти шуптувусту бачыттың болгаш өлүмнүң кулданыышкынындан  канчап хостап алырыл? Иегова кандыг төлевирни берген база төлевир сеңээ кандыг хамаарылгалыг, билип аалам.

9. Кандыг төлевир төлээри негеттингенил?

⁹ Тергиин чуртталга читкен болганда, чаңгыс-даа бачыттыг кижи ол каражаның орнун тургузуп шыдавас (Ырлар 48:8, 9). Чидирген чүүлдүң орнунга дең өртектиг төлевир төлээри негеттинген. Ол чүүл: «амы-тын дээш — амы-тын» — деп чөптүг библейжи дүрүмге дүгжүп турар (Хоойлу 19:21). Ынчаарга Адамның чидирип алган тергиин чуртталгазының орнун чүү тургузуп болурул? Чүгле өске тергиин кижиниң чуртталгазы дүүшкек төлевир бооп болур турган (1 Тимофейге 2:6).

10. Иегова төлевирни канчаар бергенил?

¹⁰ Иегова төлевирни канчаар бергенил? Ол бодунуң дээрде тергиин оолдарының бирээзин черже чорудупкан. Ынчалза-даа ол дээрниң анаа төлээзи эвес турган. Ол Бурганның чүүден-даа артык үнелээр — ооң эр чаңгыс Оглу болган (1 Иоанның 4:9, 10). Ол Оглу эки туразы-биле дээрде чуртталгазындан ойталаан (Филиппийжилерге 2:7). Иегова Оглунуң чуртталгазын хуулгаазын-биле Марияның иштинче көжүрүпкен деп, эрткен эгеден билип алдывыс. Ынчалдыр, ыдыктыг сүлдениң дузазы-биле, Иисус тергиин кижи кылдыр төрүттүнгеш, бачыт биле өлүмнү салгап албаан (Луканың 1:35).

11. Чаңгыс кижи миллион-миллион кижилер дээш төлевирни канчап берип болур турганыл?

¹¹ Ынчалза-даа чаңгыс кижи миллион-миллион кижилер дээш төлевирни канчап берип болур турганыл? Сактып кел даан, кижилер канчап бачыттыг апарганыл? Адам бачыт кылгаш, Бурганның үнелиг белээн — тергиин чуртталгазын чидирген. Ынчангаш ол ону бодунуң салгалынга дамчыдып шыдаваан. Кижилер  чүгле бачыт биле өлүмнү салгап алган. Ынчалзажок Библияда «сөөлгү Адам» деп адаттынган Иисус тергиин болганда, бачыттан хостуг турган (1 Коринфичилерге 15:45). Бөдүүнү-биле чугаалаарга, бисти камгалаар дээш, Иисус Адамны солупкан. Иисус өлүмүнге чедир Бурганга шынчы арткаш, Адамның бачыды дээш, бодунуң тергиин чуртталгазын өргүл кылдыр төлээн. Ооң-биле Иисус Адамның салгакчыларынга идегелди берген (Римчилерге 5:19; 1 Коринфичилерге 15:21, 22).

12. Иисус хилинчекти шыдажып эрткеш, чүнү бадыткааныл?

¹² Иисус өлүрүнүң мурнунда чүнү шыдажып эрткенин Библияда тодаргай бижээн: ону каржызы-биле кымчылап-кымчылап, хилинчектиң чагызынга хере шаапкаш, аажок хилинчектенип өлзүн дээш, артырып каан (Иоанның 19:1, 16—18, 30; «Чүге алыс шын христианнар белдир-крестке чүдүвейн турар» Капсырылга). Иисус чүге ынчаар хилинчектенир ужурлуг турганыл? Эрлик Иегова-биле маргыжарын күзээш, ооң бараалгакчылары бергелерге таваржы бергеш, аңаа бердинген артып шыдавас деп, чарлаанының дугайында бо номнуң дараазында эгелеринден билип алыр бис. Эң-не берге дээн хилинчекти шыдажып, кем-буруу чок арткаш, Иисус Эрликтиң чөңгээзинге эң-не шыңгыы харыыны берген. Эрлик чеже-даа шаптараазыннар тургусса, хостуг эргелиг тергиин кижи Бурганга шынчы артып каап болур деп, ол бадыткаан. Бодунуң эргим Оглунуң шынчызын көргеш, Иегова кайы-хире өөрээн деп! (Чугаалар 27:11).

