Кажан бойдус халавы болу бээрге, Иегованың Херечилери дүргени-биле когараан черлерде ха-дуңмага дузалажып эгелээр. Шак ынчаар бис бот-боттарывыска ёзулуг ынакшылды илередип турар бис (Иоанн 13:34, 35; 1 Иоанн 3:17, 18). Ындыг дузаже чүү кирип турарыл?

Акша-төгериивисти өргүп турар бис. Бирги векте Иудеяга улуг аш эгелей бээрге, Антиохиядан христианнар бүзүрели чаңгыс ха-дуңмазынче дузаламчы акша чоргузупкан (Ажыл-чорудулга 11:27—30). Ол ышкаш бөгүн база кандыг-бир чуртка ха-дуңмавыс бергелерге таваржы бээрге, бис тус черниң хуралы таварыштыр өргүлдеривисти чоргузуп турар бис (2 Коринфичилерге 8:13—15).

Херек кырында дузаны чедирип турар бис. Удуртукчулар когараан черде чыыштың кежигүн бүрүзүнүң онча-мендизин хынаар дээш, оларны тып алырын кызып турарлар. Дуза чедирер комитет аъш-чемниң, ижер сугнуң, идик-хептиң курлавырын үлеп, ол ышкаш чурттаар оран-сава болгаш эмчи дузазы дээш сагыш човап турар. Чогуур мергежилдиг хөй Иегованың Херечилери бажыңнарны болгаш Хурал залдарын катап тудар дээш, эки туразы-биле кээп турар. Бистиң организациявыста тергиидеп турар чаңгыс аай, демниг чорук болгаш эгин кожа ажылдап тургаш чедип алган дуржулгавыс, айыыл-халап болу бээрге, дүрген хөделиринге дузалап турар. Ынчалза-даа «бүзүрели чаңгыс ха-дуңмавыска» дузалап тургаш, өскелерни база утпайн турар бис (Галатчыларга 6:10).

Улусту Бурганның Сөзү-биле быжыктырып, сагыш-сеткилин оожургадып турар бис. Ылаңгыя бойдус халаптарындан когараан кижилер аргалалды хереглээр боор. Ындыг үелерде «бисти аргалап, деткип чоруур» Иегова Бурган биске күштү берип турар (2 Коринфичилерге 1:3, 4). Бурганның Чагыргазы удавас аарышкы болгаш хилинчек чедирер шупту айыыл-халаптарны узуткаар деп, Библияның аазаашкынының дугайында кижилерге өөрүшкүлүг чугаалап турар бис (Ажыдыышкын 21:4).

• Бойдус халаптарының үезинде Иегованың Херечилери чүнүң ачызында дузаны дүрген чедирип турарыл?

• Когарааннарны Бурганның Сөзү-биле канчаар аргалап болурул?