13. Төлевир канчаар төлеттингенил?

¹³ Төлевир канчаар төлеттингенил? Бистиң эраның 33 чылда, еврей календарь ёзугаар 14 нисанда, Бурган бодунуң тергиин, бачыт чок оглун шаажылаарын чөпшээрээн. Шак ынчаар Иисус «кажан кезээде» бодунуң тергиин кижи чуртталгазын өргүл кылдыр берген (Еврейлерге 10:10). Өлген соонда, үш дугаар хонуунда, Иегова Иисусту көзүлбес хуу-бот кылдыр диргизипкен. Дээрге баргаш, Иисус Адамның салгалы дээш төлевир кылдыр  берген, бодунуң тергиин чуртталгазының эргезин Бурганга сөңнээн (Еврейлерге 9:24). Иегова кижи төрелгетенин бачыт биле өлүмнүң кулданыындан хостаар дээш, Христостуң өргүлүн төлевир кылдыр хүлээп алган (Римчилерге 3:23, 24).

14, 15. Канчалдыр «бачыттарывысты өршээдип» болур бис?

¹⁴ Бис бачыттыг-даа болзувусса, төлевир биске үнелиг йөрээлдерни берип турар. Бурганның ол өндүр улуг белээ биске чүнү ажыдып турарын көрээлем.

¹⁵ Бачыттарны өршээри. Бачытты салгап алган болгаш, бодувусту шын алдынар дээш, демисел чорудуп турар бис. Бис шуптувус аксывыс-биле, чок болза кылдыныгларывыс-биле бачытты кылып чоруур бис. Ынчалза-даа Христостуң хосталга бээр өргүлүн таварыштыр «бачыттарывысты өршээдип» болур бис (Колоссчуларга 1:13, 14). Өршээлди алыр дизе, чүрээниң ханызындан буруузун миннири чугула. Иисустуң хосталга бээр өргүлүнге бүзүреп, аңаа даянып алгаш, Иеговадан өршээлди биче сеткилдии-биле дилээр болза эки (1 Иоанның 1:8, 9).

16. Бурганга арыг арын-нүүрлүг бараалгаарын биске чүү чөпшээреп турарыл, база ол чүүл кандыг йөрээлдерни эккеп турар?

¹⁶ Бурганның мурнунга арыг арын-нүүр. Сагыш-сеткил аарыыры идегел чок, чөгенчиг мен деп минниишкинни тывылдырып болур. Ынчалзажок төлевирге даянгаш, бачыттарны өршээп тура, Иегова биске — бачыттыг кижилерге — бодунга арыг арын-нүүрлүг бараалгаарын энерелдии-биле чөпшээреп турар (Еврейлерге 9:13, 14). Ооң ачызында Иегованың мурнунга дидими-биле, хостуг мөргүп болур бис (Еврейлерге 4:14—16). Иегова-биле эки харылзаа сагыш-сеткилге оожургал берип, бодун төлептиг кылдыр миннииринге болгаш аас-кежиктиг болурунга дузалаар.

17. Иисус бис дээш өлгениниң ачызында, кандыг йөрээлдер болдунарыл?

 ¹⁷ Черге дываажаңга мөңге чурттаар идегел. «Бачыттың төлевири — өлүм, а Бурганның ачы-буян хайырлалы... Христос Иисуска башкарткан мөңге амыдырал болгай» — деп Римчилерге 6:23-те чугаалаан. Черге дываажаңга чуртталга кайы-хире кайгамчыктыг болурун 3-кү эгеден билип алдывыс (Ажыдыышкын 21:3, 4). Бүгү ол йөрээлдер, ол ышкаш мөңге чуртталга болгаш тергиин кадыкшыл, Иисустуң бис дээш өлгениниң ачызында болдунар. Оларны алыр дизе, төлевирни үнелеп, Бурганга ооң белээ дээш четтиргенин илередири чугула.

18. Чүге Иеговага төлевир дээш четтиргенин илередир херек?

¹⁸ Иеговага төлевир дээш, чүге четтиргенин илередир херек? Белекти берген кижи хөй үезин, күжүн азы акша-төгериин чарыгдаан болза, белек ылаңгыя үнелиг болур. Ындыг белек сеткилди өөртүр, чүге дизе ол бистиң эживистиң ак-сеткилдиг ынакшылын көргүзүп турар. Төлевир — үнелиг белек, ооң-биле чүү-даа деңнежип шыдавас, чүге дизе ону бээрде, Иегова өндүр улуг өргүл кылган. Иоанның 3:16-да: «Бурган бодунуң эр чаңгыс  Оглун берипкен. Ооң бо делегейниң улузунга ынакшылы ол хире болган-дыр» — деп бижээн. Төлевир — Иегованың биске ынакшылының эң-не улуг бадыткалы. Оон ыңай, бис дээш чуртталгазын күзелдии-биле берген Иисустуң ынакшылының дугайында ол херечилеп турар (Иоанның 15:13). Иегова биле ооң Оглу кижи бүрүзүнге ынак деп бүзүрээр үндезинни төлевир биске берип турар (Галатчыларга 2:20).

19, 20. Төлевир дээш Бурганга четтиргенин канчаар илередирил?

¹⁹ Бурганның үнелиг белээ дээш аңаа четтиргениңни канчаар илередип болур сен? Чүнү-даа мурнай, Өндүр Улуг Сөңнекчи Иегова-биле найыралыңны быжыгла (Иоанның 17:3). Аңаа холуңда тудуп алганың ном Библияны өөрениринге дузалаар. Иегова-биле найыралың өскен тудум, аңаа ынакшылың улам өзер. А Бурганга ынакшыл аңаа таарымчалыг болурунга сени оттурар (1 Иоанның 5:3).

²⁰ Христостуң хосталга бээр өргүлүнге бүзүрелиң көргүс. «Оглунга бүзүрээн кижи мөңге амыдыралдыг болур» — деп, Иисус чугаалаан (Иоанның 3:36). А Иисуска бүзүрелди канчаар илередирил? Ындыг бүзүрел чүгле сөстер-биле илереттинмес. «Бүзүрел база ажыл-херектер чокта өлүг» — деп Иаковтуң 2:26-да чугаалаан. Ийе, алыс шын бүзүрел ажыл-херектер-биле бадыткаттынар. Иисуска бүзүрелди көргүзер аргаларның бирээзи — ооң үлегерин шыдаар шаа-биле кызып эдерери-дир (Иоанның 13:15).

21, 22. а) Христостуң өлүмүнүң сактыышкын Кежээзи деп чылдың-на эртер байырлалга чүге кээр болзувусса эки? б) 6-гы болгаш 7-ги эгелерде чүү дугайында чугаа болур?

²¹ Христостуң өлүмүнүң сактыышкын Кежээзинче кел. Бистиң эраның 33 чылда 14 нисанда Иисус Дээргиниң сактыышкын кежээзи дээр тускай байырлалды киирген (1 Коринфичилерге 11:20; Матфейниң 26:26—28). Ону Дээргиниң Кежээзи деп база адаар. Элчиннер  болгаш шупту алыс шын христианнар Иисус олар дээш бодунуң тергиин кижи чуртталгазын төлевир кылдыр берген деп сактып чоруур кылдыр, ол байырлалды киирген. Иисус ол байырлал дугайында мынча дээн: «Мээң дугайымда сактыышкын кылдыр мынчаар кылып... чоруңар» (Луканың 22:19). Дээргиниң Кежээзи деп чылдың-на эртер байырлалга кээп турарывыс-биле, Иегованың болгаш Иисустуң биске көргүскен өндүр улуг ынакшылын сактып чоруурувусту көргүзүп турар бис. Ол чүүл биске төлевир дээш четтиргенивисти илередир арганы берип турар a.

²² Шынап-ла, Иегованың берген төлевири — эң-не үнелиг белек (2 Коринфичилерге 9:14, 15). Өлген улустуң келир үезин безин ол өскертип болур. Ол канчаар болдунарын 6-гы болгаш 7-ги эгелерде тайылбырлаан.